ލީޕްޒިގް މޮޅުވެ ދެވަނައިގަ ފަސް ޕޮއިންޓުގެ ލީޑެއް

ޖަރުމަނު ބުންޑަސްލީގާ ގައި ލީޕްޒިގުން އެޓީމު ކުޅުނު މެޗު ކާމިޔާބުކޮށް ލީގުގެ ދެވަނައިގަ ފަސްޕޮއިންޓުގެ ލީޑެއް ނަގައިފިއެވެ.

ވާދެވެރި ބަޔާ ލެވަކޫސަންއާ ވަދާކޮށް އަމިއްލަ ދަނޑުގައި ލީޕްޒިގުން ކުރި ހޯދީ 1-0 ލަނޑުންނެވެ. މެޗުގެ ހަމައެކަނި ލަނޑު ދެވަނަ ހާފްފަށައިގެން ހަވަނަ މިނިޓުގައި ކާމިޔާބުކޮއްދިނީ ކްރިސްޓޮފާ ނުކޫކޫއެވެ. ލީގުގައި ރޭ ޑޯޓްމަންޑް ވަނީ ފަހަތުން އަރައި އޮގްސްބާގް ބަލިކޮއްފައެވެ. ޑޯޓްމަންޑްގެ ދަނޑުގައި ކުޅުނު މެޗުން ކުރި ހޯދީ 3-1 ލަނޑުންނެވެ.

މެޗުގެ 10 ވަނަ މިނިޓުގައި އޮގްސްބާގްގެ އަންދްރޭ ހާން ލީޑް ނަގާ ދީފަވަނިކޮށް ފުރަތަމަހާފް ނިމުމުގެ ކުރިން ޑޯޓްމަންޑްއަށް ނަތީޖާ ހަމަހަމަކޮއްދިނީ ތޯމަސް ޑިލަނޭއެވެ. މެޗުގެ ދެވަނަހަފްގައި ޖޯޑަން ސަންޗޯގެ ލަނޑުން ޑޯޓްމަންޑުން ލީޑް ނެގިއިރު ލީޑް އިތުރަށް ފުޅާވެގެން ދިޔައީ އޮގްސްބާގްގެ ކުޅުންތެރިޔެއްގެ އަތުން ބައިކޮޅަށް ވަތް ލަނޑަކުންނެވެ.

ޖަރުމަނު ލީގުގައި ރޭ އެންޓްރެޗް ފްރެންކްފާޓް ވަނީ ހާތާބާލިންގެ މައްޗަށް ކުރި ހޯދާފައެވެ. ޔޫނިއަން ބާލިން އާއި މޮންޗެންގްލެބެކް ވާދަކުރި މެޗު ނިމުނީ 1-1 ލަނޑުން އެއްވަރުވެގެންނެވެ. ވާޑްބްރޭމަން ޝާލްކޭ ވާދަކުރި މެޗުވެސް 1-1 ލަނޑުން ވަނީ އެއްވަރުވެފައެވެ. ރޭގެ ލީގުގައި ބަޔާން ވެސް މޮޅުވުމުން އެޓީމުން ވަނީ ލީގުގެ ކުރީގައި ހަތް ޕޮއިންޓުގެ ލީޑެއް ދަމަހައްޓައިފައެވެ.

ލީގުގެ ކުރީގައި ބަޔާން އޮތީ 19 މެޗުން 45 ޕޮއިންޓް ހޯދައިގެންނެވެ. ލީޕްޒިގުން ރޭގައި ހޯދި މޮޅާއެކު ދެވަނައިގަ ފަސްޕޮއިންޓުގެ ލީޑެއް ނެގިއިރު ލީޕްޒިގް ދެވަނައިގަ އޮތީ 38 ޕޮއިންޓާއެކުއެވެ. ރޭގައި ހޯދި މޮޅާއެކު ފްރެންފާޓް އިން ވަނީ ލީގުގެ ތިންވަނައަށް ކުރިޔަށް ޖެހިލާފައެވެ. ފްރެންކްފާޓް ތިންވަނައިގަ އޮތީ 33 ޕޮއިންޓާއެކުއެވެ.

ރޭގެ މެޗުން ބަލިވުމުން ލެވަކޫސަން ވަނީ 32 ޕޮއިންޓާއެކު ލީގުގެ ހަތަރުވަނައަށް ވެއްޓިފައެވެ. ފަސްވަނާގައި ވާ ޑޯޓްމަންޑް އިން ވެސް ވަނީ ހަމަ މިއަދަދަށް ޕޮއިންޓް ހޯދާފައެވެ.