ސިޓީއާއި، ޔުނައިޓެޑަށްވެސް މޮޅެއް، ލީގުގެ ކުރި ޔުނައިޓެޑަށް

އިނގިރޭސި ޕްރިމިއާ ލީގުގައި ރޭ މެންޗެސްޓާރ ޔުނައިޓެޑާއި، މެންޗެސްޓާ ސިޓީ މޮޅުވެ، ޓެބަލްގެ ކުރީގައި ޔުނައިޓެޑް 2 ޕޮއިންޓް ލީޑެއް ނަގައިފިއެވެ.

މެންޗެސްޓަ ޔުނައިޓް މޮޅުވެފައިވަނީ ރޭ ޕައުލް ޕޮގްބާ ޖެހި ގޯލުން ފަހަތުން އަރައި 2-1 އިން ފުލަމް ބަލިކޮށްގެންނެވެ. ޔުނައިޓެޑް ރޭގެ މެޗަށް ނުކުތްއިރު އެ ޓީމު އޮތީ ތިން ވަނަ އަށް ވެއްޓިފަ އެވެ. ޔުނައިޓެޑުން އަލުން އެއް ވަނަ އަށް އެރީ 19 މެޗުން 40 ޕޮއިންޓް ހަމަކޮށްގެންނެވެ. ދެ ވަނައިގައި އޮތް ސިޓީ އަށް 18 މެޗުން 38 ޕޮއިންޓް ލިބިފައިވާއިރު، ތިން ވަނައިގައި އޮތް ލެސްޓާ އަށް ވެސް ވަނީ 19 މެޗުން 38 ޕޮއިންޓް ލިބިފަ އެވެ. ސިޓީ އަށް ކުރި ލިބެނީ ލަނޑުގެ ތަފާތުންނެވެ.

ރޭގެ މެޗުގައި ސިޓީން ލަނޑުޖަހަން ގިނަ ފުރުސަތުތަކެއް ތަނަވަސްކޮށް މޮޅަށް ކުޅެފައިވެއެވެ. ގޯލެއް ޖަހަން ކުރި މަސައްކަތް ސިޓީއަށް ކާމިޔާބުވީ މެޗުގެ 79 ވަނަ މިނިޓްގަ އެވެ. ބެނާޑޯ ސިލްވާ ޖެހި މި ގޯލު ބަލައިނުގަންނަން އެސްޓަން ވިލާ އިން ވަރަށް ބޮޑަށް އެޕީލްކުރި އެވެ.

އެ ގޯލު ބަލައިގަންނަން ނިންމުމުން އެކަމާ މެދު ތަކުރާރުކޮށް ހިތްހަމަނުޖެހުން ފާޅުކުރުމުން އެސްޓަން ވިލާގެ ކޯޗު ޑީން ސްމިތަށް ވަނީ ރަތް ކާޑު ދައްކައި ބެންޗުން ފޮނުވާލައިފަ އެވެ.