ކޯވިޑް-19ގެ ބަލި މަޑުކަމާއިއެކު ރާއްޖޭގެ އިޤްތިޞާދަށް އައި ހީނަރުކަމުގެ ސަބަބުން އެތައްހާސް ބަޔަކު ދަތިހާލުގައި ތިއްބައި އެތައް މިލިޔަން ރުފިޔާ ޚަރަދުކޮށްގެން ނިޒާމު ބަދަލުކުރަން މަސައްކަތް ކުރުމަކީ ރައްޔިތުންނަށް ހެޔޮއެދޭނެ ބަޔަކު ކުރާނެ ކަމެއްނޫންކަމަށް މަރަދޫ ދާއިރާގެ މެމްބަރު އިބްރާހިމް ޝަރީފް ވިދާޅުވެއްޖެ އެވެ.
ރާއްޖޭގެ ވެރިކަމުގެ ނިޒާމު ބަރުލަމާނީ ނިޒާމަކަށް ބަދަލު ކުރުމަށް މިއަދު ކާށިދޫ ދާއިރާގެ މެމްބަރު މަޖިލީހަށް ހުށަހެޅި ބިލުގެ ފުރަތަމަ ކިޔުން އިއްވައި އިބްތިދާއީ ބަހުސްކުރުމަށް އެޖެންޑާކޮށްފައިވާތީ އެކަމަށް ފާޑުވިދާޅުވެ ޝަރީފް ވިދާޅުވީ މިއީ ޤައުމަށް ހެޔޮއެދޭބަޔަކު މިހާލަތުގައި ކުރާނެ ކަމެއްނޫންކަމަށެވެ. މިހާލަތަކީ އެތައް ބަޔަކު ދަތިހާލުގައި ތިބި ވަގުތަކަށްވާއިރު ހާލަތު ބަދަލުކުރަން ކުރަންޖެހޭ ކަންކަން ނުކޮށް އަމިއްލަ މަންފާ ހާސިލްކުރުމަށް ފައިސާ ހޭދަކުރުމަކީ ބަލައިގަނެވޭނެ ކަމެއްނޫންކަމަށް ޝަރީފް ވިދާޅުވި އެވެ.
ކޯވިޑްގެ ސަބަބުން ރައްޔިތުންގެ އާމްދަނީ އާއި ދައުލަތުގެ އާމްދަނީ ދަށަށް ގޮސްފައިވާ ވަގުތެއްގައި، އެތައް މިލިޔަން ރުފިޔާ ޙަރަދުކޮށްގެން ނިޒާމު ބަދަލުކުރަން ރެފަރެންޑަމަކަށް ދާންޖެހޭ އެއްވެސް ސަބަބެއްނެތް. މިއީ ރައްޔިތުންނަށް ހެޔޮއެދޭ ބަޔަކު މި ދަތި ދަނޑިވަޅު ކުރާނެކަމެއްނޫން
– އިބްރާހިމް ޝަރީފް
ޝަރީފް ވިދާޅުވީ ޤައުމު ހަލަބޮލިކޮށް ޤައުމުގެ އަމާންކަން ނަގާލުމަށް ކުރެވޭ އެއްވެސް މަސައްކަތެއްގައި އެއްވެސް ސިފައިއެއްގައި ތާއީދު ނުކުރައްވާނެ ކަމަށެވެ. ޝަރީފް ވިދާޅުވީ މަޖިލިސް ތެރެއިން މަސައްކަތް ފެންނަ ގޮތަށް ބަލާއިރު ނެތް ފައިސާއެއް ޚަރަދުކޮށްގެންވެސް ނިޒާމު ބަދަލުކުރުމަށް ރައްޔިތުންގެ ރެފަރެންޑަމްއަކަށް ދިއުމަށް މަސައްކަތް ކުރާތަން ފެންނަކަމަށެވެ. ނަމަވެސް މިއީ ރައްޔިތުންނަށް ހެޔޮ އެދިގެން ރައްޔިތުންނަށް ފައިދާއެއް އޮތްކަމެއް ނޫންކަމަށް ޝަރީފް ވިދާޅުވި އެވެ.
ޤައުމު ހަލަބޮލި ކުރުމަށް އެއްވެސް ފަރާތަކުން ހިންގާ ކަމެއްގައި ބައިވެރި ނުވާނަން. ކޯވިޑްގެ ސަބަބުން ރައްޔިތުން ތިބީ ވަރަށް ހާލުގައި. މިގޮތަށް އޮއްވާ ރައްޔިތުންގެ ހާލަތު ބަދަލުކުރަން އޮއި ވަގުތު ޤައުމު ހަލަބޮލިކޮށް ނަތް ފައިސާއެއް ޚަރަދުކޮށްގެން ނިޒާމު ބަދަލުކުރަން ރެފަރެންޑަމް އަކަށް ދާން ތާއީދު ނުކުރަން"
– އިބްރާހިމް ޝަރީފް
ޝަރީފްވަނީ ބަރުލަމާނީ ނިޒާމަކަށް ބަދަލުވެއްޖެނަމަ މަޖިލިސް ތެރޭގައި ގެރި ބަކަރީގެ ވިޔަފާރީގެ އުސޫލު ތަޢާރަފް ވާނެކަމަށްބުނެ މިއަދު ވަރަށްބޮޑަށް ފާޑުވިދާޅުވެފަ އެވެ. ވެރިކަމުގެ ނިޒާމު ބަދަލުކުރުމާއި ދެކޮޅަށް ޝަރީފް ވާހަކަ ދައްކަވާއިރު މަޖިލިސް ރައީސް މުހައްމަދު ނަޝީދަކީ ބަރުލަމާނީ ނިޒާމަށް ތާއީދުކޮށް އެނިޒާމު ގެނައުމަށް މަސައްކަތް ކުރައްވަމުންދާ އެއް ސިޔާސީ ލީޑަރެވެ. ރައީސް ނަޝީދު ވަނީ ނިޒާމު ބަދަލުކުރުމުގެ މަސައްކަތް މިވަގުތު ކުރުން ރަނގަޅު ނުވިނަމަވެސް މިއީ ކުރަންޖެހޭ ކަމެއްކަމަށް ވިދާޅުވެފަ އެވެ. ރާއްޖޭގެ ނިޒާމު ބަދަލު ކުރުމަށް ސިޔާސީ ލީޑަރުންގެ ތެރެއިން ތާއީދު ކުރާ ހަމައެކަނި ސިޔާސީ ލީޑަރަކީވެސް ރައީސް ނަޝީދެވެ.
ބައެއް ސިޔާސީ ފަރާތްތަކުން ތުހުމަތު ކުރައްވާ ގޮތުގައި ޖާބިރުގެ މި ހުށަހެޅުއްވުމަކީ ރައީސް ނަޝީދުގެ އިޝާރާތަކަށް ކުރައްވާ މަސައްކަތެކެވެ. އަދި މިއީ މަޖިލިސް ތެރޭގައި މިކަމަށް ބަހުސްކޮށް މެމްބަރުންގެ ވިސްނުން ހުރިގޮތެއް ޓެސްޓް ކޮށްލުމަށް ރައީސް ނަޝީދު ކުރައްވާ ކަމެއްކަމަށް ބައެއް ފަރާތްތަކުން ދެކެވެ އެވެ.
ކޮމެންޓު ފޮނުވާ