އިޓާލިއަން ސެރިއާގައި އިންޓަމިލާނުން ލީގުގެ ކުރީގައިވާ މިލާންއާ ދެ ޕޮއިންޓް ކައިރިއަށް ޖެހިލިފިއެވެ.
އަމިއްލަ ދަނޑުގައި އިންޓަމިލާނުން ބެނެވެންޓޯގެ މައްޗަށް ކުރި ހޯދީ 4-0 ލަނޑުންނެވެ. މެޗުގައި އިންޓަމިލާނަށް ރޮމަލޫ ލުކާކޫ ދެލަނޑު ކާމިޔާބުކޮށްދިން އިރު ދެން ލަނޑުޖަހައިދިނީ ލައުޓަރޯ މާޓިނޭޒްއެވެ. އިންޓައިން ޖެހި އަނެއްލަނޑަކީ ބެނެވެންޓޯގެ ކުޅުންތެރިޔެއްގެ އަތުން ބައިކޮޅަށް ވަތްލަނޑެކެވެ.
އިންޓައިން ވަނީ އެންމެފަހުން ލީގުގައި އަމިއްލަ ދަނޑުގައި ކުޅުނު ހަތް މެޗު ކާމިޔާބުކޮށް 48 ލަނޑުޖަހާފައެވެ. މިއީ ވޭތުވެދިޔަ 62 އަހަރުތެރޭގައި ލީގުގެ 20 މެޗުން ހޯދި އެންމެ ރަނގަޅު ނަތީޖާއެވެ. ރޭ ލީގުގެ އެންމެފަހުގެ ޗެމްޕިއަން ޔުވެންޓަސް ވަނީ ރަށުންބޭރުގައި ސަންޕަޑޯރިޔާ އަތުން 2-0 ލަނޑުން މޮޅުވެފައެވެ.
މެޗުގައި ޔުވެންޓަސް ލަނޑު ކާމިޔާބުކޮށްދިނީ ފެޑްރީސިއޯ ޗީޒާ އާއި އާރޮން ރަމްސޭއެވެ. އެންމެފަހުން ލީގުގައި ޔުވެންޓަސް ކުޅުނު ފަސްމެޗުގެ ތެރެއިން ޗީޒާ ވަނީ ހަތަރު ލަނޑު އެޓީމަށް ކާމިޔާބުކޮށްދީފައެވެ. މި ނަތީޖާ އެކު ލީގުގެ އެއްވަނައިގަ މިލާން އޮތީ ދެ ޕޮއިންޓުގެ ލީޑަކާ އެކު 46 ޕޮއިންޓާއެކުއެވެ. 44 ޕޮއިންޓް ހޯދައިގެން އިންޓަމިލާން ދެވަނައިގަ އޮތް އިރު މި ދެޓީމަށް ވުރެ އެއްމެޗު މަދުން ކުޅެގެން ޔުވެންޓަސް އޮތީ ތިންވަނައިގަ 39 ޕޮއިންޓާއެކުއެވެ.
ރޯމާ ހަތަރުވަނައިގަ އޮތީ 37 ޕޮއިންޓާއެކުއެވެ. ރޯމާއަށް ވުރެ އެއްޕޮއިންޓް މަދުން ހޯދައިގެން އެޓްލާންޓާ ފަސްވަނައިގަ އޮތް އިރު ހަވަނަ ލިބޭނީ އެއްވުރެ މަދުން ދެ ޕޮއިންޓް ހޯދައިގެން ނަޕޯލީއަށެވެ. ހަތްވަނާގަ އޮތް ލާޒިޔޯއަށް ލިބެނީ 34 ޕޮއިންޓާއެކުއެވެ.
ކޮމެންޓު ފޮނުވާ