ލިސްޓެއްނެރެ ބިރުދައްކަން އުޅޭނެކަމެއްނެތް، ޖަލަށް ލިޔަސް ފަސްޖެހުމެއް ނެތް: އަދުރޭ

އެމްއެމްޕީއާރުސީގެ ބޮޑު ޚިޔާނާތާ ގުޅުންހުރި މީހުންކަމަށްބުނެ ލިސްޓެއް އާންމުކޮށް ޖަލަށް ލުމަކީ މިސަރުކާރާއި ދެކޮޅަށް ކުރާ މަސައްކަތަށް ކުޑަކޮށްވެސް ފަސްޖެހޭނެ ކަމެއް ނޫންކަމަށް އިދިކޮޅު ކޯލިޝަންގެ ހިންގުމާއި ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް އަބްދުއްﷲ ވިދާޅުވެއްޖެ އެވެ.

އިދިކޮޅު ޕީޕީއެމްޕީއެންސީން ބޭއްވި ޖަލްސާގައި ވާހަކަ ދައްކަވަމުން އަބްދުއްރަހީމް ވިދާޅުވީ އެމްއެމްޕީއާރުސީގެ ޚިޔާނާތަކީ މިސަރުކާރަށް އިންސާފުން ބަލަން ކެރޭނެ މައްސަލައެއް ނޫންކަމަށެވެ. ރައީސް ޔާމީނަށް ކޮށްފައިވާ ޖަލު ހުކުމަށް އިންސާފުލިބޭނެކަން ޔަގީންވުމުން މިސަރުކާރުން ގޮތްހުސްވެ ހަދާނެ ގޮސް ހުސްވެފައިވާކަމަށް އަބްދުއްރަހީމް ވިދާޅުވި އެވެ. އަދި މިއަދު އިދިކޮޅުގައި ތިބި މީހުންނަށް ބިރުދައްކަން ލިސްޓު ނެރުމަކީ ސަރުކާރާއި ދެކޮޅަށް ކުރާ މަސައްކަތަށް ކުޑަވެސް ބަދަލެއް އަންނާނެ ކަމެއް ނޫންކަމަށެވެ.

އަޅުގަނޑުމެން ބިރެއް ނުގަނޭ ޖަލަށް ލާފާނެތީ. މިސަރުކާރުން ޖަލަށް ލުމަކީ ލިބޭނެ ފަހުރެއް. ޖަލަށް ލިޔަސް އަޅުގަނޑުމެން މައިތިރިއެއް ނުކުރެވޭނެ. އެތާގައިވެސް އަޅުގަނޑުމެން މިއަޑު އުފުލާނަން. ޖަލަށް ލައިގެން މިކަމެއް ނުހުއްޓުވޭނެ.

– އަބްދުއްރަހީމް އަބްދުﷲ ވިދާޅުވި އެވެ.

އަބްދުއްރަހީމް ވިދާޅުވީ ރައީސް ޔާމީންއާއި އެމްއެމްޕީއާރުސީގެ ފައިސާތަކާއި ގުޅުވާނަމަ މިސަރުކާރުން ހިންގާ ހުރިހާ ކޮރަޕްޝަންގެ އަމަލުތަކަކާއި ރައީސް ޞާލިހުއާއިވެސް ގުޅުވޭނެކަމަށެވެ. އެމްއެމްޕީއާރުސީގެ ފައިސާއަކީ ކުރީގެ ނައިބްރައީސް އަހުމަދު އަދީބްއާއި، އެމްއެމްޕީއާރުސީގެ އެމްޑީ ޒިއަތު އާއި ދެބޭފުޅުން ހިންގާފައިވާ ބޮޑު ވައްކަމަކަށްވާއިރު އެކަން ރައީސް ޔާމީންގެ ބޮލުގައި އެޅުވޭނެ އެއްވެސް ގޮތެއް ނޯންނާނެކަމަށެވެ. އަދި މިއީ ރައީސް ޔާމީން އިސްވެ ހުންވައިގެން ބަލަން ފެށި މައްސަލައަކަށްވާއިރު މިމައްސަލާގައި ރައީސް ޔާމީނަށް ކޮށްފައިވަނީ ނުހައްގު ހުކުމެއްކަން ސާފުވާކަމަށް އަބްދުއްރަހީމް ވިދާޅުވިއެވެ.

ރާއްޖޭގައި ފަހުގެ ތާރީޚެއްގައި ހިނގި އެންމެ ބޮޑު ޚިޔާނާތްކަމަށްވާ އެމްއެމްޕީއާރުސީގެ ބޮޑު ހިޔާނާތާއި ގުޅުންހުރި 70،000 އަށްވުރެ ގިނަ މެސެޖް އާންމު ކުރައްވާނެކަމަށް މަޖިލިސް ރައީސް މުހައްމަދު ނަޝީދު މިއަދު ވަނީ ވިދާޅުވެފަ އެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި ބަހުސް ކުރަމުންދާ ނުހައްގު މުއްސަދިކަން ހޯދުމުގެ ބިލަށް މެމްބަރުން ދެއްކެވި ވާހަތަކާއި ގުޅިގެން މަޖިލިސް ރައީސް ވިދާޅުވީ އެމްއެމްޕީއާރުސީގެ ޚިޔާނާތުގެ މައްސަލާގައި ޝާމިލުވާ މީހުންނަކީ މިއަދު ކޮބައިކަން ނޭގޭ ބަޔަކު ރާއްޖޭގައިވެސް މަދު ކަމަށެވެ. މިއަދު މީގެ ތެރެއިން އެއްވެސް މައްސަލައެއް ނުހިނގައި މުއައްސަސާތަކުން އެކަށިގެންވާ މަސައްކަތް ނުކުރައްވާތީ ނުހަނު ކަންބޮޑުވާކަމަށް މަޖިލިސް ރައީސް ވަނީ ވިދާޅުވެފަ އެވެ.

އެމްއެމްޕީއާރުސީގެ ޚިޔާނާތުގެ ފައިސާ 267 ފަރާތަކަށް ލިބުނުކަމަށް އެ މައްސަލަ ތަޙްޤީޤުކުރާ އިދާރާތަކުންވަނީ ވިދާޅުވެފައެވެ. ޚިޔާނާތުގެ ފައިސާ ލިބިފައިވާ ފަރާތްތަކުގެ ތެރޭގައި 18ވަނަ ރައްޔިތުންގެ މަޖިލީހުގެ 44 މެމްބަރަކާއި، ރައްޔިތުންގެ މަޖިލީހުގެ މިހާރުގެ 16 މެމްބަރަކާއި، މިނިވަން މުވައްސަސާތަކުގައި އިސްކޮށް ތިއްބެވި 5 ބޭފުޅަކުވެސް ހިމެނިވަޑައިގަންނަވައެވެ. މީގެ އިތުރުން މިހާރު ސަރުކާރުގެ މަގާމުގައިތަކުގައި ތިބި 7 މީހަކާއި، 7 ފަނޑިޔާރެއްގެ އިތުރުން ސަލާމަތީ ބާރުތަކުގައި ހިމެނޭ 23 އޮފިސަރުން ވެސް ހިމެނެއެވެ.