ބްރައިޓަން ފުރަތަމަ ފަހަރަށް ލިވަޕޫލް އަތުން މޮޅުވެއްޖެ

އިނގިރޭސި ޕްރިމިއާ ލީގުގައި ރޭ އެންމެ ފަހުގެ ޗެމްޕިއަން ލިވަޕޫލް ބަލިވުމުގެ ފައިދާނަަގައި ލެސްޓާ ސިޓީ ލީގުގެ ތިން ވަނަ އަށް ޖެހިލައިފި އެވެ.

ބްރައިޓަން އިން ރޭ ޕްރިމިއާ ލީގުގެ ތާރީހުގައި ފުރަތަމަ ފަހަރަށް ލިވަޕޫލް ބަލިކުރިއިރު، މެޗުގައި ފެނުނު ހަމައެކަނި ގޯލު ބްރައިޓަން އިން ކާމިޔާބުކުރީ ދެ ވަނަ ހާފްގަ އެވެ. އެ ޓީމުގެ ލަނޑު ޖަހައިދިނީ މިޑްފީލްޑަރު ސްޓީވެން އަލްޒާޓޭ އެވެ. ބްރައިޓަން އިން 36 އަހަރަށް ފަހު ފުރަތަމަ ފަހަރަށް ލިވަޕޫލް ބަލިކޮއްފައެވެ. މިއީ ލީގުގައި އަމިއްލަ ދަނޑުގައި ގޯލެއް ކާމިޔާބުނުކުރެވި އެ ޓީމުން ޖެހިޖެހިގެން ނިންމާލި ތިން ވަނަ މެޗެވެ. އަމިއްލަ ދަނޑުގައި ލީގުގައި ޖެހިޖެހިގެން ދެ މެޗުން ބަލިވިއިރު މިއީ މިދިޔަ އަށް އަހަރު ތެރޭގައި އެ ގޮތަށް ދިމާވި ފުރަތަމަ ފަހަރެވެ. ލިވަޕޫލް އެންމެ ފަހުން އަމިއްލަ ދަނޑުގައި މޮޅުވީ ޑިސެމްބަރު 16 ވަނަ ދުވަހުއެވެ.

މި ނިތާޖާ އެކު ސިޓީ އެއް ވަނައިގައި އޮތީ 21 މެޗުން 47 ޕޮއިންޓާ އެކު އެވެ. ދެ ވަނައިގައި އޮތް މެންޗެސްޓާ ޔުނައިޓެޑަށް 22 މެޗުން 44 ޕޮއިންޓް ލިބިފައިވާއިރު، ރޭ ފުލަމް އަތުން 2-0 އިން މޮޅުވި ލެސްޓާ ތިން ވަނަ އަށް ޖެހިލީ 22 މެޗުން 42 ޕޮއިންޓް ހޯދައިގެންނެވެ. ލިވަޕޫލް ހަތަރު ވަނަ އަށް ވެއްޓުނީ އަމިއްލަ ދަނޑުގައި ރޭ ބްރައިޓަން އަތުން 1-0 އިން ބަލިވުމުންނެވެ. ލިވަޕޫލަށް 22 މެޗުން ލިބުނީ 40 ޕޮއިންޓެވެ.