ފަހަތުން އަރައި ލިވަޕޫލް ބަލިކޮށް ލެސްޓާ ދެ ވަނައަށް

އިނގިރޭސި ޕްރިމިއާ ލީގުގައި ލެސްޓާ ސިޓީ އިން ފަހަތުން އަރައި ލިވަޕޫލް 3-1 އިން ބަލިކޮށްފި އެވެ.

މެޗުގެ ފުރަތަމަ ހާފުގައި ލިވަޕޫލުން ވަނީ މޮޅު ކުޅުމެއް ދައްކާފަ އެވެ. އެކަމަކު މި ހާފުގެ ފަހުކޮޅު ލެސްޓާގެ ޖެމީ ވާޑީ އަށް ގޯލު ޖަހާނެ ހުސް ދެ ފުރުސަތެއް ލިބި ބޭކާރުވި އެވެ. މެޗުގެ ދެ ވަނަ ހާފުގައި ލިވަޕޫލަށް ލީޑު ނަގައިދިނީ މުހައްމަދު ސަލާހް އެވެ. ރޮބާޓޯ ފިރްމީނޯގެ އެހީތެރިކަމާ އެކު ސަލާހް ޖެހި މި ގޯލަކީ ލީގުގައި އޭނާ ކާމިޔާބުކުރި 17 ވަނަ ގޯލެވެ.

ލިވަޕޫލަށް ޕްރެޝަރުވީ ލެސްޓާގެ ޖޭމްސް މެޑިސަން ހިލޭ ޖެހުމަކުން މެޗުގެ ނަތީޖާ ހަމަހަމަ ކުރުމުންނެވެ. އޭގެ އިރުކޮޅެއް ފަހުން ލެސްޓާއަށް ލީޑު ނަގައިދިން ގޯލު ވާޑީ ޖެހީ ލިވަޕޫލްގެ ގޯލްކީޕަރު އެލިސަން ބެކާ އަށް ހެދުނު ބޮޑު ގޯހަކުންނެވެ. މަތިން ވެއްޓުނު ބޯޅަ ހޯދުމަށް އަރައި ސާފުކޮށްލަން އެލިސަން ފޮނުވާލި ބޯޅަ ލިބުނީ ސީދާ ވާޑީ އަށެވެ. އެ ބޯޅަ ވާޑީ ގޯލަށް ފޮނުވާލިއިރު ލިވަޕޫލްގެ އެއްވެސް ކުޅުންތެރިއަކު އޭރިޔާ ތެރޭގައި ނެތެވެ. ލެސްޓާ އަށް ލީޑު ފުޅާކޮށްދިން ލަނޑު ޖަހައިދިނީ ހާވީ ބާންސް އެވެ.

މެޗުން ބަލިވުމުން ލީގުގައި ލިވަޕޫލް މިހާރު އޮތީ 24 މެޗުން ލިބުނު 40 ޕޮއިންޓާ އެކު ހަތަރު ވަނާގަ އެވެ. ލެސްޓާ ވަނީ 46 ޕޮއިންޓާ އެކު ތާވަލުގެ ދެ ވަނައަށް ކުރިއަށް ޖެހިލާފަ އެވެ.