އެއްޗެހި ބެހެއްޓޭ ތަންތަން ނުވަތަ މުހިންމު ބައެއް ކަންކަމުގެ މަތިން ހަނދާންނެތޭ ހެއްޔެވެ؟ އެހެން އެކަން ވާނަމަ އެއީ ސިއްހީ ކޮންމެވެސް މައްސަލައެއްގެ އިޝާރާތެކެވެ. ނަމަވެސް ހަނދާންނެތުން އާންމުކަމަކަށް މައިގަނޑު ގޮތެއްގައި ވަނީ މީހާގެ އުމުރު މައްޗަށް ދިއުމުންނެވެ. ނަމަވެސް ހަނދާންނެތުމަށް ދިމާވާ ބައެއް އެހެން ސަބަބުތައްވެސް ހުރެއެވެ.
މިކިޔައިދެނީ އުމުރު މައްޗަށް ދިއުމުގެ ސަބަބުން ހަނދާންނެތުމަށް މެދުވެރިވާ ބައެއް ކަންކަމެވެ.
1. އަމިއްލަ ހިޔާލަށް ގެއްލިފައި އިނުން
އެހެންމީހެއްގެ އަޅާލުން ކުޑަވުން ނުވަތަ އެކަނިވެރިވުމުގެ ސަބަބުން އަމިއްލަ ހިޔާލަށް ގެއްލި، އެހެން މީހުން ދައްކާވާހަކަތަކަށް ސަމާލުކަން ނުދެވުމުގެ ސަބަބުންވެސް ހަނދާނަށް ނައިސްދާނެއެވެ.
2. ކުދިކުދި ކަންކަން ހަނދާންނެތުން
ކުދިކުދި ކަންކަން ހަނދާންނެތުމަކީ ތިމާގެ ހަނދާން ބަލިކަށިވަމުންދާކަމުގެ އިޝާރާތެކެވެ.
3. ބްލޮކުވުން
ބައެއްފަހަރު ހަނދާނުގައި ހުއްޓަސް ބުނެދޭން ނޭނގުމަކީ ޖެހޭ މައްސަލައެކެވެ. މިސާލަކަށް ސުވާލެއްގެ ޖަވާބު އެނގުނަސް ބައެއްފަހަރު އަނގައިން އެ ޖަވާބު ބޭރުކުރުމަށް އުނދަގޫވެއެވެ.
މިގޮތަށް ހަނދާންނެތުމުގެ މައްސަލަ ދިމާވާނީ އާންމުކޮށް ސްޓްރެސް، ހަމަ ނިދި ނުލިބުން، ޑިޕްރެޝަން، މުސްކުޅިވުން، ވިޓަމިން ބީ12 ޑެފިޝިންސީ، ބޭހެއްގެ ސަބަބުން ނުވަތަ މަސްތުވާއެއްޗެއް ބޭނުންކުރުމުންނެވެ.
