ޔުނައިޓެޑަށް ފަސޭހަ މޮޅެއް

ޔޫރޮޕާ ލީގުގެ ދެވަނަ ބުރުގައި ރޭ ރެއާލް ސޮސިއެޑާޑް އާ ވާދަކޮށް މެންޗެސްޓަރ ޔުނައިޓެޑް ބޮޑު މޮޅެއް ހޯދިއިފިއެވެ.

އިޓަލީގެ ޓިއުރިންގައި ޔުނައިޓެޑުން ސޮސިއެޑާޑްގެ މައްޗަށް 0-4 ލަނޑުންވަނީ ކުރިހޯދާފައެވެ. މިދިޔަ ސީޒަންގެ ޔޫރޮޕާ ލީގު މުބާރާތުގެ ސެމީފައިނަލްގައި ވާދަކޮށް ސެވިއްޔާ އަތުން ބަލިވި ޔުނައިޓެޑުން ރޭ ސޮސިއެޑާޑް އާ ވާދަކުރި މެޗުގައި އެ ޓީމުން ޖެހި ހަތަރު ލަނޑުގެ ތެރެއިން ފުރަތަމަ ދެ ލަނޑު ޖެހީ ޔުނައިޓެޑްގެ ޕޯޗްގަލް ތަރި ބްރޫނޯ ފެނާންޑެސް އެވެ.

މެޗުގެ 27 ވަނަ މިނެޓްގަ އާއި 57 ވަނަ މިނެޓްގައި ފެނަންޑެސް ޔުނައިޓެޑަށް ލަނޑުޖަހައި ދިންއިރު ތިންވަނަ ލަނޑު މެޗުގެ 64 ވަނަ މިނެޓްގައި ކާމިޔާބުކުރީ މާކަސް ރެޝްފޯޑެވެ. ޔުނައިޓެޑުން ރޭގެ މެޗުގައި ޖެހި ފަހު ލަނޑު މެޗުގެ އެންމެ ފަހުމިނެޓްގައި ކާމިޔާބުކުރީ ޑޭވިޑް ޖޭމްސް އެވެ.

ރޭ މުބާރާތުގައި ވާދަކުރާ އިނގިރޭސި ޓީމުތަކުން ވަނީ ރަނގަޅު ނަތީޖާތަކެއް ހޯދާފައެވެ. ޓޮޓެންހަމުން ރަށުން ބޭރުގައި ވުލްފްސްބާގާގެ މައްޗަށް 1-4 އިން ކުރި ހޯދިއިރު ލެސްޓަރ ސިޓީން ސްލާވިއާ ޕްރާގް އާ ދެކޮޅަށް ރަށުން ބޭރުގައި ކުޅުނު މެޗު ނިމުނީ 0-0 އިން އެއްވަރު ވެގެންނެވެ.