ހިޔާ މަޝްރޫޢޫގެ ދަށުން ފްލެޓު ދިނުމަށް ކުރީ ސަރުކާރުން ކަނޑައެޅި ތިން ކެޓަގަރީއެއްގެ ފޯމްތައް ބާޠިލްކޮށް ފްލެޓް ނުދިނުމަށް މިސަރުކާރުން ނިންމި ނިންމުމަކީ ނުހައްގު، ބޭއިންސާފު ނިންމުމެއްކަމަށް ހިޔާ މަޝްރޫގައި އެންމެ އިސްކޮށް އުޅުއްވި ކުރީގެ ހައުސިން މިނިސްޓަރ ޑރ.މުޙައްމަދު މުޢިއްޒު ވިދާޅުވެއްޖެއެވެ.
ކުރީގެ ރައީސް ޢަބްދުﷲ ޔާމީންގެ ސަރުކާރުން ހުރިހާ އެންމެނަށް ފްލެޓް ދިނުމަށް ކަނޑައަޅާފައިވާ ތިން ކެޓަގަރީއަކުން ފްލެޓް ނުދިނުމަށް މިސަރުކާރުން ނިންމާ އެކެޓަގަރީތަކުން ފޯމްތައް ބާޠިލްކޮށްފައިވުމުން ގިނ ބަޔަކު އަންނަނީ ނުރުހުން ފާޅުކޮށް ސަރުކާރަށް ވަރަށް ބޮޑަށް ފާޑުކިޔަމުންނެވެ.
މިސަރުކާރުން ފްލެޓް ނުދިނުމަށް ނިންމާފައިވާ ކެޓެެގަރީތަަކީ:
- H11 (18 އަހަރާ 40 އަހަރާ ދެމެދުގެ ކައިވެނިކޮށްގެން އުޅޭ ފަރާތްތަކަށް ޚާއްސަ (1 ކޮޓަރި))
- H13 (މާލޭ މުނިސިޕަލްޓީގެ ދަފްތަރުގައި ރަޖިސްޓްރީވެފައިވާ ފަރާތްތަކަށް ޚާއްސަ (1 ކޮޓަރި))
- H15 (އަލަތު ކައިވެނިކޮށްގެން އުޅޭ ޒުވާނުންނަށް ޚާއްސަ (1 ކޮޓަރި))
މިކަމާއި ގުޅިގެން ކުރީގެ ހައުސިންގ މިނިސްޓަރ ޑރ.މުޢިއްޒު ވިދާޅުވީ، އަލަތު ކައިވެނިކޮށްގެން ތިބި ޒުވާނުންނާއި ޢާންމު ރައްޔިތުންގެ ތެރެއިން1 ކޮޓަރީގެ ފްލެޓް ލިބޭނެކަމުގެ އުއްމީދުގައި ތިބި އެތައް ހާސް ރައްޔިތުންގެ އުއްމީދުތައް ނުޙައްޤު ބޭއިންސާފު ނިންމުމުގެ ސަަބަބުން ގެއްލިފައިވާކަމަށެވެ.
އެއް ކޮޓަރީގެ ފްލެޓްތައް ނުދިނުމަށް ނިންމާ ސަރުކާރުން ކޮށްފައިވާ ޢާންމު އިޢުލާންގައި ވަނީ 2018 ވަނަ އަހަރު “ހިޔާ” މަޝްރޫޢަށް އިޢުލާންކުރެއްވިއިރު، އެ މަޝްރޫޢުގެ ކެޓަގަރީތަކުގެ ތެރެއިން 1 ކޮޓަރީގެ ކެޓަގަރީތަކަށް (H11 އިން H15 އަށް) ފްލެޓް ދޫކުރުމަށް ހަމަޖައްސާފައިވަނީ ހުޅުމާލޭ ފޭސް 2 ގައި ސަރުކާރު ކުންފުނިތަކުން އެޅުމަށް ނިންމާފައިވާ ޓަވަރުތަކުން 1 ކޮޓަރީގެ ބައެއް ފްލެޓްތައް ސަރުކާރަށް ގަތުމަށްފަހުކަމަށް ބުނެފައިވެއެވެ.
އެގޮތުން ހައުސިން މިނިސްޓްރީއިން ވަނީ ސަރުކާރުން ގަތުމަށް ލިބެންހުރި ފްލެޓްތަކާ ބެހޭ މައުލޫމާތު، ހުޅުމާލެ ފޭސް 2 ގައި ޓަވަރުތައް އެޅުމުގެ މަސައްކަތް ކުރިއަށްގެންދާ ކުންފުނިތަކުން ހޯދާފައިކަމަށާއި، އެ މިނިސްޓްރީއަށް ލިބުނު މައުލޫމާތުތަކަށް ބިނާކޮށް ސަރުކާރުން ގަތުމަށް ލިބެންހުރީ ހަމައެކަނި މޯލްޑިވްސް ވޯޓަރ އެންޑް ސްވަރޭޖް ކޮމްޕެނީ ޕްރައިވެޓް ލިމިޓެޑް އިން ސަރުކާރަށް އެލޮކޭޓްކޮށްފައިވާ 36 ފްލެޓްކަމަށްވެސް ސަރުކާރުގެ އިޢުލާންގައިވެއެވެ.
އެހެންކަމުން މިހާރު ސަރުކާރަށް ގަތުމަށް ލިބެންހުރި 36 ފްލެޓް، “ހިޔާ” މަޝްރޫޢުގެ H14 (ނުކުޅެދުންތެރިކަން ހުންނަ ފަރާތްތަކާއި އާއިލާތަކަށް ޚާއްސަ (1ކޮޓަރި) ކެޓަގަރީއަށް ހުށަހަޅުއްވާފައިވާ ފަރާތްތަކުގެ ތެރެއިން ޝަރުތު ހަމަވާ ފަރާތްތަކަށް އެލޮކޭޓްކުރުމަށްފަހު، ބާކީވާ ފްލެޓްތައް، “ހިޔާ” މަޝްރޫޢުގެ H12 (މާލޭ ރަށްވެހިންނަށް ޚާއްސަ (1 ކޮޓަރި)) ކެޓަގަރީއަށް އެލޮކޭޓްކުރުމަށް ސަރުކާރުން ނިންމާފައިވާކަމަށްވެސް އިޢުލާންގައިވެއެވެ.
އެހެންކަމުން ސަރުކާރު ކުންފުނިތަކުން އެޅުމަށް ނިންމާފައިވާ ޓަވަރުތަކުން އިތުރު ފްލެޓް ގަންނަން ލިބެން ނެތުމުގެ ސަބަބުން އެ ކެޓަގަރީތަކަށް ހުށަހަޅާފައިވާ ފޯމުތައް ބާޠިލްކުރުމަށް ނިންމާފައިވާކަމަށްވެސް ސަރުކާރުގެ އިޢުލާންގައިވެއެވެ.
އެއް ކޮޓަރީގެ ފްލެޓްތައް ނުދިނުމަސް ސަރުކާރުން ނިންމާފައިވާއިރު، އެއް ކޮޓަރީގެ ފްލެޓްތަކަށް އެދުނު ހުރިހާ އެންމެނަށްވެސް ފްލެޓް ދޭން ކުރީ ސަރުކާރުން ނިންމާފައިވެއެވެ. ނަމަވެސް ކުރީ ސަރުކާރުން ފްްލެޓްތައް ދިނުމަށް ނިންމާފައިވަނީ ގޯސްކޮށްކަމަށް ބުނެ، މިސަރުކާރުން ވަނީ ފްލެޓްތަކުގެ މައްސަލަތައް ބެލުމަށް ކޮމިޓީއެއް އެކުލަވާލާފައެވެ. އަދި އެ ކޮމިޓީން ފެލެޓްތަކުގެ މައްސަލަތައް ބަލައި ދެކޮޓަރީގެ ފްލެޓްތަކުގެ ތެރެއިން މިހާރު ވަނީ ފްލެޓް ލިބޭ މީހުންގެ ދާއިމީ ލިސްޓް ޢާންމުކޮށްފައެވެ.
ނަމަވެސް މިސަރުކާރުން ފެލެޓް ދީފައިވަނީ ސަރުކާރައި ގާތް މީހުންނަށްކަމަށާއި، އެންމެ ހާލުގައި ދިރިއުޅޭ އަދި ފްލެޓް ހައްގުވާ އެތައް ބަޔަކަށް ފްލެޓް ދީފައި ނުވާކަމުގެ ކަންބޮޑުވުމާއި ޝަކުވާާ ބައެއް ފަރާތްތަކުން ދަނީ ކުރަމުންނެވެ. އެކަމާއި ގުޅިގެން އިދިކޮޅުން ދަނީ ސިލްސިލާ މުޒާހަރާތައްވެސް ކުރަމުންނެވެ.
އަދި މިސަރުކާރަށް ތާޢީދުކުރާ ބައެއް ފަރާތްތަކުން ވަނީ ބޯހިޔާވަހިކަމަށް ހައްލެއް ގެނެވޭނީ “ހިޔާ” މަޝްރޫޢު ކުރިއަށް ގެންދިއުމުގައި އިސްކޮށް އުޅުއްވި ކުރީގެ ހައުސިން މިނިސްޓަރ ޑރ.މުޙައްމަދު މުޢިއްޒުއަކަމަށް ބުނެ މާލޭގެ މޭޔަރުކަމަށް މުޢިއްޒުއަށް ތާޢީދުކުރުމަވެސް ނިންމާފައިވެއެވެ.
ކޮމެންޓު ފޮނުވާ