އުއްމީދުކުރަނީ ކޮންމެވެސް އެއް މުބާރާތަކުން ތަށި ހޯދަން: ފާސިރު

މި ސީޒަނުގައި ކްލަބް ވެލެންސިއާގެ އަމާޒަކީ ކޮންމެ ވެސް އެއް މުބާރާތެއްގެ ތަށި ހޯދުން ކަމަށް އެ ޓީމުގެ ފޯވާޑް އަލީ ފާސިރު (ސެންޓޭ) ބުނެފި އެވެ.

މަޝްހޫރު ގިނަ ކުޅުންތެރިންނާ އެކު ވެލެންސިއާ މި ވަގުތު އޮތުމަކީ ތަށި ހޯދަން އޮތް ޕްރެޝަރެއްތޯ ސުވާލުކުރުމުން ސެންޓޭ ބުނީ ވެލެންސިއާގައި ތިބި ތަޖުރިބާކާރު ކުޅުންތެރިންނަކީ މިދިޔަ އަހަރުތަކުގައި ވެސް އެކަން ތަޖުރިބާކޮށްފައި ތިބި ކުޅުންތެރިން ކަމަށެވެ.

މެޗަށް ފަހު އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުން ސެންޓޭ ބުނީ ރަނގަޅު ކުޅުމެއް ދައްކައި ވެލެންސިއާގެ އަމާޒަކީ މި ސީޒަނުގައި ތަށްޓެއް ހޯދުން ކަމަށެވެ. ޓީސީ ސްޕޯޓްސް ކްލަބް އަތުން 2-0 މޮޅުވެ، ވެލެންސިއާ ވަނީ ލީގުގެ ދެ ވަނަ އަށް ޖެހިލައިފައެވެ. މެޗުގެ މޮޅު ކުޅުންތެރިއަކަށް ހޮވުނީ ވެލެންސިއާ އަށް ފުރަތަމަ ގޯލު ޖަހައިދިން ސެންޓޭ އެވެ.

އުއްމީދުކުރަނީ (މި ސީޒަނުގެ) ތިން މުބާރާތުން ކުރެ ކޮންމެ ވެސް އެއް މުބާރާތަކުން ތަށި ހޯދަން. ސީނިއާ ހަތަރު ފަސް ކުޅުންތެރިން މި ތިބީ ވެލެންސިއާގައި އެހެންވީމަ ތަށްޓަށް ވާދަކުރާއިރުގައި އިތުރަކަށް ޕްރެޝަރަކަށް ނުވާނެ ކުޅުންތެރިން މިއީ.

– ރާއްޖޭގެ މޮޅު ކުޅުންތެރިޔާގެ މަގާމު ދެ ފަހަރެއްގެ މަތިން ހޯދި ސެންޓޭ ބުނެފައިވެއެވެ.

ސެންޓޭ ބުނީ އެންމެ ފަހުން މެޗުތަކުގެ ނަތީޖާ އެ ގޮތަށް ނުކުތުމުން ހުރިހާ ކުޅުންތެރިން އެކައްޗެއް ކިޔައިގެން މިއަދުގެ މެޗަށް ނުކުތީ މޮޅަކަށް ކަމަށެވެ. ސެންޓޭ ބުނީ ހަތަރު ދުވަހުން ކަހަލަ ގޮތަކަށް މެޗެއް ކުޅެން ޖެހިފައިވާއިރު ޕްރެކްޓިހަށް ވުރެ ބޮޑަށް އިސްކަންދެނީ ރިކަވަރީ އަށް ކަމަށާއި އަނިޔާއެއް ނުވެ ގިނަ މެޗުތަކެއްގައި ކުޅެން ބަލާއިރު ރަނގަޅު ރިކަވަރީ އެއް ވަރަށް މުހިއްމު ކަމަށެވެ.

ދެ ވަނައިގައި އޮތް ވެލެންސިއާ އަށ 15 ޕޮއިންޓް ވަނީ ލިބިފަ އެވެ.