ސުދާންގެ ސަރުކާރުން، އެގައުމުގައި ވަކިވެގަތުމަށް މަސައްކަތްކުރި ހަގުރާމަވެރި ޖަމާއަތްތައް ތަމްސީލުކުރާ، އެޖަމާއްތަކުގެ ބައެއް އިސްވެރިންނަށް އަގައުމުގައި އޮތް އިންތިގާލީ ސަރުކާރުގެ ބައެއް އިސް މަގާމްތަކެއް ދީފިއެވެ.
ހަގުރާމަވެރި ޖަމާއަތްތަކުގެ ވެރިންނަށް ސަރުކާރުގެ އިސްމަގާމްތަކެއް ދީފައިވަނީ، އިންތިގާލީ ސަރުކާރުން އެ ޖަމާއްތަތްކާއެކު ފާއިތުވެދިޔަ އަހަރު ވެފައިވާ އެއްވަސް ވުމާއި އެއްގޮތަށެވެ.
2019 ވަނަ އަހަރު، ސޫދާނުގައި ހިގި ބޮޑެތި މުޒާހިރާތަކާ ގުޅިގެން އެގައުމުގެ އަސްކަރިއްޔާއިން، ދިގު ޒަމާންތަކެއް ވަންދެން އެގައުމުގައި ވެރިކަން ކުރި، އުމަރު އަލް-ބަޝީރު މަގާމުން ދުރުކުރުމަށްފަހު، ސޫދާން ގެންދަނީ ޑިމޮކްރަޓިކް ވެރިކަމަކަށް ރުޖޫއަވެ، އަދި މީގެކުރިން ހަގުރާމަ ހިގި ސަރަހައްދުތަކުގައި ސުލްޙަ ގާއިމް ކުރުމަށް ގިނަގުނަ މަސައްކަތްތަކެއް ކުރަމުންނެވެ.
ސޫދާންގެ ސްޓޭޓް ނިއުސް އޭޖެންސީން އާމުން ކޮށްފައިވާ ސްޓޭޓްމަންޓެއްގައި، ސޫދާނުގެ ގަވަރނިންގ ބޮޑީ، ސޮވެރިންގ ކައުންސިލުން ބުނެފައިވަނީ، އެކައުންސިލުން ވަނީ، ސޫދާން ލިބަރޭޝަން މޫވްމަންޓްގެ ލީޑަރ އަލާދީ އިދުރީސް ޔެހިއާއާއި، ބްލޫ ނައިލް ސްޓޭޓްގެ ސޫދާންގެ ޕީޕލަސް ލިބަރޭޝަން މޫވްމަންޓް-ނޯތު ފެކްޝަންގެ ލީޑަރ މާލިކް އަގަރުގެ އިތުރުން ސޫދާން ލިބަރޭޝަން ފޯސްގެ ރައީސް އަބޫ ބަކު ހަގަރުވެސް އެކައުންސިލަށް މިހާރު އައްޔަން ކޮށްފައެވެ.
މި ހުރިހާ ޖަމާއަތަކީވެސް، ފާއިތުވެދިޔަ އަހަރު ސޫދާންގެ އިންތިގާލީ ސަރުކާރުން ސޮއިކޮށްފައިވާ، ހުޅަގު ދަރުފޫރާއި، އުތުރު ކޮރދޮފާންއާއި، އަދި ބުލޫ ނެއިލް ސަރަހައްދުގެ ހަގުރާމަވެރި ޖަމާއަތްތައް އެކުވެގެން އުފައްދާފައިވާ، ސޫދާން ރިވޮލިއުޝަނަރީ ފްރޮންޓްގައި ހިމެނޭ ޖަމާއަތްތަކެވެ.
ވަކިވެގަތުމަށް ހަގުރާމަކުރި ޖަމާއަތްތަކުގެ އިސްވެރިން، ވެރިކަން ކުރާ ސޯވެރިންގ ކައުންސިލާ ގުޅިވަޑައިގެންނެވިއިރު، ބަޝީރުގެ ސަރުކާރު ބަދަލު ކުރުމަށް މެދުނުކެޑި މުޒާހިރާ ކުރިން އިސްފަރާތްތަކާ އެގައުމުގެ އަސްކަރިއްޔާ ގުޅިގެން އުފައްދާފައިވާ މިކައުންސިލްގައި މިހާރުވެސް 11 މެމްބަރުން ތިބެއެވެ.
ސޫދާންގެ ފާރ-ފްލަންގ ޕްރޮވިންސްގައި، ވަކިވެގަތުމަށް ހަގުރާމަކުރި ޖަމާއަތްތަކާ ވާހަކަ ދައްކައިގެން އެއްބަސްވުމަކަށް އައުމަކީ، ސޫދާންގެ އިންތިގާލީ ސަރުކުރުގެ ވަރަށް މުހިންމު އަމާޒަކަށް ފާއިތުވެދިޔަ ތަނުގައި ވަނީ ވެގެން ގޮސްފައެވެ. އެތައް އަހަރެއްވަންދެން އެކަހެރި ކުރެވިފައި އޮތް ސޫދާނުން އެގައުމުގެ ހަގުރާމަވެރި ޖަމާއަތްތަކާ އެކީ އެކުލަވާލި މިއެއްބަސްވުމަށް ބައިންލަ އަގުވާމީ މަސްރަހުންވަނީ ވަރަށް ހޫނު މަރުހަބާއެއް ކިޔާފައެވެ.
އެހެންނަމަވެސް، ސުދާން ސަރުކާރަށް ވަނީ، ބައެއް މުހިންމު ހަގުރާމަވެރި ޖަމާއަތްތައާއެކީ ސުލްހަ ވުމުގައި ނާކާމިޔާބު ވެފައެވެ. މީގެތެރޭގައި، އަބުދުލް-އަޒީޒު އަލް-ހިލުގެ ލީޑަރުކަމުގެ ދަށުގައިވާ، އެގައުމުގެ އެންމެ ބޮޑު ހަގުރާމަވެރި ޖަމާއަތް ކަމުގައިވާ، ސޫދާން ލިބަރޭޝަން މޫވްމަންޓް-ނޯތު އާއި، އަދި އަބުދުލް-ވާހިދު ނޫރު ލީޑަރުކަން ކުރާ ސޫދާން ލިބަރޭޝަން މޫވްމަންޓް-އާރމީ ހިމެނެއެވެ.
ފާއިތުވެދިޔަ އަހަރުގެ އޮކްޓޯބަރ މަހު، އެތައް ދުވަހުގެ މަޝްވަރާތަކަށްފަހު، އުތުރު ސޫދާންގެ ވެރިރަށް ޖޫބާގައި، ހަގުރާމަވެރި ޖަމާއަތްތަކާއެކު މިކުރެވުނު އެއްބަސްވުމުގައި ވާގޮތުން، ދެކުނުގެ ޕްރޮވިންސެއް ކަމުގައިވާ ބުލޫ ނީލް އަށާއި ކޯރޑޮފާންގެ ހުޅަގާއި ދެކުނުގެ ސަރަހަދަށް ސަރަހައްދީ މިނިވަންކަން ދިނުމަށް ވަނީ އެއްބަސް ވެފައެވެ. އަދި މީގެ އިތުރުން، މިއެއްބަސްވުމުގައި ވާގޮތުން، މިޖަމާއްތަކުގެ ހަގުރާމަވެރިން، ސޫދާންގެ އަސްކަރިއްޔާގައި ހިމެނުމަށް މިޖަމާއަތްތަކުން ވަނީ އެއްބަސް ވެފައެވެ.
އަދި މިއެއްބަސްވުމުގައި ވާގޮތުން، ހަގުރާމަވެރި މަޖަމާއަތްތަކަށް، ސޫދާންގެ ކެބިނެޓުންވެސް ޖާގަލިބިގެން ދާއިރު، އުފެއްދުމަށް ހަމަޖެހިފައިވާ، އިންތިގާލީ ގާނޫނު ހަދާ މަޖިލީހުން 75 ގޮޑިއެއް މިޖަމާއަތްތަކަށް ޚާއްސަ ކުރެވިގެން ދާނެއެވެ.
ސޫދާންގެ ގައުމީ ނޫސް އޭޖެންސީ ސުނާ އިން ހާމަ ކޮށްފައިވާ ގޮތުގައި، އެގަމުގެ ކެބިނެޓަށް އަންނަ ހަފްތާގައި ބޮޑެތި ބަދަލުތަކެއް އަންނާނެއެވެ.
