ކުރީގެ ރައީސް އަބްދުﷲ ޔާމީން ޖަލަށްލުމަށް ކްރިމިނަލްކޯޓުން ކުރި ޙުކުމްގެ އިސްތިއުނާފް އަޑުއެހުންތައް ހައިކޯޓުން ނިންމައި ހުކުމާއި ހަމައަށް ދިއުމުން އަނެއްކާވެސް ޖޭއެސްސީއާއި، ސަރުކާރުކާރުން ހުކުމުގެ ތެރެއަށް ވަންނަމުންދާކަމުގައި އިދިކޮޅު ޕީއެންސީގެ ރައީސް އަބްދުރަހީމް އަބްދުﷲ ވިދާޅުވެއްޖެ އެވެ.
ރައީސް ޔާމީންގެ ޝަރީއަތާއި ގުޅޭގޮތުން މިއަދު ޕީޕީއެންގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އަބްދުއްރަހީމް ވިދާޅުވީ ރައީސް ޔާމީންނަށް މިހާރު ހުކުމްކޮށްފައިވާ ޝަރީއަތަކީވެސް ނުފޫޒާއި ބާރުވެރިކަން އިންތިހާއަށް ފޯރުވައިގެން ކޮށްފައިވާ ނާއިންސާފު ހުކުމެއްކަމަށެވެ. ހައިކޯޓުގައި އެމަނިކުފާނުގެ އިސްތިއުނާފުގެ އަޑު އެހުންނިމި ހުކުމާއި ހަމަޔަށް ގޮސްފައިވާއިރު ފެނިގެންދަނީ އަނެއްކާވެސް ވަކިގޮތަކަށް މިހުކުމް ކުރުމަށް ނުފޫޒު ފޯރުވަމުންދާ މަންޒަރުކަމަށެވެ.
އަޅުގަނޑުމެންނަށް ފެނިގެންދިޔަ އެމަނިކުފާނަށް ހުކުމްކުރަން އެންމެ 4 ގަޑިއިރަށް ވެފައިވަނިކޮށް ޖޭއެސްސީން ފަނޑިޔާރު ބަދަލުކޮށް އެހެން ފަޑިޔާރު އައްޔަންކޮށް ވަކި ގޮތަކަށް ހުކުމްކުރިތަން. އަޅުގަނޑުމެންނަށް މިއަދު އަނެއްކާވެސް މައުލޫމާތު މިލިބެނީ އިސްތިއުނާފުނިމި ކުރަންއުޅޭ ހުކުމަށްވެސް މިނުފޫޒު ފޯރުވަން އުޅޭކަމަށް. އަޅުގަނޑުމެންނަށް އެގޭ ޖޭއެސްސީއަށާއި، ކޯޓުތަކަށް ވަންނަނީ ކޮން އިރަކު ކޮންކާރެއްގައި ކޮންބައެއްކަންވެސް. ރައީސް ނަޝީދާއި، ރައީސް ޞާލިހުވެސް ދަނީ މިހުކުމަށް ނުފޫޒު ފޯރުވަމުން. އަބްދުއްރަހީމް ވިދާޅުވި އެވެ.
އޭނާ ވިދާޅުވީ ޖޭއެސްސީ އޮތްގޮތުން މިއަދު ރާއްޖޭގެ އެތަކެއް ފަނޑިޔާރުންނަށް ރައްކާތެރިކަން ގެއްލި އެތައް ފަނޑިޔާރަކު މަޤާމުން ވަކިކޮށް ނިކަމެތި ކުރަމުންދާކަމަށެވެ. އަދި ވަކިގޮތަކަށް ހުކުމްކޮށް، ޝަރީއަތް ނުކުރާ ފަނޑިޔާރުން ދުރުކޮށް އެއްބައި ފަނޑިޔާރުންނަށް އިސާފުނުލިބި އިސްތިއުފާ ދެއްވަމުންދަކަމީ ރާއްޖޭގެ ޝަރުއީ މަރުހަލާއާއިމެދު ފެންނަމުންދާ ހިތާމަވެރި މަންޒަރެއްކަމަށެވެ.
ރައީސް ޔާމީންގެ މައްޗަށް ކޮށްފައިވާ ހުކުމަކީ އިންސާފުވެރި ހުކުމެއްނޫންކަން ޝަރުއީ މަރުހަލާގެ ހުރިހާ ފަރާތަކަށްއެގޭކަމަށް އަބްއްރަހީމް ވިދާޅުވި އެވެ. އަދި ރާއްޖޭގެ އެންމެ މަތީކޯޓުން އެމަނިކުފާނުގެ އެކައުންޓްތައް ފްރީޒްކުރުމަށްވެސް އަމުރު ނުކުރެއްވުމުން ޖޭއެސްސީއަށް އެކަންވެސް ބަލައިގަނެވުނު ކަމަށް އަބްދުއްރަހީމް ވިދާޅުވި އެވެ. އަދި މިހުކުމާއިއެކު ރައީސް ޔާމީންނަށް ހައިކޯޓުން އިންސާފު ލިބޭނެކަމަށް އެތައްހާސް ބަޔަކު އުންމީދު ކުރަމުންދާކަމަށް އަބްދުއްރަހީމް ވިދާޅުވިއެވެ.
އޭނާ ވިދާޅުވީ ރާއްޖޭގެ ޝަރުއީ ދާއިރާ މިއަދުވަނީ ބާރާއި ނުފޫޒުގެ ތެރޭގައި ކަމަށެވެ. ޝަރުއީ މަރުހަލާއަށް އަދި ރާއްޖޭގެ ދާޚިލީ ކަންކަމަށް ބަސްކިޔައި ފާޑުކިޔަނީ މިއަދު ނުފޫޒުގަދަ ފަރާތްތަކުންކަމަށް އަބްދުއްރަހީމް ތުހުމަތު ކުރެއްވި އެވެ. އޭނާ ވިދާޅުވީ މި ނޫފޫޒާއި ބާރުވެރިކަމުން މި ޤައުމު ސަލާމަތްކޮށް ނާއިންސާފުން އަމަލުކުރަމުންދާ އެންމެންނާއިމެފު ޕީޕީއެމް ޕީއެންސީގެ ވެރިކަމެއްގައި އަޅަންޖެހޭ ޤާނޫނީ ފިޔަވަޅު އަޅާނެ ކަމަށެވެ.
މަނީ ލޯންޑަރިންގެ ކުށުގައި ރައީސް ޔަމީން ގެންދަވަނީ 5 އަހަރުގެ ޖަލު ހުކުމެއް ތަންފީޒުކުރައްވަމުންނެވެ. އަދި މި މައްސަލާގައި 5 މިލިއަން ރުފިޔާއިން ވަނީ ޖޫރިމަނާކޮށް އެ ފައިސާވެސް ދެއްކުމަށް ވަނީ ހުކުމްކޮށްފައެވެ.
މިނިސްޓްރީ އޮފް ޓޫރިޒަމްއާއި މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމް.އެމް.ޕީ.އާރް.ސީ) މެދުވެރިކޮށް ހިންގާފައިވާކަމަށް ތުހުމަތުކުރެވޭ ޚިޔާނާތުގެ ތެރެއިން ކުރީގެ ރައީސް ޢަބްދުﷲ ޔާމީނާއި އިތުރު 3 ފަރާތެއްގެ މައްޗަށް 591 މިލިއަނަށްވުރެ ގިނަ ރުފިޔާ ހޯދަން ދައުލަތުން ވަނީ ދަޢުވާކޮށްފައެވެ. އެހެންނަމަވެސް މި މައްސަލައިގެ އަޑުއެހުންތައް އަދި ފަށާފައެއްނުވެއެވެ.
ކޮމެންޓު ފޮނުވާ