ބަޔާން އެއްވަރުވެ ފަރަގު ކުޑަވެއްޖެ

ޖަރުމަނު ބުންޑަސްލީގާގައި އެންމެފަހުގެ ޗެމްޕިއަން ބަޔޭން މިޔުނިކާއި އާމީނިއާ ބިއެލްފެލްޑް ބައްދަލުކުރިމެޗް އެއްވަރު ވެއްޖެއެވެ.

ބަޔާންގެ އެލިޔާންޒް އެރީނާގައި ކުޅުނު މިމެޗް އެއްވަރުވީ 3-3 ލަނޑުންނެވެ. ފީފާ ކްލަބް ވާރލްޑް ކަޕް ކާމިޔާބު ކުރިފަހުން ބަޔާން ލީގުގައި ކުޅުނު ފުރަތަމަ މެޗްގައި އެޓީމްގެ ފެށުން އެހާ ރަނގަޅެއް ނުވިއެވެ. މިގޮތުންގެ މެޗްގެ ފުރަތަމަ ހާފް އެޓީމް ނިންމާލީ 2 ލަނޑު ސުންލަނޑުން ފަހަތުގައި އޮވެގެންނެވެ. މިމެޗްގެ ފުރަތަމަ ލަނޑު ބިއެލްފެލްޑްއިން ކާމިޔާބުކުރީ މެޗްގެ 9 ވަނަ މިނެޓްގައި މައިކަލް ވްލެޕްއެވެ. އަދި މެޗްގެ 37 ވަނަ މިނެޓްގައި ބިއެލްފެލްޑްއިންވަނީ އެޓީމްގެ ލީޑު ފުޅާ ކޮށްފައެވެ. މިލަނޑު އެޓީމަށް ޖަހާދިނީ އާމޮސް ޕިއެޕަރއެވެ.

މިމެޗްގައި ބަޔާންއިން ޖެހި ފުރަތަމަ ލަނޑު މެޗްގެ 48 ވަނަ މިމެޓްގައި ޖަހާދިނީ ރޮބަޓް ލެވަންޑޯސްކީއެވެ. ނަމަވެސް ބިއެލްފެލްޑްއިން ވަނީ އޭގެ އެއްމިނެޓް ފަހުން ލަނޑެއް ޖަހާ އަލުން ދެ ގޯލްގެ ލީޑު ނަގާފައެވެ. މިލަނޑު އެޓީމަށް ކާމިޔާބުކޮށްދިނީ ކްރިސްޓިއަން ގެބައުއަރއެވެ. މިމެޗްގައި ބަޔާންގެ ދެވަނަ ލަނޑު މެޗްގެ 57 ވަނަ މިނެޓްގައި ޖަހާދިނީ ކޮރެންޓިން ޓޮލީސޯއެވެ. އަދި މެޗްގެ ނަތީޖާ ހަމަހަމަކުރި ލަނޑު މެޗްގެ 69 ވަނަ މިނެޓްގައި ޖަހާދިނީ އަލްފަންސޯ ޑެވިސްއެވެ.

މިމެޗް އެއްވަރު ވުމުން ޕޮއިންޓް ތާވަލްގެ އެއްވަނައިގާ ބަޔާންއަށް ލިބިފައިވާ ލީޑު މިހާރުވަނީ ފަސް ޕޮއިންޓަށް ކުޑަވެފައެވެ. އެއީ ކުޅުނު 21 މެޗުން ލިބިފައިވާ 49 ޕޮއިންޓާއެކުއެވެ. ދެވަނައިގާ އުޅޭ އާރްބީ ލިޕްޒިގަށް ލިބިފައިވަނީ 21 މެޗުން 44 ޕޮއިންޓެވެ. މި ނަތީޖާއާއެކު ބިއެލްފެލްޑް މިހާރު އުޅެނީ 20 މެޗުން ލިބިފައިވާ 18 ޕޮއިންޓާއެކު ތާވަލްގެ 16 ވަނައިގައެވެ.