ރާއްޖެ މެޗުތައް ހިމެނޭހެން ކޮލިފައިން އަނެއްކާ ވެސް ފަސްކޮށްފި

ފީފާ ވޯލްޑް ކަޕާއި 2023ވަނަ އަހަރުގެ އޭޝިއަން ކަޕް ޖޮއިންޓް ކޮލިފައިންގެ މެޗްތަށް އަނެއްކާވެސް އޭއެފްސީއިން ފަސްކޮށްފިއެވެ.

ކޯވިޑް-19ގެ ހާލަތުން އަރައިގަންނަން ކުރި މަސައްކަތުގައި ކުރިއެރުމެއް ނުލިބި އޭރު ވެސް މެޗުތައް ބޭއްވޭނެ ގޮތް ނުވުމުން ދެ ވަނަ ފަހަރަށް މެޗުތައް ފަސްކުރީ އަންނަ މަހު ބާއްވާ ގޮތަށެވެ. އޭއެފްސީން އިއްޔެ ނެރުނު ބަޔާނުގައި ބުނެފައިވަނީ އަންނަ މަހު ކުޅެން ހަމަޖެހިފައިވާ މެޗުތަކުގެ ތެރެއިން ހަތަރު މެޗެއް ފިޔަވައި ދެން ހުރި ހުރިހާ މެޗެއް ކުޅޭނީ ޖޫން މަހު ކަމަށެވެ.

އަންނަ މަހުގެ 25ވަނަ ދުވަހު ޗައިނާ އާއި ދެކޮޅަށް ޗައިނާގައި ދިވެހިރާއްޖެ ކުޅެން އޮތް މެޗާއި މިއަންނަ މަހުގެ 30ވަނަ ދުވަހު މާލޭގައި ސީރިއާއާއި ދެކޮޅަށް ގައުމީ ޓީމް ކުޅެން އޮތް މެޗު މިހާރުވަނީ ޖޫންމަހަށް ފަސްކޮށްފައެވެ.

އަންނަ މަހު ކުޅޭ ގޮތަށް ޝެޑިއުލްކޮށްފައިވާ ހަތަރު މެޗަކީ ނޭޕާލުން އެ ގައުމުގައި އޮސްޓްރޭލިއާއާ ދެކޮޅަށް ކުޅޭ މެޗާއި ސައުދީ އަރަބިއްޔާ އިން ޔަމަނާ ދެކޮޅަށް ކުޅޭ މެޗުގެ އިތުރުން ތަޖިކިސްތާނާއި މޮންގޯލިއާ ބައްދަލުކުރާ މެޗު އަދި މޮންގޯލިއާ އާއި ޖަޕާން ކުޅޭ މެޗެވެ.

މިދިޔަ އަހަރު މާޗް މަހު 26 ވަނަ ދުވަހާއި 31 ވަނަ ދުވަހު ކުޅެން އޮތް މެޗުތައް ފުރަތަމަ އޭއެފްސީއިން ފަސްކުރުމަށްފަހު އަލުން މެޗުތައް ކުޅެން ތާވަލުކުރީ މިދިޔަ އޮކްޓޫބަރާއި ނޮވެމްބަރު މަހުގައެވެ. ކޯވިޑް19ގެ ހާލަތުން އަރައިގަންނަން ގައުމުތަކުން ކުރި މަސައްކަތުގައި ކުރިއެރުމެއް ނުލިބި އޭރު ވެސް މެޗުތައް ބޭއްވޭނެ ގޮތް ނުވުމުން ދެ ވަނަ ފަހަރަށް އޭއެފްސީއިން މެޗްތައް ފަސްކުރިއެވެ. އަދި ތިންވަނަ ފަހަރަށް މެޗްތައް މިހާރު ފަސް މިކުރީ ޖޫން މަހަށެވެ. ރާއްޖެ ހިމެނޭ ގުރޫފް އޭގެ މެޗްތައް ސެންޓްރަލައިޒްކޮށް ޗައިނާގައި ބޭއްވުމަށް ނިންމާފައިވާކަމަށް ޗައިނާގެ މީޑިޔާ ރިޕޯޓްތަކުން ބުނެއެވެ.

ރާއްޖެ ހިމެނޭ ގުރޫޕް އޭގެ އެއްވަނައިގައި މިވަގުތު އޮތީ 5 މެޗުން 15 ޕޮއިންޓް ހޯދައިގެން ސީރިއާއެވެ. ޗައިނާއަށް 4 މެޗުން ލިބިފައިވަނީ 7 ޕޮއިންޓެވެ. ގުރޫޕްގެ 3 ވަނައިގައި އޮތީ 5 މެޗުން 7 ޕޮއިންޓާއެކު ފިލިޕީންސް އަދި ގުރޫޕްގެ އެންމެ ފުލުގައި އޮތީ ގުއާމެވެ.