ރާއްޖޭގެ ފުރަތަމަ އޭއެފްސީ ޕްރޯ ލައިސަންސް ކޯޗު މުހައްމަދު ޝާޒްލީ (ޝާޒް)، ޓީސީ ސްޕޯޓްސް ކްލަބްގެ ކޯޗުގެ މަގާމުން އިސްތިއުފާދީފިއެވެ.
ޝާޒްއާ އެކު މިދިޔަ ދެ ދުވަހު ދެކެވުނު ވާހަކަތަކަށް ފަހު ދެ ފަރާތް މެދުގައި އެއްބަސްވެވުނީ މި ވަގުތަށް ހާލަތާއި އެކި ކަންތައްތަކަށް ބެލުމަށް ފަހު އެންމެ ރަނގަޅު ނިންމުމަކީ ޝާޒް ޓީމާ ވަކިވުން ކަމަށް ޓީސީން ވަނީ ހާމަކޮށްފައެވެ. ލީގުގެ ދެ ވަނަ ބުރުގައި ޓީސީ ކުޅޭ ފުރަތަމަ މެޗުގައި މިއަދު ހަވީރު ދަ ގްރާންޑޭ ސްޕޯޓްސް ކްލަބާ ދެކޮޅަށް ޓީސީ ޓީމަށް އިރުޝާދުދޭނީ އެސިސްޓަންޓް ކޯޗު އަހުސަން ރަޝީދުއެވެ. ޓީސީން ބުނީ ތިން ވަރަކަށް ކޯޗުންނާ މަޝްވަރާ ކުރަމުން އަންނަ ކަމަށާއި ދަ ގްރާންޑޭ މެޗަށް ފަހު ކޯޗެއް ހަމަޖައްސާނެ ކަމަށެވެ. އެނގިފައިވާ ގޮތުގައި ޓީސީން ވާހަކަ ދައްކާ އެއް ކޯޗަކީ މީގެ ކުރިން އެ ޓީމަށް ކާމިޔާބު ހޯދައިދީފައިވާ ނިޒާމްބެ އެވެ.
ޝާޒް ޓީސީގެ ކޯޗުކަމާ ހަވާލުވީ 2019 ވަަނަ އަހަރުގެ ޑިސެމްބަރު މަހުގައެވެ. ޝާޒް އަކީ މި ފަހަރުގެ ފުރަތަމަ ޑިވިޝަންގެ ދެ ވަނަ ބުރު ފެށުމުގެ ކުރިން ޓީމާ ވަކިވި ފަސް ވަނަ ކޯޗެވެ. ފުރަތަމަ ޑިވިޝަނުގައި މިހާރު ކޯޗުން ބަދަލުނުވެ އޮތީ ތިން ޓީމެވެ. ޝާޒް ގެ ކޯޗު ކަމުގައި ޓީސީ ހަތް މެޗުން ނުވަ ޕޮއިންޓް ހޯދާފައިވާއިރު، މޮޅުވީ ދެ މެޗުންނެވެ. ދެ މެޗުން ބަލިވިއިރު، ތިން މެޗުވީ އެއްވަރެވެ.
ޝާޒްގެ ކޯޗުކަމުގައި ޓީސީން ކުޅުނު ފަހު މެޗުގައި ކްލަބް ގްރީން ސްޓްރީޓްސް އަތުން ވަނީ 1-0 އިން މޮޅުވެފަ އެވެ.
ކޮމެންޓު ފޮނުވާ