ޔުއޭފާ ޗެމްޕިއަންސް ލީގުގެ ފަހު 16 ގެ ފުރަތަމަ ލެގްގައި ބާސެލޯނާ އާއި ޕެރިސް ސެއިންޓް ޖަރމައިން ބައްދަލުރި މެޗް ފަސޭހަ ކަމާއެކު ޕީއެސްޖީ ކާމިޔާބުކޮށްފިއެވެ. ބާރސާގެ ދަނޑު، ކޭމްޕް ނޫ ގައި ކުޅުނު މިމެޗް ޕީއެސްޖީ ކާމިޔާބުކުރީ 1-4 ލަނޑު އެއްލަނޑުންނެވެ.
މި ނަތީޖާއާ އެކު ޕީއެސްޖީން ވަނީ މުބާރާތުގެ ކުއާޓާ ފައިނަލުގެ ޖާގައަކާ ގާތަށް ޖެހިލައިފަ އެވެ. އަންނަ މަހު 10 ވަނަ ދުވަހު ޕީއެސްޖީ ދަނޑުގައި ކުޅޭ ދެ ވަނަ ލެގުގެ މެޗުން ބޮޑު ތަފާތަކުން ބަލިވެގެން ނޫނީ ޕީއެސްޖީ މުބާރާތުން ނުކަޓާނެ އެވެ. ޕީއެސްޖީގެ އުއްމީދަކީ ރޭގެ މެޗުގައި އަނިޔާގެ ސަބަބުން ނުކުޅެވުނު ނޭމާ ދެ ވަނަ ލެގަށް ފިޓްވުމެވެ
މެޗްގެ ފުރަތަމަ ލަނޑު މެޗްގެ 27 ވަނަ މިނެޓްގައި ލިބުނު ޕެނަލްޓީ އަކުން ކާމިޔާބުކުރީ ބާރސާގެ ކެޕްޓަން ލިއޮނެލް މެސީއެވެ. މިޕެނަލްޓީއަކީ ބާރސާގެ ފްރޭންކީ ޑި ޖޮންގއަށް ޕީއެސްޖީ ޕެނަލްޓީ އޭރިޔާ ތެރެއިން ފައުލް ކުރުމުން ލިބުނު ޕެނަލްޓީއެކެވެ. އަދި އޭގެ މިނެޓެއް ފަހުން ބާރސާގެ އުސްމާން ޑެމްބެލޭއަށް އެޓީމްގެ ލީޑު ފުޅާ ކުރާނެ ރަނގަޅު ފުރުސަތެއް ލިބި ބޭކާރުވިއެވެ. ޕީއެސްޖީންވަނި ބާރސާއިން ލަނޑު ޖެހިތާ 5 މިނެޓްފަހުން ލަނޑެއް ޖަހާ މެޗްގެ ނަތީޖާ ހަމަހަމަކޮށްފައެވެ. މިލަނޑު އެޓީމަށް ކާމިޔާބުކޮށްދިނީ ރޭގެ މެޗްގައި މޮޅު ކުޅުމެއް ދެއްކި ކައިލިއަން އެމްބާޕޭއެވެ.
މިމެޗްގައި ޕީއެސްޖީން ފުރަތަމަ ފަހަރަށް ލީޑު ނެގީ މެޗްގެ 65 ވަނަ މިނެޓްގައި އެމްބާޕޭ ޖެހި ދެވަނަ ލަނޑާއެކުއެވެ. އަދި އޭގެ ފަސް މިނެޓްފަހުން މޮއިސް ކީން ޖަހާދިން ލަނޑާއެކު ޕީއެސްޖީން އެޓީމްގެ ލީޑު ފުޅާކުރިއެވެ. ޕީއެސްޖީން އެޓީމްގެ ފަހު ލަނޑު ޖަހާފައިވަނީ މެޗްގެ 85 ވަނަ މިނެޓްގައެވެ. މިލަނޑު ޖަހާ އެމްބާޕޭވަނީ މިމެޗްގައި އޭނާގެ ހެޓްރިކް ހަދާފައެވެ. އަދި އޭނާ ވެފައިވަނީ ބާރސާއާއި ދެކޮޅަށް ކުޅެ ޗެމްޕިއަންސް ލީގުގައި ހެޓްރިކް ހެދި ތިންވަނަ ކުޅުންތެރިޔާއަށެވެ. އަނެއް ދެ ކުޅުންތެރިންނަކީ ފައުސްޓީނޯ އަސްޕްރިއްޔާ އާއި އަންދްރެއި ޝެވްޗެންކޯއެވެ.
ބާސެލޯނާގެ ކޯޗު ރޮނާލްޑް ކޫމަން ބުނީ މިއީ ބަލައިގަންނަން އުނދަގޫ ނަތީޖާއެއް ކަމަށާއި އެކަމަކު ކުރަން ހުރި މަސައްކަތް ހުއްޓާލެވެން ނެތް ކަމަށެވެ.
ކޮމެންޓު ފޮނުވާ