އިންޑިއާގައި ހުއްޓުމެއްނެތި ކުރިޔަށްދާ ދަނޑުވެރިންގެ މުޒާހަރާތަކާއި ގުޅިގެން، އިންޑިއާ ސަރުކާރުގެ އެދުމުގެ މަތިން، މުޒާހިރާ ކުރާ އިސްފަރާތްތަކާ އަދި ބައެއް މީޑިއާތަކުގެ ޓުވިޓަރ އެކައުންތައް ޓުވިޓަރއިން ބްލޮކް ކޮށްފިއެވެ.
އިންޑިއާގެ އިންފޮމޭޝަން މިނިސްޓްރީގެ އޮފިޝަލަކު، ނަން ހާމަނުކުރަމަށް ޝަރުތުކޮށް، އޭފްޕީ ނޫސް އޭޖެންސިއަށް މައުލުމާތު ދީފައިވާ ގޮތުގައި، އިންޑިއާ ސަރުކާރުންވަނީ، "އާންމު މަސްލަހަތަށް ނުރާކާ ކުރާ" ކަމަށް ސަރުކާރުން ދެކޭ 250 ޓުވިޓަރ އެކައުންޓެއް ބްލޮކް ކޮށްދިނުމަށް ޓުވިޓަރ ޕްލެޓްފޯމުގެ މީޑިއާ ކުންފުނީގައި އެދިފައެވެ.
މި އެކައުންޓުތައް މިހަފްތާގެ ހޯމަދުވަހު މެދުންދުރު ބްލޮކް ވުމަށްފަހު، އޭގެ ގަޑިއިރުތަކެއް ފަހުން އަނެއްކާވެސް ޓުވިޓަރއިން ވަނީ މި އެކައުންޓްތައް އަން ބްލޮކް ކޮށްފައެވެ.
އިންޑިއާގައި އެތައް ހާސް ދަނޑުވެރިން ގެންދަނީ، ފާއިތުވި އަހަރުގެ ނޮވެމްބަރު މަހުން ފެށިގެން، އެގައުމުގައި މިހާރު އޮތް ހިންދޫންގެ ވަތަނީ ސަރުކާރުން ފާސްކުރުމަށް މަސައްކަތް ކުރަމުންދާ ދަނޑުވެރިކަމާބެހޭ ގާނޫނާ ދެކޮޅަށް މުޒާހަރާ ކުރަމުންނެވެ. ނޮވެމްބަރު މަހުގެ 26 ވަނަ ދުވަހުން ފެށިގެން ދަނޑުވެރިން މުޒާހިރާ ކުރަމުންދަނީ، އިންޑިއާގެ ވެރިރަށް ނިއު ދިއްލީގެ ރަށްބޭރުގައި ޖަގަހަ ގަހައިގެންނެވެ.
އެހެންނަމަވެސް، ފާއިތުވެދިޔަ ހަފްތާގައި ދަނޑުވެރިން ބޭއްވި މުޒާހަރާއެއްގައި، ފުލުހުންނާ މުޒާހަރާ ކުރާ ފަރާތްތަކާ ދެމެދު ބޮޑެތި ހަމަނުޖެހުންތަކެއް ވަނީ ހިގާފައެވެ. މިހަމަނުޖެހުންތަކަށް ފަހު، ފުލުހުން ވަނީ އެތައްސަތޭކަ ދަނޑުވެރިން ހައްޔަރުކޮށް އަދި އެއް ނޫސްވެރިޔަކުވެސް ހައްޔަރު ކޮށްފައެވެ. ފުލުހުން ހައްޔަރު ކޮށްފައިވަނީ ކަރަވަން މެގަޒިން ނަމަކަށް ކިޔާ މީޑިއާއެއްގައި މަސައްކަތް ކުރާ ނޫސްވެރިއެކެވެ.
އިންޑިއާ ސަރުކާރުގެ އެދުމަށް ޓުވިޓަރއިން ބްލޮކް ކޮށްފައިވާ މީޑިއާ ޓުވިޓަރ އެކައުންޓަކީވެސް މިމީޑިއާއިން ހިންގާ ޓުވިޓަރ އެކައުންޓެވެ. މީގެ އިތުރުން، ޓުވިޓަރއިން ބްލޮކް ކޮށްފައިވާ އެކައުންޓްތަކުގެ ތެރޭގައި، އިދިކޮޅު ސިޔާސީ ބައެއް އިސްބޭބޭފުޅުން އެކައުންޓުތަކާ، ފިލްމީ ތަރިންނާ އަދި މީގެއިތުރުން ބައެއް އިގްތިސާދީ މާހިރުންގެ ޓުވިޓަރ އެކައުންޓްތައްވެސް ހިމެނެއެވެ.
Muslim and Sikh activists in #India are being stifled by Twitter https://t.co/LA6JZM5qch
— Khaled Beydoun (@KhaledBeydoun) February 2, 2021
ޓުވިޓަރގެ ތަރުޖަމާން ބުނެފައިވަނީ "ހަމަޖެހިފައިވާ އުސޫލުތަކުގެ ތެރެއިން އެދިއްޖެނަމަ، ބައެއް ގައުމުތަކުގައި، ބައެއް ބާވަތުގެ މައުލޫމާތު ހިފެއްޓުމަކީ އަބަދުވެސް ޓުވިޓަރއިން އަމަލުކުރަމުންދާ އުސޫލެއް" ކަމުގައެވެ.
މުޒާހަރާކުރަމުންދާ ދަނޑުވެރިންގެ ތަރުޖަމާން ވިދާޅުވި ގޮތުގައި، މުޒާހިރާ ކުރާ ފަރާތްތަކުގެ ޓުވިޓަރ އެކައުންޓްތަކުން ހަމައެކަނި ކޮށްފައިވާނީ މުޒާހަރާތަކަށް ތާއިދުކުރުމުގެ ގޮތުން ކޮށްފައިވާ ޓުވީޓުތައް އެކަންޏެވެ.
ފާއިތުވެދިޔަ ހަފްތާގެ އަންގާރަދުވަހު، މުޒާހަރާކުރާ ފަރާތްތަކުން އިންޑިއާގެ މަޝްހޫރު ތާރީޚީ ބިނާ ރެޑްފޯޓް ބިނާ ހިމެނޭ ސަރަހައްދަށްވަދެ ހިގި ހަމަނުޖެހުންތަކަށްފަހު، މިހާތަނަށް އައިއިރު އިންޑިއާ ސަރުކާރުން ވަނީ، ނޫސްވެރިންނާ އަދި އިދިކޮޅު ސިޔާސީ އިސް ފަރާތްތައް ހިމެނޭގޮތުން 5 މިހެއްގެ މައްޗަށް، ރިޕޯޓު ކުރުމުގައާއި އަދި ޓުވީޓު ކުރުމުގައި އިދާރާތަކާއި ދެކޮޅަށް ހަމަލާ ދިނުމަށް ހިތްވަރު ދިނުމުގެ ތުހުމަތުކޮށް، ދައުވާކުރުމަށް ނިންމާފައެވެ.
އިންޑިއާއިން އަންނަނީ، ދަޑުވެރިން މުޒާހަރާ ކުރާ ސަރަހައްދުތަކަށް އަމާޒުކޮށް، މުޒާހަރާ ކުރުމަށް އެއްތަން ވިޔަ ނުދިނުމަށާއި އަދި މައުލޫމާތު ހިއްސާކުރުމަށް ހުރަސް އެޅުމުގެ ގޮތުން، ތަކުރާރުކޮށް އިންޓަރނެޓްގެ ޚިދުމަތްތަކަށް ބުރޫ އަރުވަމުންނެވެ.
މީގެ އިތުރުން، އިންޑިއާ ސަރުކާރުންވަނީ، އެގައުމުގެ ނުުފޫޒުގެ ދަށުގައި އޮންނަ ކަޝްމީރު ސަރަހައްދުގައިވެސް، 2019 ވަނަ އަހަރު އެސަރަހަށްދަށް ޒަމާނުއްސުރެ ލިބިދީފަ އޮންނަ ސަރަހައްދީ މިނިވަންކަން ނިގުޅައި ގަތުމަށްފަހު، އެތައްމަހެއްވަންދެން، އެސަރަހައްދުގެ ބްރޯޑް ބޭންޑް އިންޓަރނެޓްގެ ޚިދުމަތް މެދުކަޑާލާފައެވެ.
ރިޕޯޓާރސް ވިތައުޓް ބޯޑާސްއިން 2020 ވަނަ އަހަރު ނެރުނު ފްރީޑަމް އިންޑެންސްގައި ހިމެނޭ 180 ގައުމުގެ ތެރެއިން އިންޑިއާ ހިމެނިފައިވަނީ 142 ވަނައިގައެވެ.
