މެޑްރިޑް މޮޅުވެ ދެވަނައަށް

ސްޕެނިޝް ލަލީގާގައި ރެއާލް މެޑްރިޑް މޮޅުވެ ތާވަލުގެ ދެވަނައަށް ކުރިޔަށް ޖެހިލައިފިއެވެ.

ރަށުން ބޭރުގައި ކުޅުނު މެޗުން ހެއުސްކާ އަތުން މެޑްރިޑް މޮޅުވީ 2-1 ލަނޑުންނެވެ. މެޗުގެ ފުރަތަމަ ލަނޑު ދެވަނަހާފް ފަށައިގެން ތިންވަނަ މިނިޓް ތެރޭގައި ހެއުސްކާގެ ޖާވީ ވަނީ ޖަހައި ލީޑު ނަގާފައެވެ. ފަހަތުން އަރައި މެޑްރިޑުންވަނީ ހެއުސްކާގެ ކޮޅަށް ދެގޯލު ޖަހާފައެވެ. މެޑްރިޑުގެ ދެ ލަނޑުވެސް އެޓީމަށް ކާމިޔާބުކޮށްދިނީ ރަފޭލް ވެރާނޭއެވެ. ތާވަލުގެ ފުލުގައި އޮތް ހެއުސްކާ ދެކޮޅަށް ކުޅުނުމެޗުގައި މެޑްރިޑުގެ ކަރިމް ބެންޒީމާއަށް ވެސް ވަނީ ލަނޑުޖަހާނެ ފުރުސަތު ލިބި ނަގާލާފައެވެ.

މިއީ މިސީޒަނުގައި ލީގުގައި މެޑްރިޑު ކުޅުނު 21 މެޗުން ހޯދި 13 ވަނަ މޮޅެވެ. ހެއުސްކާ ލީގުގައި މިހާތަނަށް 21 މެޗު ކުޅުނު އިރު މޮޅެއް ހޯދިފަވަނީ އެންމެ ދެ މެޗުންނެވެ. ރޭ ލީގުގައި ކުޅުނު އެހެން މެޗުތަކަށް ބަލާއިރު ރަށުން ބޭރުގައި އެލްޗޭ އަތުން ވިޔަރެއާލް ވަނީ 2-2 ލަނޑުން އެއްވަރުވެފައެވެ. ސެވިއްޔާ ވަނީ އަމިއްލަ ދަނޑުގައި ގަޓާފޭ އަތުން މޮޅުވެ ތާވަލުގެ ތިންވަނައަށް ކުރިޔަށް ޖެހިލާފައެވެ.

ލީގުގެ ރޭގެ ނަތިޖާ ތަކާއެކު ރެއާލް މެޑްރިޑް ދެވަނައިގަ އޮތީ އެއްވަނައަގަވާ އެތުލިޓިކޯއަށް ވުރެ 7 ޕޮއިންޓް މަދުން ހޯދައިގެން 43 ޕޮއިންޓާއެކުއެވެ. ސެވިއްޔާ ތިންވަނައިގަ އޮތީ ހަތަރުވަނައިގަވާ ބާސެލޯނާ ވުރެ 2 ޕޮއިންޓް އިތުރަށް ހޯދައިގެން 42 ޕޮއިންޓާއެކުއެވެ. ރޭ ކުޅުނު މެޗު އެއްވަރުވުމުން ވިޔަރެއާލް އޮތީ 36 ޕޮއިންޓާއެކު ތާވަލުގެ ފަސްވަނައިގައިއެވެ.