އައިސިސް ޖަމާއަތުން ދިން ހަމަލާއެއްގައި، އިރާނުން ތާއީދުކުރާ، އިރާގުގެ ޕޮޕިއުލަރ މޮބިލައިޒޭޝަން ޔުނިޓް (PMU)ގެ 11 ހަގުރާމަވެރިއަކު މަރާލައިފިއެވެ.
އިރާގުގެ ފުލުހުން މައުލޫމާތު ދޭގޮތުގައި، މިމީހުން މަރުވެފައިވަނީ، އިރާގުގެ ވެރިރަށް ބައުދާދުގެ އުތުރުގައި، އައިސިސް ޖަމާއަތާއި، ހަޝުދު އަލް-ޝާބީގެ ނަން ދެވިފައިވާ މި ޖަމާއަތުގެ ހަގުރާމްވެރިންނާ ދެމެދު ބަދަލު ކުރެވުނު ހަމަލާތަކެއްގައެވެ.
އައިސިސް ޖަމާއަތުން (PMU)ގެ ހަގުރާމަވެރިންނަށް ހަމަލާ ދީފައިވަނީ، ރޭގަޑުގެ ވަގުތުގައި، އާދައިގެ ހަތިޔާރުތަކުގެ ބޭނުންކޮށްގެން، އިރާގުގެ ސަލާހުއްދީން ޕްރޮވިންސްގެ ވެރިރަށް ތިކްރީތުގެ އިރުމަތީ ސަރަހައްދެއްގައެވެ. މިހަމަލާ މިއައީ، އައިސިސް ޖަމާއަތުން އިރާގުގެ މާރުކޭޓެއްގައި ދިން ޖާނުން ފިދާވުމުގެ ހަމަލާއެއްގައި 32 މީހުން މަރާލިތާ 2 ދުވަސް ފަހުންނެވެ.
"އައިސިސްއިން ވަނީ، ހަޝުދު ޖަމާއަތުގެ 22 ވަނަ ބްރިގޭޑަށް އަމާޒުކޮށް ހަމަލާ ދީފަ،" އެ ޖަމާއަތުގެ އޮފިސަރެއްކަމުގައިވާ އަބޫ އަލް-މާލިކީ ވިދާޅުވެފައި ވެއެވެ.
އޭއެފްޕީއަށް މައުލޫމާތު ދެމުން އަލްމާލިކީ ބުނެފައިވަނީ، ފުލުހުންގެ އެހީތެރިކާމާއެކީ، މިހަމަލާ ހުއްޓުވުމުގެ ކުރިން، އައިސިސްއިން ދިން މިހަމަލާގައި (PMU)ގެ އިސް ކޮމާންޑަރަކުވެސް މަރުވެފައިވާ ކަމަށެވެ.
(PMU)ގެ ސަލާމަތީ ކަންކަމަކާ ގުޅޭ ފަރާތްތަކުން މައުލޫމާތު ދީފައިވާ ގޮތުގައި، މިހަމަލާގައި އެ ޖަމާއަތުގެ 11 މީހުން މަރުވެ، 10 ހަގުރާމަވެރިއަކު ޒަޚަމް ވެފައިވެއެވެ.
އެއްވެސް ޖަމާއަތަކުން މިހާތަނަށް މިހަމަލާގެ ޒިންމާ އުފުލާފައި ނުވިނަމަވެސް، އިރާގުގެ ސަލާމަތީ އިދާރާތަކުން ވަނީ، މިހަމަލާއަކީ އައިސިސްއިން ދީފައިވާ ހަމަލާއެއްކަމުގައި ބުނެފައެވެ.
Watch: A video shows the moment an explosion rocked a #Baghdad market leaving at least 13 people dead and more than 30 injured, according to security sources. https://t.co/FPp95vQSny pic.twitter.com/FGBdNkvK1S
— Al Arabiya English (@AlArabiya_Eng) January 21, 2021
އިރާގުގައި މިހާރު ފެތުރެމުންދާ ކޯވިޑް19ގެ ބަލިމަޑުކަމާއި ގުޅިގެންނާ، ސިޔާސީ ހަމަ ނުޖެހުންތަކާ، އަދި އާންމު ވަމުންދާ ކޮރަޕްޝަންގެ ސަބަބުން، އިރާގުގައި އިތުރުވަމުންދާ، ހަމަނުޖެހުންތައް ކޮންޓްރޯލްކުރުމުގައި، ސަލާމަތީ ބާރުތަކުގެ ގާބިލްކަމާމެދު ހުޅަގުގެ ގައުމުތަކުން މިހާރުދަނީ ސުވާލު އުފައްދަމުންނެވެ.
އައިސިސްއާ ދެކޮޅަށް 3 އަހަރުވަންދެން ހިންގި ބޮޑެ ހަގުރާމަވެރި ކެމްޕޭނަކަށްފަހު، 2017 ވަނަ އަހަރު އިރާގު ސަރުކާރުންވަނީ އެގައުމުގައި އައިސިސް ބަލިކުރެވިފައިވާކަން އިއުލާން ކޮށްފައެވެ.
އެހެންނަމަވެސް، އައިސް ޖަމާއަތުގެ ބާކީ ތިބި ބައެއް ކުދި ކުދި ޖަމާއަތްތައް ފަހުން ހަމަލާތައް ދީފައިވަނީ، ހަނަފަސް ސަހަރާތަކުންނާއި އަދި ފަރުބަދަތަކުގެ ސަރަހައްދުތަކުން، ސަލާމަތީ ބާރުތަކަށާއި އަދި ސަރުކާރުގެ މުވައްސަސާތަކަށް އަމާޒު ކޮށްގެންނެވެ. މިފަދަ ހަމަލާތަކުގައި ލިބިގެން ގޮސްފައިވަނި ނިސްބަތުން ކުޑަ ގެއްލުން ތަކެކެވެ.
