ކޮރަޕްޝަން ހުއްޓުވުމަށް ގުޅިގެން މަސައްކަތްކުރުމުގެ ފަހުމުނާމާއެއްގައި އެންޓި ކޮރަޕްޝަން ކޮމިޝަން (އޭސީސީ) އާއި ސްޓޭޓް އިލެކްޓްރިކް ކޮމްޕެނީ (ސްޓެލްކޯ) އިން މިއަދު ސޮއިކޮށްފި އެވެ.
ސްޓެލްކޯގެ ހެޑް އޮފީހުގައި ބޭއްވި ޚާއްޞަ ރަސްމިއްޔާތެއްގައި ސްޓެލްކޯގެ ފަރާތުން މި ފަހުމުނާމާގައި ސޮއިކުރެއްވީ އެ ކުންފުނީގެ މެނޭޖިންގ ޑިރެކްޓަރ ޑރ. އަލީ އަޒުވަރު އެވެ. އޭސީސީގެ ފަރާތުން ސޮއިކުރެއްވީ ކޮމިޝަނުގެ ރައީސް އާދަމް ޝާމިލް އެވެ.
ދެ މުއައްސަސާގެ ދެމެދުގައި ވެވުނު މި އެއްބަސްވުމުގެ އެންމެ މުހިންމު އެއް ބައެއްގެ ގޮތުގައި ހިމެނެނީ، އޭސީސީން ހިންގާ ތަޙުޤީޤުތަކުގައި ފަންނީ މަޢުލޫމާތާއި އިރުޝާދު ބޭނުންވެއްޖެ ޙާލަތެއްގައި، ސްޓެލްކޯގެ ތަޖުރިބާކާރު މުވައްޒަފުންގެ ފަރާތުން އެ އެހީތެރިކަން ފޯރުކޮށްދިނުމެވެ.
އެގޮތުން، ކޮރަޕްޝަނުގެ ޢަމަލުތައް ހުއްޓުވުމާއި، މިފަދަ ކުށްތަކާ މެދު މުވައްޒަފުންނާއި އާންމުން ހޭލުންތެރިކުރުވުމުގެ ގޮތުން ޚާއްޞަ ވޯކްޝޮޕްތަކާއި ތަމްރީނު ޕްރޮގްރާމްތައް ކުރިއަށްގެންދިއުމަށް ދެ މުއައްސަސާ ގުޅިގެން މަސައްކަތްކުރުމަށް ވެސް ފަހުމުނާމާގައި ވަނީ ކަނޑައަޅާފައެވެ.
ސްޓެލްކޯ އިން ބުނީ، މި އެއްބަސްވުމަކީ ކުންފުނީގެ ޚިދުމަތްތައް ހާމަކަން ބޮޑު، އިތުބާރު ހުރި ގޮތެއްގައި ފޯރުކޮށްދިނުމަށް ކުރެވޭ މަސައްކަތްތަކަށް ލިބުނު ބޮޑު ހިތްވަރެއް ކަމަށާއި، މީގެ ސަބަބުން އޭސީސީއާ އެކު އޮންނަ ގުޅުން މާ ބޮޑަށް ބަދަހިވެގެންދާނެ ކަމަށެވެ.
ކޮމެންޓު ފޮނުވާ