ސެވިއްޔާ ގަދަ އަަށަކަށް

ސްޕެނިޝް ކޮޕާ ޑެލް ރޭ ގައި ސެވިއްޔާ އާއި ވެލެންސިއާ ބައްދަލުކުރިމެޗް ސެވިއްޔާ ކާމިޔާބުކޮށް މުބާރާތުގެ ކުއާޓާފައިނަލުން ޖާގަ ހޯދައިފިއެވެ.

ސެވިއްޔާގެ ދަނޑުގައި ކުޅުނު މިމެޗް އެޓީމް ކާމިޔާބުކޮށްފައިވަނީ 3-0 ލަނޑުންނެވެ. ސެވިއްޔާގެ ފަރާތުން މޮޅު ކުޅުމެއް ފެނިގެންދިޔަ މިމެޗްގައި ގިނަ އިރު ބޯޅަ ގެންގުޅެ ގިނަ ހަމަލާ އުފައްދާފައިވަނީވެސް ސެވިއްޔާއެވެ. މިމެޗްގައި ސެވިއްޔާއިން ޖެހި ފުރަތަމަ ލަނޑު މެޗްގެ 20 ވަނަ މިނެޓްގައި ޖަހާދިނީ ލޫކް ޑި ޖޮންގ އެވެ.

އެޓީމްގެ ދެވަނަ ލަނޑު މެޗްގެ 33 ވަނަ މިނެޓްގައި ޖަހާދިނީވެސް ޑި ޖޮންގ އެވެ. މިމެޗުގައި ސެވިއްޔާގެ ތިންވަނަ ލަނޑު މެޗްގެ 38 ވަނަ މިނެޓްގައި ޖަހާދިނީ އިވާން ރަކިޓިޗްއެވެ. މިމެޗްގެ ދެވަނަ ހާފްގައި ވެލެންސިއާއިން އެޓީމްގެ ކުޅުން ރަގަޅުކޮށްފައެވެ. މިގޮތުން ބައިކޮޅަށް އިތުރު ލަނޑެއް ވަނަނުދީ ހިފަހައްޓާ ލެވުނު ނަމަވެސް ނަތީޖާއަށް އެއްވެސް ބަދަލެއް ގެނެވޭގޮތެއް ނުވިއެވެ.

މިމުބާރާތުގައި އަލްމޭރިއާ އާއި އޮސަސޫނާ ބައްދަލުކުރިމެޗް ފުރިހަމަ ވަގުތާއި އިތުރު ވަގުތުގެ ދެހާފްގައިވެސް ލަނޑެއް ނުޖެހި އެއްވަރު ވުމުން ޕެނަލްޓީ ޖަހައިގެން 5 ލަނޑު 4 ލަނޑުން ކާމިޔާބުކުރީ އަލްމޭރިއާއެވެ.