ޑިވެލޮޕްމަންޓް ބޭންކް އޮފް މޯލްޑިވްސް (ޑީބީއެމް) ގެ ހިއްސާ އެމެރިކާގެ ޖޭޕީ މޯގަންއަށް ވިއްކާލާފައިވާ ކަމަށް ފަތުރަމުންދާ ވާހަކަތަކަކީ އެއްވެސް ޙަޤީޤަތެއް ނެތް ވާހަކަތަކެއްކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ނޫސްވެރިންނާ ބައްދަލުކުރައްވައި ވާހަކަފުޅުދައްކަވަމުން ރައީސް ވިދާޅުވީ، މުޖުތަމަޢުގައި މިފަދަ ދޮގު ވާހަކަތަކާއި ގޮސިޕްތައް ފެތުރެމުންދާއިރު، އެކަންކަމުގެ ތެދުދޮގު އޮޅުންފިލުވުމަށް ނޫސްވެރިން ސުވާލުކުރާތީ އެކަމާ އުފާކުރައްވާ ކަމަށެވެ. އަދި ހަމައެހެންމެ، ރަސްމާލެއިން ޔޫއޭއީގެ ކުންފުންޏަކަށް ބިން ދޭން އުޅޭ ކަމަށް ދެކެވޭ ވާހަކަތައް ވެސް އެމަނިކުފާނު ވަނީ ދޮގުކުރައްވާފައެވެ. އަސާސެއް ނެތް މިފަދަ ވާހަކަތައް ފެތުރެމުންދާ މި ދަނޑިވަޅުގައި ސަރުކާރުގެ ސިޔާސަތުތައް ރައްޔިތުންނަށް ސާފުކޮށްދެއްވުމަށް ރައީސް ވަނީ ޚާއްޞަ އިސްކަމެއް ދެއްވާފައެވެ.
ރާއްޖޭގެ މާލީ ދާއިރާ ހަރުދަނާކޮށް، އިޤްތިޞާދު ސިންދަފާތު ކުރުމުގެ މުހިންމު މަޤްޞަދުގައި އުފެއްދި ޑިވެލޮޕްމަންޓް ބޭންކް އޮފް މޯލްޑިވްސް ރަސްމީކޮށް ހުޅުވާފައިވަނީ 16 ނޮވެމްބަރު 2024 ގައެވެ. މި ބޭންކަކީ ރާއްޖޭގެ އިޤްތިޞާދީ އަދި އުމްރާނީ ތަރައްޤީއަށް އިންވެސްޓުކޮށް، ބޮޑެތި މަޝްރޫޢުތަކަށް ބޭނުންވާ މާލީ އެހީތެރިކަން ފޯރުކޮށްދިނުމަށް ސަރުކާރުން ޚާއްޞަކޮށްގެން އުފައްދާފައިވާ މުއައްސަސާއެކެވެ.
ކޮމެންޓު ފޮނުވާ