ވެލެންސިޔާ އަތުން މޮޅުވެ ދަ ގްރާންޑޭ ތިންވަނައަށް

ދިރާގު ދިވެހި ޕްރިމިއާ ލީގުގައި މިއަދު ހަވީރު ކްލަބް ވެލެންސިއާ 2-1 އިން ބަލިކޮށް ދަ ގްރާންޑޭ ސްޕޯޓްސް ކްލަބް ތިން ވަނަ އަށް ޖެހިލައިފި އެވެ.

މެޗު ފަށައިގެން ރަނގަޅު ކުޅުމެއް ދެއްކީ ދަ ގްރާންޑޭ އިންނެވެ. ގޯލު ޖަހާނެ ރަނގަޅު ފުރުސަތުތަކެއް ވެސް އެ ޓީމުން ތަަނަވަސްކުރި އެެވެ. އަނިޔާގެ ސަބަބުން ވެލެންސިއާގެ ކެޕްޓަން އަލީ އަޝްފާގު (ދަގަނޑޭ) ނުލައި ފެށިއިރު، އޭނާގެ ބަދަލުގައި ޓީމަށް އެރީ މެދުތެރެއަށް ކުޅޭ އަހުމަދު ޒާދު އެވެ. އެންމެ ކުރިއަށް ކުޅުނީ އަލީ ފާސިރު (ސެންޓޭ) އެވެ. ވެލެންސިއާގެ ފުރަތަމަ ހަމަލާ ފެނުނީ މެޗުގެ 14 ވަނަ މިނިޓްގަ އެވެ. ސްޕެއިނުގެ މިޑްފީލްޑަރު އެންޓޯނިއޯ ސޮލާ (ޓޯނީ) މަތިން ހުސްކޮށްލާފައި އޭރިއާތެރެއަށް ފޮނުވާލި ބޯޅަ ހޯދައި، ސެންޓޭ އެއް ފަހަރުން އެ ބޯޅަ ފޮނުވާލި ނަމަވެސް ދިޔައީ ހުރަސްދަނޑިމަތިންނެވެ.

ދެ ވަނަ ހާފްގެ ކުޅުން ފެށިގެން ފަސް މިނިޓް ތެރޭ އަޔާ ވަނީ ދަ ގްރާންޑޭއަށް ލީޑުނަގައިދީފަ އެވެ. އޭރިއާބޭރުން އަޔާ ޖެހި ބޯޅަ ގޯލުގެ ދުރު ކަނަށް ވަންއިރު ކީޕަރު ޗެކް ހުރީ ހަރަކާތް ހުއްޓިފަ އެވެ. ވެލެންސިއާ އިން ވަނީ ފަހު 25 މިނިޓަށް އަބްދުﷲ މިދުހަތު ފަހުމީ (ބިޗަޑް)ގެ ބަދަލުގައި ދަގަނޑޭ ކުޅެން އަރުވައިފަ އެވެ. ވެލެންސިއާގެ ކުޅުން އެ ފަހުން ރަނގަޅުވެ ހަމަލާތަކެއް ފެނިގެންދިޔަ އެވެ. ވެލެންސިއާ އިން އެއްވަރުކުރީ މެޗުގެ 86 ވަނަ މިނިޓްގަ އެވެ. ބަދަލު ކުޅުންތެރިއެއްގެ ގޮތުގައި ކުޅެން އެރި އަހުމަދު އިމާޒް (އާއްކޮ) ނަަގައިދިން ހުރަހަކުން ދަގަނޑޭ މި ގޯލު ޖެހީ ބޮލުންނެވެ.

ދަ ގްރާންޑޭ އަށް ދެ ވަނަ ފަހަރަށް ލީޑުނަގައިދިނީ އަހްރޯރް އެވެ. އޭރިއާތެރެއިން އަހްރޯރް ފޮނުވާލި ބޯޅަ ގޯލަށް ވަނީ ދަނޑީގައި ޖެހިފަ އެވެ. އިތުރުވަގުތުގައި ވެލެންސިއާ އިން ދެ ވަނަ ފަހަރަށް ނަތީޖާ ހަަމަހަމަކުރަން ލިބުނު ރަނުގެ ފުރުސަތު ނަގާލި އެވެ. ޕެނަލްޓީ އަކުން ސެންޓޭ ފޮނުވާލި ބޯޅަ އަމާޒުވީ ގޯލުގެ ހުރަސްދަނޑިއަށެވެ. މިއީ ދަގަނޑޭ ޖެހި ބޯޅައެއް ދަ ގްރާންޑޭގެ ކޮމިލޯފް އަބްދުރަސުލް އަތުގައި ޖެހުމުން ދިން ޕެނަލްޓީ އެކެވެ.

މިއަދުގެ މޮޅާ އެކީ ދަ ގްރާންޑޭ ތިން ވަނަ އަށް އެރީ ހަ މެޗުން ނުވަ ޕޮއިންޓް ހޯދައިގެންނެވެ. ވެލެންސިއާ ލީގުގައި ފުރަތަމަ ފަހަރަށް ބަލިވިއިރު އެ ޓީމަށް ވަނީ އެއް ވަނައިގައި އޮތް މާޒިޔާއާ ޕޮއިންޓުގެ ގޮތުން އެއްވަރުކުރަން އޮތް ފުރުސަތު ގެއްލިފަ އެވެ. މާޒިޔާ އެއް ވަނައިގައި އޮތީ ހަ މެޗުން 14 ޕޮއިންޓާ އެކު އެވެ. ވެލެންސިއާ ދެ ވަަނައިގައި އޮތީ ހަ މެޗުން 11 ޕޮއިންޓް ހޯދައިގެންނެވެ.