ޢެމެރިކާގެ ރައީސް ޑޮނަލްޑް ޓްރަމްޕް އެގައުމުގެ ހައުސް އޮފް ރެޕްރެސެންޓޭޓިވްސްއިން ދެވަނަ ފަހަރަށް އިންޕީޗްކޮށް، އިތުބާރު ނެތްކަމަށް ފާސްކޮށްފިއެވެ.
ޓްރަމްޕްގެ އިތުބާރު ނެތްކަމަށް ދެވަނަ ފަހަރަށް އެމެރިކާގެ ގާނޫނު ހަދާ މަޖިލިހުގެ ތިރިގެ (ހައުސް އޮފް ރެޕްރެސެންޓޭޓިވްސް)އިން ފާސްކޮށްފައި މިވަނީ، މިމަހުގެ 6 ވަނަ ދުވަހު އެމެރިކާގެ ކެޕިޓަލް ހިލްއަށް އޭނާ އަށް ތާއީދުކުރާ ފަރާތްތަކުން ހަމާދިން ދިނުމުގައި ޓްރަމްގެ ބައިވެރިވުން އޮތްކަމަށް ބަލާ، މަގާމުން ދުރުކުރުމަށް މައްސަލަ އެމެރިކާގެ ސެނެޓަށް ފޮނުވުމަށްޓަކައެވެ.
ޑިމޮކްރެޓުންގެ މެޖޯރިޓީ އޮންނަ ހައުސް އޮފް ރެޕްރެސެންޓޭޓިވްސްއިން 2019 ވަނަ އަހަރުވެސް ޓްރަމްޕްގެ އިތުބާރު ނެތްކަމަށް ފާސްކޮށްފައި ވާއިރު، މިފަހަރުގެ އިމްޕީޗަމްންޓް ވޯޓަށް ޓްރަމްޕް ނިސްބަތްވާ ރިޕަބްލިކަން ޕާޓީގެ10 މެމްބަރަކުވެސް ވޯޓު ދީފައިވާކަން ފާހަގަ ކޮށްލެވެއެވެ.
މީގެތެރޭގައި ހިމެނޭ ބައެއް މެމްބަރުންނަކީ:
ލިޒް ޗޭނީ: ހައުސް އޮފް ރެޕްރެސެންޓޭޓިވްސްގައި ޑިމޮކްރަޓިކް ޕާޓީ ތަމްސީލުކުރާ ޗޭނީއަކީ، އިލެކްޓޯރަލް ވޯޓުން ބައިޑްން ހޯއްދެވި ކާމިޔާބީއާއި ދެކޮޅަށް ރިޕަބްލިކަން ޕާޓީގެ ބައެއް މެމްބަރުން ކުރެއްވި މަސައްކަތްތަކާ ދެކޮޅަށް އެންމެ ބޮޑަށް ހައުސް އޮފް ރެޕްރެސެންޓޭޓިވްސްގައި މަސައްކަތް ކުރެއްވި، ރިޕަބްލިކަން ޕާޓީއަށް ނިސްބަތްވާ އެންމެ ސީނިއަރ މެމްބަރެވެ.
އެޑަމް ކިންޒިންގަރ: ކިންޒިންގަރ އަކީ އަބަދުވެސް ޓްރަމްޕަށް ފާޑު ވިދާޅުވަމުން އައި މެމްބަރެކެވެ. އޭނާ ވިދާޅުވެފައިވަނީ، ޓްރަމްޕް ވަނީ އޭނާގެ ހުވައާއި ޚިލާފަށް، އެމެރިކާގެ ގާނޫނު ހަދާ މަޖިލީހަށް ހަމަލާ ދިނުމަށް އޭނާގެ ސަޕޯޓަރުންނަށް ހިތްވަރު ދީފައި ކަމުގައެވެ.
ޖޯން ކަޓކޯ: ކަޓކޯ އަކީ، ހައުސް އޮފް ރެޕްރެސެންޓޭޓިވްސްގައި ހިމެނޭ ރިޕަބްލިކަން ޕާޓީއަށް ނިސްބަތްވާ މެމްބަރުންގެ ތެރެއިން، ޓްރަމްޕްގެ އިތުބާރު ނެތްކަމަށް ވޯޓު ދެއްވާނެ ކަމަށް ވިދާޅުވި އެންމެ ފުރަތަމަ މެމްބަރެވެ.
ފްރެޑް އަޕްޓޮން: އަޕްޓޮން ވަނީ، އެމެރިކާގެ ރިޔާސީ އިންތިޚާބުގެ ނަތީޖާ އިއުލާން ކުރެވުނުތާ މާގިނަ ދުވަސްތަކެއް ނުވަނީސް، ފާއިތުވި ނޮވެމްބަރު މަހުގައި، އިންތިޚާބުގެ ނަތީޖާ އޮޅުވާލާފައިވާކަމުގެ އެއްވެސް ހެއްކެއް ޓްރަމްޕަށް ދެއްކިފައި ނުވާކަމަށް ވިދާޅުވެފައެވެ.
ޖެއިމް ހެރާރެ ބަޓްލަރ: ހެރާރެ ބަޓްލައަކީ ވޮޝިންގޓަން ސޭޓޭޓަށް ނިސްބަތްވާ، މެދުމިނަށް ތާއީދު ކުރައްވާ މެމްބަރެކެވެ. "އަހަރެން ދެކޭގޮތުގައި، ރައީސްގެ އަމަލްތަކަކީ، އަހަރެން ކިޔާފައިވާ ގާނޫނު އަސާސީއަށް ބަލާއިރު، އިތުބާރު ނެތްކަމުގެ ވޯޓަކަށް ދިއުމަށް ފުރުސަތު ލިބޭވަރުގެ ހެކި ހުރި ކަންކަން،" އޭނާ ނެރުއްވާފައިވާ ސްޓޭޓްމަންޓުގައި ވިދާޅުވެފައި ވެއެވެ.
އެމެރިކާގެ ގާނޫނު ހަދާ މަޖިލުހުގެ ތިރިގެއިން މި ހަފްތާގައި ދެވަނަ ފަހަރަށް ޓްރަމްޕްގެ މައްޗަށް އިތުބާރު ނެތްކަމުގެ ވޯޓު ނަގުމާ ގުޅިގެން، ޓްރަމްޕް ވެގެންދާނީ އެމެރިކާގެ ތާރީޚުގައި ދެފަރަހަށް އިމްޕީޗަމަންޓް ވޯޓު ރައީސަކާ ދެކޮޅަށް ނެގިގެންދިޔަ ހަމައެކަނި ރައީސްކަމުގައެވެ.
މެރިކާގެ ކޮންގްރެސްގެ ހައުސް އޮފް ރެޕްރެސެންޓޭޓިވްސް (ގާނޫނު ހަދާ މަޖިލިހުގެ ތިރިގެ)އިން، ޓްރަމްޕް މަގާމުން ދުކުރުމަށް، އެގައުމުގެ ނާއިބު ރައީސަށް ގޮވާލާ ގަރާރެ މީގެ އެއްދުވަސްކުރިން ވަނީ ފާސްކޮށްފައެވެ.
ކޮންގްރެސްގެ ހައުސް އޮފް ރެޕްރެސެންޓޭޓިވްސްއިންގެ މެމްބަރުން ޕާޓީ ލައިނުން ވޯޓުދީގެން ފާސްކުރި ގަރާރުގައި އެމެރިކާގެ ނާއިބު ރައީސް މައިކް ޕެންސަށް ގޮވާލާފައިވަނީ، ގާނޫނު އަސާސީއަށް ގެނެވިފައިވާ 25 ވަނަ އިސްލާހުގެ ބޭނުންކޮށްގެން، ރައީސް ޑޮނަލްޑް ޓަރަޕްމް މަގާމުން ދުރު ކުރުމަށެވެ.
އެމެރިކާގެ ގާނޫނު އަސާސީގެ 25 ވަނަ މާއްދާއަށް ގެނެވިފައިވާ އިސްލާހުގައި ވާގޮތުން، ނާއިބް ރައީސް ޕެންސް މިކަމަށް އިސްނަންގަވާ އަދި ކެބިނެޓް 8 ވަޒީރަކު ޕެންސްއާއި ގުޅިވަޑައިގެން ޓްރަމްޕާއި ދެކޮޅަށް ތެޖުވެއްޖެ ނަަމަ، ޓްރަމްޕް މަގާމުން ދުރުކުރުމުގެ ފުރުސަތު ލިބިގެންދެއެވެ.
އެހެންނަމަވެސް، ހައުސް އޮފް ރެޕްރެސެންޓޭޓިވްސްއިން ޓްރަމްޕް މަގާމުން ދުރުކޮށްދިނުމަށް ނައިބް ރައީސް ޕެންސަށް ގޮވާލާ ފާސްކޮށްފައިވާ މިގަރާރާ ޕެންސްވަނީ ދެކޮޅު ހައްދަވާފައެވެ. މީގެ ކުރިންވެސް ޕެންސް ވިދާޅުވެފައިވަނީ، މި ގަރާރަށް ތާއީދު ނުކުރައްވާނެ ކަމަށެވެ.
ހައުސް އޮފް ރެޕްރެސެންޓޭޓިވްސްއިން ޓްރަމްޕްގެ މައްޗަށް އިތުބާރު ނެތްކަމަށް ފާސްކޮށްފައި މިވަނީ ފާސްކުރި މިގަރާރަށް ޕެންސް ދެކޮޅު ހެއްދެވުމި ގުޅިގެންނެވެ.
ހައުސް އޮފް ރެޕްރެސެންޓޭޓިވްސްއިން ޓަރްމަޕްގެ މައްޗަށް އިތުބާރު ނެތްކަމަށް ފާސްކުރުމާ ގުޅިގެން، މިމައްސަލަ ދެން ދާނީ އެމެރިކާގެ ކޮންގްރެސްގެ ސެނެޓަށެވެ. ސެނެޓުން ޓަރަމްޕް މަގާމުން ދުރުކުރުމަށް ނިންމައިފިނަމަ، ޓްރަމްޕް އެމެރިކާގެ ރައީސްކަމުން ވަކިވާނެއެވެ. އެހެންމަވެސް، ޓްރަމްޕްގެ ދައުރުނިމެން ދެން އޮތީ އެންމެ8 ދުވަހެވެ.
