މިދިޔަ އަހަރު އޭޕްރިލް މަހު މަރުވި ބޮލީވުޑްގެ ކުޅަދާނަ އެކްޓަރ ރިޝީ ކަޕޫރުގެ ކޮއްކޮ ރަޖީވް ކަޕޫރު (ޗިމްޕޫ) ހާޓް އެޓޭކެއް ޖެހިގެން މަރުވެއްޖެ އެވެ.
އުމުރުން 58 އަހަރުގެ ރަޖީވް މަރުވީ މިއަދު ހެނދުނު އޭނަގެ ގޭގައި ހުއްޓާ ހާޓްއެޓޭކެއް ޖެހިގެން ހޮސްޕިޓަލަށް ގެންދިޔަ ފަހުން ކަމަށް ރިޕޯޓްތައް ބުނެއެވެ. ރަޖީވް ކަޕޫރަކީ ލެޖެންޑަރީ އެކްޓަރ ރާޖް ކަޕޫރުގެ 5 ދަރިންގެ ތެރެއިން އެންމެ ހަގު މީހާއެވެ. އެއާއިލާގައި މިހާރު ދުނިޔޭގައި ތިބީ އެންމެ ދޮށީ ރަންދިރް ކަޕޫރާއި 4 ވަނައަށް ހުންނަ ރީމާ ކަޕޫރެވެ.
ރަޖީވް މަރުވިކަން އެންމެ ފުރަތަމަ ހާމަކުރީ އޭނަގެ ބޭބެ ރިޝީ ކަޕޫރުގެ ހުވަފަތް އަންހެނުން ނީތޫ ސިންގް އިންސްޓަގްރާމްގައި ކުރި ޕޯސްޓެއްގައެވެ.
View this post on Instagram
ރަޖީވްގެ ދެ ބޭބެ ރިޝީ ކަޕޫރާއި ރަންދިރް ކުޅުނު އަދަދަށް ފިލްމުތައް ނުކުޅުނު ނަމަވެސް ރަޖީވް އަކީވެސް އެކްޓަރެކެވެ. ރަޖީވްގެ އެންމެ ކާމިޔާބު ފިލްމެއްގެ ގޮތުގައި ފާހަގަވަނީ 1985 ވަނަ އަހަރުގެ ފިލްމް "ރާމް ތޭރީ ގަންގާ މޭލީ" އެވެ. މިއީ މި އެންމެންގެ ބައްޕަ ރާޖް ކަޕޫރު އުފެއްދި ފިލްމެކެވެ.
މީގެ އިތުރުންވެސް "އޭކް ޖާން ހެ ހަމް"، "އާސްމާން"، "ލަވަ ބޯއި" އަދި "ޒަބަރްދަސްތު" ފަދަ ފިލްމުތަކުން ރަޖީވް ވަނީ ފެނިގެންގޮސްފައެވެ. އޭނާ އެންމެ ފަހުން ފެނިގެންދިޔައީ 1990ގެ ފިލްމު "ޒިއްމޭދާރް" އިން ނެވެ.
ރަޖީވްގެ ކުއްލި މަރާ އެކު އިންޑިއާގެ ފިލްމު އިންޑަސްޓްރީން ގެންދަނީ ހިތާމަ ފާޅުކުރަމުންނެވެ. ގިނަ ފަންނާނުން ތަކެއް ސޯޝަލް މިޑިއާގައި މިކަމުގެ ހިތާމައިގާ ޝުޢޫރު އަންނަނީ ފާޅުކުރަމުންނެވެ.
ފާއިތުވީ އަހަރެއްހާ ދުވަހުގެ ތެރޭގައި ކަޕޫރު އާއިލާއިން 3 މީހުން ވަކިވެގެން ދިއުމާއެކު މުޅި އެ އާއިލާއަށްވެސް ވަނީ ފުން ހިތާމައެއް ކުރިމަތިވެފައެވެ. ރިޝީ ކަޕޫރު މިދިޔަ އަހަރުގެ އެޕްރީލް 30 ވަނަ ދުވަހު މަރުވެފައި ވާއިރު، ރަޖީވް އާއި ރިޝީގެ ދައްތަ ރީތޫ ނަންތާ ވަނީ މިދިޔަ އަހަރުގެ ޖަނަވަރީމަހުގެ 14 ވަނަ ދުވަހު މަރުވެފައެވެ.
