ކްލަބްގެ މެނޭޖްމަންޓަށް އޭނާ ހުށަހެޅި ޓްރާންސްފާ ލިސްޓުގައި ނެތް ކުޅުންތެރިއަކު ސޮއިކުރުމުން މާސޭގެ ކޯޗު އަންދްރެސް ވިލަސް ބޮއަސް މަގާމުން އިސްތިއުފާދީފި އެވެ.
ވިލަސް ބޮއަސް ހިތްހަމަނުޖެހުނު ސަބަބަކީ އޭނާގެ ޕްލޭނުގައި ހިމެނޭ މުހިއްމު ކުޅުންތެރިއެއް ކަމަށްވާ މޯގަން ސެންސޮން އެސްޓަން ވިލާ އަށް 21 މިލިއަން ޑޮލަރަށް ވިއްކާލުމަށް ފަހު ބަދަލުގައި ރަނގަޅު ކުޅުންތެރިއެއް ގަންނަން ހަރަދުކުރަން ކްލަބްގެ މެނޭޖްމަންޓުން ދެކޮޅު ހަދައި ފަހުން ލޯނަކަށް އޮލިވިއޭ ގެންނަން ނިންމުމުންނެވެ.
ޓްރާންސްފާގެ ފަހު ދުވަހު މާސޭ އިން ވަނީ ސެލްޓިކަށް ކުޅެމުން އައި މިޑްފީލްޑަރު އޮލިވިއޭ އެންޗަމް ގެނެސްފަ އެވެ. ފްރާންސްގެ 21 އަހަރުން ދަށުގެ ގައުމީ ޓީމަށް ކުރިން ކުޅުނު އޮލިވިއޭ، މާސޭ އަށް ބަދަލުވީ މި ސީޒަނުގެ ނިޔަލަށް ލޯން އެއްބަސްވުމެއްގެ ދަށުންނެެވެ. މި ސީޒަނުގެ ނިޔަލަށް މާސޭ ކޮންޓްރެކްޓްގައި ހުރި ވިލަސް ބޮއަސް މީގެ ކުރިން ވަނީ އޭނާގެ އެއްބަސްވުން ހަމަވުމުން ޓީމު ދޫކޮށްލާނެ ކަމަށް ބުނެފަ އެވެ. ކުރިން ޗެލްސީ އާއި ޓޮޓެންހަމަށް ކޯޗުކޮށްދިން ވިލަސް ބޮއަސްގެ އިސްތިއުފާ ގަބޫލުކުރުމެއް ނެތި އެ ޓީމުން ވަނީ އޭނާ ސަސްޕެންޑްކޮށްފަ އެވެ.
ކޮމެންޓު ފޮނުވާ