ކޮރަލް މަތިވެރި ފުޓްސަލް ލީގު ވޭލިއަންޓުން ކާމިޔާބުކޮށްފި

ކޮރަލް މަތިވެރި ފުޓްސަލް ލީގުގެ ފުރަތަމަ މުބާރާތުގެ ޗެންޕިއަންކަން ވޭލިއަންޓު ހޯދައިފިއެވެ.

މުބާރާތުގެ ފަހު މެޗާއި ހަމައަށް އައިއިރު ލީގު ކަށަވަރުކުރާނެކަން ބެލެވުނު ވޭލިއަންޓުން މުބާރާތް ކާމިޔާބުކޮށްފައިވަނީ 19 ޕޮއިންޓާއިއެކުގައެވެ. ލީގު އުސޫލުން ކުރިއަށް ދިޔަ މިމުބާރާތަކީ 3 ބުރަކަށް ބަހާލައިގެން ލީގު އުސޫލުން ކުރިއަށް ގެންދެވުނު ފޯރިގަދަ މުބާރާތެކެވެ. ލީގުގެ މެޗުތައް ދިޔަ ގޮތުން މުބާރާތުގެ ފޭވަރިޓުންގެ ގޮތުގައި ގިނަ ބަޔަކު ދެކުނީ ވެލި ބީޗެވެ. ނަމަވެސް ލީގުގެ ފަހު ބުރުގައި ގެނައި ޓްރާސްފާތަކާއިއެކު ހުރިހާ ޓީމަކުން ކުޅުން ރަނގަޅުކޮށް އާދަޔާއި ޚިލާފް ނަތީޖާތަކެއް ފަހު ބުރުގައި ވަނީ ފެނިގެން ގޮސްފައެވެ.

މުބާރާތުގެ ޗެންޕިއަންކަން ނުލިބުނު ނަމަވެސް މި މުބާރާތުގައި އެންމެ ބަލާހިތްވާކަހަލަ ކުޅުމެއް ދައްކާފައިވަނީ ބެލި ބީޗުންނެވެ. މިމުބާރާތަކީ މަތިވެރީގެ ޒުވާން ހުނަވެރި ކުޅުންތެރިންނަށް ގިނަ ފުރުސަތުތަކެއް ތަނަވަސްވެގެންދިޔަ އުންމީދީ ކުޅުންތެރިންތަކެއް ފެނިގެންދިޔަ މުބާރާތެކެވެ. މުބާރާތުގެ ތެރެއިން ފާހަގަވި ޒުވާން ކުޅުންތެރިނަކީ ކުރިއަށް ހުރި މުބާރާތްތަކުގައި ޓީމުތަކުން ފާރަލަމުންދާ ކުޅުންތެރިންނެވެ.

މަތިވެރީގައި އުފެދުނު މޮޅެތި ކުޅުންތެރިންތަކުގެ ތެރޭގައި ހިމެނޭ ފާއްޓެ، ފައްލޯ، އެންޑީ ފަދަ މޮޅެތި ކުޅުންތެރިން މަތިވެރިން އުފެދިގެންދާކަން މިމުބާރާތުން ވަނީ ފެނިގެން ގޮސްފައެވެ. މުބާރާތުގެ ޗެންޕިއަންޓީމަށް ޝީލްޑް ހަވާލު ކޮށްދެއްވީ ފައިނަލް މެޗުގެ ޝަރަފްވެރި މެހުމާން ކޮރަލްގެ މެނޭޖިންގ ޑިރެކްޓަރ މުހައްމަދު ނިހާދުއެވެ.

މުބާރާތް ނިންމުމަށް ބޭއްވި ރަސްމިއްޔާތުގައި މުބާރާތުގެ އެކި ވަނަތަކަށް ހޮވުނު ކުޅުންތެރިންނަށާއި ޓީމުތަކަށް ވަނީ އިނާމު ހަވާލުކޮށްފައެވެ. މިމުބަރާތަކީ މަތިވެރީގެ ޒުވާނުންގެ މެދުގައި ކުޅިވަރަށް އޮންނަ ލޯބި އިތުރުކޮށް، ޒުވާނުންގެ މެދުގައި އޮންނަ ގުޅުން ބަދަހި ކުރުމެވެ. މި މުބާރާތް ދެން ކޮންމެ އަހަރަކު ބޭއްވުމަށް ވަނީ ހަމަޖެހިފައެވެ. އަދި ކުރިއަށް ގެންދާނީ ލީގު އުސޫލުންކަމަށް މުބާރާތް އިންތިޒާމު ކުރާ ފަރާތުން މައުލޫމާތު ދީފައިވެއެވެ.

މިމުބާރާތަކީ އއ.މަތިވެރި މަތިވެރީ އެސޯސިއޭޝަން ފޮރ ރެކްރިއޭޝަން އެން ސްޕޯޓްސް (މާރންސް) އަދި އަންބަރު ގްރޫޕުން ގުޅިގެން ލީގު އުސޫލުން ކުރިއަށް ގެންދާ 3 ލެގުގެ މުބާރާތެކެވެ. މަރިވެރި އަންބަރު ގްރޫޕް އަދި މަތިވެރި އެސޯސިއޭޝަން ފޮރ ރެކްރިއޭޝަން އެން ސްޕޯޓްސް (މާރންސް) އެރަށުގެ އިޖުތިމާއީ، އަދި ތަރައްޤީގެ ގިނަ ކަންކަމުގައިވެސް އަމަލީގޮތުން ބައިވެރިވާ އެރަށުގެ ޒުވާނުން ހިމެނޭ ދެ ގްރޫޕެކެވެ. ރަށުގެ ތަރައްޤީގެ ކަންކަމުގެ އިތުރުން ޒުވާނުންގެ ތަރައްޤީއަށްޓަކައިވެސް ދަނީ ގިނަ މަސައްކަތްތަކެއް ކުރަމުންނެވެ. މަތިވެރީގައި ހިންގޭ ގިނަ ތަރައްޤީގެ ކަންކަމުގައިވެސް މި ދެ ގްރޫޕުގެ ޝާމިލުވުންބޮޑެވެ. އަމިއްލަ އިސްނެގުމަށްވެސް ރަށުގެ ކުރިއެރުމަށް މި ދެ ގްރޫޕުންވަނީ މުހިންމު މަސައްކަތް ތަކެއްކޮށްފައެވެ.

މަތިވެރީގެ ޒުވާނުންނާއި ރަށުގެ އިޖުތިމާއީ ކަންކަން ދިރުވައި އާލާކުރުމަށް ކުރިއަށް އޮތް ތަނުގައިވެސް ގިނަ މަސައްކަތްތަކެއް ކުރުމަށް މި ދެގްރޫޕޫން ވަނީ ގިނަ ކަންތައްތަކެއް ރާވާފައެވެ. ކޯވިޑް-19 އާއި ގުޅިގެން ކުރަންރޭވި ގިނަ ކަންތައްތަކެއް މަޑު ޖެހުނު ނަމަވެސް އަނެއްކާވެސް އެމަސައްކަތް ކުރުމަށް ދަނީ މަސައްކަތް ކުރަމުންނެވެ.

މަރިވެރި އަންބަރު ގްރޫޕް އަދި މަތިވެރި އެސޯސިއޭޝަން ފޮރ ރެކްރިއޭޝަން އެން ސްޕޯޓްސް (މާރންސް) އަކީ މަތިވެރީގައި ކުޅިވަރު މުބާރާތްތަކުގެ އިތުރުން ޤުރުއާން މުބަރާތްތަކާއި، މަދަހަ މުބާރާތްތަކާއި، އެކި އުމުރުފުރާތަކަށް ހޭލުންތެރިކަމުގެ ގިނަ ޕްރޮގުރާމުތައް ހިންގަމުންދާ ދެ ގްރޫޕެކެވެ.

މިމުބާރާތުގެ މެއިން ސްޕޮންސާއަކީ ކޮރަލް ޓްރާންސްފާއެވެ. ކޯ ސްޕްންސާއަކީ ކެޕްޓަން މޯލްޑިވްސް އަދި ހަބޭސް ބޮޑުބެރު ގްރޫޕެވެ. ބެވަރޭޖް ޕާޓްނާއަކީ ސެކަންޑްހޯމް ރެސްޓޯރެންޓެވެ. މުބާރާތުގެ މީޑީޔާ ޕާޓްނާއަކީ ޚަބަރު އޮންލައިން އެވެ.