ވޯލްޑް ކަޕް ފައިނަލްގައި ސްޕެއިން އަތުން އާޖެންޓީނާ ބަލިވުމަށްފަހު، އެ ޓީމުގެ ކުޅުންތެރިން ހިންގި ހަމަނުޖެހުމުގެ މައްސަލަ ދުނިޔޭގެ ފުޓްބޯޅައިގެ މައި އިދާރާ ފީފާއިން ބަލަން ފަށައިފިއެވެ.
ނިއު ޖާޒީގެ މެޓްލައިފް ސްޓޭޑިއަމްގައި ރޭ ކުޅުނު ފޯރިގަދަ ފައިނަލްގައި، ސެމީ ފައިނަލްގައި އިނގިރޭސިވިލާތާ ދެކޮޅަށް ބޭނުންކުރި ފަދަ ވަރުގަދަ ފިޒިކަލް ގޭމެއް ކުޅެން އާޖެންޓީނާއިން މަސައްކަތް ކުރި ނަމަވެސް، ސްޕެއިނުން ވަނީ މުޅި މެޗުގެ ކޮންޓްރޯލް ނަގައިފައެވެ. އިތުރު ވަގުތުގެ ތެރޭގައި ބާސެލޯނާގެ ތަރި ފެރާން ޓޮރޭޒް ކާމިޔާބުކޮށްދިން ހަމައެކަނި ލަނޑާއެކު، 2010 ވަނަ އަހަރަށްފަހު ފުރަތަމަ ފަހަރަށް ސްޕެއިނުން ވޯލްޑް ކަޕް ތަށި އުފުލާލި އިރު، އުމުރުން 39 އަހަރުގެ ލިއޮނަލް މެސީ ފެނިގެންދިޔައީ ދަނޑުމަތީގައި ރޮމުން ދިޔަ ތަނެވެ.
މެޗު ނިމުމުގެ ކުރިން، ދެ ޓީމުގެ ކުޅުންތެރިންގެ މެދުގައި ބޮޑު ކުރިމަތިލުމެއް ހިނގައި، މި ހަމަނުޖެހުމުގެ ވީޑިއޯތައް މިހާރު ސޯޝަލް މީޑިއާގައި ދަނީ ދައުރުވަމުންނެވެ. މި ހަމަނުޖެހުމުގެ ތެރޭގައި އާޖެންޓީނާގެ މިޑްފީލްޑަރު ލިއަންދްރޯ ޕަރޭޑޭސް ސްޕެއިންގެ އެރިކް ގާސިއާގެ ކަރުގައި ހިފައި، ގަވީގެ މޫނުމަތީގައި ޖަހައި ބިމަށް ވައްޓާލި މަންޒަރު ފެނިގެންދިޔައެވެ. މި އަމަލާ ގުޅިގެން ރެފްރީ ވަނީ ޕަރޭޑޭސްއަށް ސީދާ ރަތް ކާޑު ދައްކާފައެވެ.
"ދަ ޓައިމްސް" އިން ރިޕޯޓްކޮށްފައިވާ ގޮތުގައި، ޕަރޭޑޭސްއަށް ދެއްކި ރަތް ކާޑާ ގުޅިގެން ފީފާއިން މިހާރު ވަނީ އޭނާއާ ދެކޮޅަށް ޑިސިޕްލިނަރީ ފިޔަވަޅު އެޅުމުގެ މައްސަލައެއް ފަށައިފައެވެ. މީގެ އިތުރުން މި ހަމަނުޖެހުމުގައި ބައިވެރިވި އާޖެންޓީނާގެ އެހެން ކުޅުންތެރިންނާއި އޮފިޝަލުންގެ ދައުރު ވެސް ފީފާއިން ދަނީ ވަރަށް ގާތުން ބަލަމުންނެވެ.
ކޮމެންޓު ފޮނުވާ