އިނގިރޭސި ޕްރިމިއާ ލީގުގައި ރޭ ޓޮޓެންހަމް ހޮޓްސްޕާސް 3-1 އިން ބަލިކޮށް، ލިވަޕޫލުން މި އަހަރު ލީގުގައި ފުރަަތަމަ ފަހަރަށް މޮޅުވެ ހަމަޖެހުމެއް ހޯދައިފި އެވެ.
މެޗު ފަށައިގެން ކުޑައިރުކޮޅެއްގެ ތެރޭގައި ލިވަޕޫލްގެ ސަޑިއޯ މާނޭ އަށް ގޯލު ޖަހަން ލިބުނު ރަނުގެ ފުރުސަތެއްގެ ބޭނުން ނުހިފުނެވެ. ޓޮޓެންހަމުން ކުރި ފުރަތަމަ އެޓޭކުގައި އެ ޓީމުގެ ސޮން ހެއުން މިން ގޯލެއް ޖެހި ނަމަވެސް ވީޑިއޯ އެސިސްޓަންޓް ރެފްރީ (ވީއޭއާރް) އިން ބެލުމަށް ފަހު ނިންމީ އެ ގޯލު ބަލައިނުގަންނާށެވެ. އެއީ ސޮން އޮފްސައިޑްގައި ހުރުމުންނެވެ.
ލިވަޕޫލުން ލީޑުނެގީ ފުރަތަމަ ހާފުގެ އިތުރު ވަގުތުގައި ރޮބާޓޯ ފިރްމީނޯ ޖެހި ގޯލުންނެވެ. މިއީ މާނޭ ހުސްކޮށްލާފައި ދިން ފުރުސަތަކުން ފިރްމީނޯ ޖެހި ގޯލެކެވެ. ދެ ވަނަ ހާފްގެ ކުޅުން ފަށައިގެން މެޗުގެ 47 ވަނަ މިނިޓްގައި ޓްރެންޓް އަލެކްސަންޑާ އާނޯލްޑް ވަނީ ލިވަޕޫލަށް ލީޑުފުޅާކޮށްދީފަ އެވެ. ލިވަޕޫލުން ލީޑުފުޅާކުރިތާ ދެ މިނިޓް ފަހުން އޭރިއާ ބޭރުން ފޮނުވާލި ޝޮޓަކުން ޓޮޓެންހަމްގެ ޕިއޭ އެމީލް ހޮއިބިއާ ވަނީ ގޯލެއް ޖަހައިފަ އެވެ. އޭގެ ފަހުން ލިވަޕޫލަށް މުހައްމަދު ސަލާހު ވަނީ ގޯލެއް ޖަހައިދީފަ އެވެ.
ފިރްމީނޯ އަތުގައި ބޯޅަ ޖެހުމުން ވީއޭއާރް އިން ބެލުމަށް ފަހު ނިންމީ އެ ގޯލު ބަލައިނުގަންނާށެވެ. ލިވަޕޫލްގެ ތިން ވަނަ ގޯލު ޖެހީ މެޗުގެ 65 ވަނަ މިނިޓްގައި މާނޭ އެވެ. މިއީ އާނޯލްޑް ނެގި ހުރަހަކުން މާނޭ ޖެހި ގޯލެކެވެ. ޓޮޓެންހަމް އަތުން ހޯދި މި މުހިއްމު މޮޅާ އެކު ލިވަޕޫލް ވަނީ އަލުން ލީގުގެ ހަތަރު ވަނަ އަށް ޖެހިލައިފަ އެވެ. އެއީ 20 މެޗުން 37 ޕޮއިންޓް ހޯދައިގެންނެވެ. ޓޮޓެންހަމް ހަ ވަނައިގައި އޮތީ 19 މެޗުން 33 ޕޮއިންޓާ އެކު އެވެ.
ކޮމެންޓު ފޮނުވާ