ޗެލްސީ ހަތަރު ވަނަ އަށް

އިނގިރޭސި ޕްރިމިއާ ލީގުގައި ރޭ ނިއުކާސަލް ޔުނައިޓެޑް އަތުން 2-0 އިން މޮޅުވެ ޗެލްސީ ލީގުގެ ހަތަރު ވަނަ އަށް ޖެހިލައިފި އެވެ.

ޗެލްސީ އަށް ރޭގެ މެޗުގައި ލީޑުނަގައިދިނީ 31 ވަނަ މިނިޓްގައި އޮލިވިއޭ ޖިރޫޑް އެވެ. ޖިރޫޑް ފުރަތަމަ ހާފުގައި ކުޅެން އެރީ ޗެލްސީގެ ޓެމީ އަބްރަހަމް އަށް އަނިޔާވުމުން އޭނާގެ ބަދަލުގަ އެވެ. އޭގެ އަށް މިނިޓް ފަހުން ޗެލްސީގެ ދެ ވަނަ ގޯލު ޖެހީ ޓިމޯ ވާނާ އެވެ. މިއީ އެންމެ ފަހުން ޗެލްސީން ލީގުގައި ކުޅުނު 14 މެޗަށް ފަހު ވާނާ ޖެހި ފުރަތަމަ ގޯލެވެ. ރޭގެ ކުރިން ލީގުގައި ވާނާ އެންމެ ފަހުން ގޯލެއް ޖެހީ މިދިޔަ ނޮވެމްބަރު މަހުގަ އެވެ. އެއީ ލީގުގެ ފުލުގައި އޮތް ޝެފީލްޑާ ދެކޮޅަށެވެ.

މިނަތީޖާ އެކު އެއް ވަނައިގައި އޮތް މެންޗެސްޓާ ސިޓީ އަށް 23 މެޗުން 53 ޕޮއިންޓް ލިބިފައިވާއިރު، ދެ ވަނައިގައި އޮތް މެންޗެސްޓާ ޔުނައިޓެޑާއި ތިން ވަނައިގައި އޮތް ލެސްޓާ ސިޓީ އަށް ވަނީ 24 މެޗުން 46 ޕޮއިންޓް ލިބިފަ އެވެ. ހަތަރެއްގައި އޮތް ޗެލްސީ އާއި ފަސް ވަނައިގައި އޮތް ވެސްޓް ހޭމް އަށް 24 މެޗުން ވަނީ 42 ޕޮއިންޓް ލިބިފަ އެވެ.

ހަ ވަނައިގައި އެންމެ ފަހުގެ ޗެމްޕިއަން ލިވަޕޫލް އޮތީ 24 މެޗުން 40 ޕޮއިންޓް ހޯދައިގެންނެވެ.