ޔުއޭފާ ޗެމްޕިއަންސް ލީގުގެ ފަހު 16 އިގެ ފުރަތަމަ ލެގްގައި އިންގްލިޝް ޕްރިމިއަރ ލީގުގެ ލިވަޕޫލާއި ޖަރުމަނު ބުންޑަސްލީގާގެ އާރްބީ ލިޕްޒިގް ބައްދަލުކުރި މެޗް ލިވަޕޫލް ކާމިޔާބުކޮށްފިއެވެ.
ކޯވިޑްގެ ސަބަބުން ޖަރުމަނުވިލާތުން އަޅާފައިވާ ފިޔަވަޅުތަކުގެ ސަބަބުން މިމެޗް ކުޅެފައިވަނީ ހަންގޭރީގެ ވެރިރަށް ބުޑަޕެސްޓްގެ ޕުސްކާސް އެރީނާގައެވެ. މިމެޗް ލިވަޕޫލް ކާމިޔާބުކުރީ 2 ލަނޑު ސުންލަނޑުންނެވެ. ލިވަޕޫލް ދަނޑުގައި އަންނަ މަހު 10 ވަނަ ދުވަހު ކުޅޭ ދެ ވަނަ ލެގުގެ މެޗު އެއްވަރުކޮށްލައިގެން ވެސް އެ ޓީމަށް ކުއާޓާގެ ޖާގަ ކަށަވަރުކުރެވޭނެ އެވެ.
މިމެޗްގައި ލިވަޕޫލުން ޖެހި ފުރަތަމަ ލަނޑު މެޗްގެ 53 ވަނަ މިނެޓްގައި ޖަހާދިނީ މުހައްމަދު ސަލާއެވެ. އަދި އޭގެ ފަސް މިނެޓްފަހުން އެޓީމްގެ ދެވަނަ ލަނޑު ޖަހާދިނީ ސާޑިއޯ މާނޭއެވެ. އާންމުކޮށް އިދިކޮޅު ޓީމްތަކަށް ގިނަ އުނދަގޫތަކަކާއި ކުރިމަތި ކުރުވާ ލިޕްޒިގަށް ލިވަޕޫލްގެ ހީނަރުވެފައިވާ ޑިފެންސް ފޫއަޅުވާލެވޭގޮތެއް މިމެޗްގައި ނުވިއެވެ.
މެޗަށްފަހު ވާހަކަ ދައްކަމުން ލިވަޕޫލްގެ ކޯޗް ޔަރގަން ކްލޮޕް ހާމަކުރިގޮތުގައި ޓީމް މިހާރު އޮތް ހާލަތުގެ ސަބަބުން މިމެޗުންވެސް އޭނާގެ ޓީމް ބަލިވާނެ ކަމަށް ގިނަ ބަޔަކު ހީކުރާނެ ކަމަށާއި ނަމަވެސް އޭނާގެ ކުޅުންތެރިން އެގޮތަށް ނުދެކޭ ކަމަށާއި އެކަމާއި އޭނާ އުފާކުރާ ކަމަށެވެ.
ކޮމެންޓު ފޮނުވާ