މީޑިއާތަކުގެ މައްސަލަތައް ބަލަން ހަގީގަތުގައި ބޭނުން ނުވި ނަމަވެސް، ޝަކުވާއެއް އަތުވެއްޖެނަމަ ނުވަތަ ގާނޫނީ ގޮތުން އެކަން ކުރަން ޖެހިއްޖެ ހާލަތެއްގައި މައްސަލަ ބަލަން މަޖުބޫރުވާ ކަމަށް މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަން (އެމްއެމްބީސީ) އިން ބުނެފިއެވެ.
އަލަށް އަމަލުކުރަން ފެށި "މީޑިއާ ކޮންޓްރޯލް" ގާނޫނުގެ ދަށުން އެކުލަވާލި ގަވާއިދާ ގުޅޭގޮތުން ޕީއެސްއެމްގެ ޕްރޮގްރާމެއްގައި ވާހަކަދައްކަވަމުން އެ ކޮމިޝަނުގެ ލީގަލް އޮފިސަރު އައިމިނަތު ރިފްގާ ވިދާޅުވީ، ކޮމިޝަނުގެ އަމާޒަކީ ނޫސްވެރިންގެ ހައްގުތައް ހިމާޔަތްކޮށް ޒިންމާދާރުކުރުވުން ކަމަށެވެ. އަދި މީޑިއާތަކުގެ މައްސަލަތައް ބެލުމަކީ ހަގީގަތުގައި ކުރަން ބޭނުންވާ ކަމެއް ނޫން ކަމަށާއި، ނަމަވެސް ބަޔަކު ޝަކުވާއެއް ހުށަހަޅައިފިނަމަ ނުވަތަ ގާނޫނުން އެ ފުރުސަތު އޮތުމުން ކޮމިޝަނުގެ އިސްނެގުމަށް ވެސް މައްސަލަތައް ބަލަން މަޖުބޫރުވަނީ ކަމަށް އޭނާ ފާހަގަކުރެއްވިއެވެ.
މީގެ އިތުރުން އެމްއެމްބީސީގެ ސީނިއާ ލީގަލް އޮފިސަރު ސަނިއްޔާ ހުސައިން ވަނީ، އިސްލާމްދީނާއި އިންސާނީ ހައްގުތަކަށް ހުރުމަތްތެރިކޮށް ހިތައިގެން ކޮންޓެންޓުތައް އުފެއްދުމަށް މީޑިއާތަކަށް އިލްތިމާސްކުރައްވާފައެވެ. ހަމައެއާއެކު، ސިޔާސީ ހަރަކާތްތަކާއި މުޒާހަރާތަކުގައި ވެސް މީހުންގެ ޒާތީ ދިރިއުޅުމަށް ފާޑުނުކިޔުމަށް އަންގައި އިލެކްޝަންސް ކޮމިޝަނުން ވެސް ދާދި ފަހުން ވަނީ އިދިކޮޅު ޕާޓީތަކަށް އަންގާފައެވެ. މިއީ މި ދުވަސްވަރު އެކި މުއައްސަސާތަކުން މިންގަނޑުތައް ހިފެހެއްޓުމަށް ބާރުއަޅަމުންދާ ކަމުގެ ހެއްކެކެވެ.
މީޑިއާ ކޮމިޝަނުން މިފަދައިން ވާހަކަދައްކާފައި މިވަނީ، ފުލުހުން "އަދަދު" ނޫހުގެ އޮފީހަށް ވަދެ ގިނަ އަދަދެއްގެ ސާމާނު ގެންގޮސް، އެ ނޫހުގެ ސީއީއޯ ހުސައިން ފިޔާޒް މޫސާއާއި އެޑިޓަރު ޙަސަން މުހައްމަދުގެ ޕާސްޕޯޓު ހިފަހައްޓާފައިވާ ދަނޑިވަޅެއްގައެވެ. މި މައްސަލައިގައި ނޫސްވެރިންގެ ޖަމިއްޔާތަކާއި ބައިނަލްއަގުވާމީ ފަރާތްތަކުން ކަންބޮޑުވުން ފާޅުކުރަމުންދާއިރު، ފުލުހުންގެ ތަހުގީގީ މިންގަނޑުތައް ކަނޑައެޅުމުގެ ގާނޫނީ ބާރު ނޯންނާނެ ކަމަށް ބުނެ އެމްއެމްބީސީން ވަނީ ބަޔާނެއް ވެސް ނެރެފައެވެ.
ކޮމެންޓު ފޮނުވާ