ދިވެހިރާއްޖޭގެ ޑިޖިޓަލް ތަރައްޤީގެ ދުވެލީގައި އަންހެން ކުދިންނަކީ އިސް ސަފުގައި ހަރަކާތްތެރިވާ މުހިންމު ބަޔަކަށް ވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގޮވާލައްވައިފިއެވެ.
ބައިނަލްއަޤްވާމީ ގޮތުން ފާހަގަކުރާ "ގާރލްސް އިން އައިސީޓީ ޑޭ" ގެ މުނާސަބަތުގައި ދެއްވި ޚިޠާބެއްގައި ރައީސް ވަނީ މިއަހަރުގެ ޝިޢާރު ކަމަށްވާ "އޭއައި ފޯރ ޑިވެލޮޕްމަންޓް: ގާރލްސް ޝޭޕިންގ ދަ ޑިޖިޓަލް ފިއުޗަރ" އަށް އަލިއަޅުވާލައްވާފައެވެ. މިގޮތުން، ޤައުމުގެ ތަޢުލީމީ ނިޒާމާއި، ޞިއްޙީ ދާއިރާގެ އިތުރުން ދައުލަތް ހިންގުމުގެ އޮނިގަނޑު ހަރުދަނާކުރުމަށްޓަކައި އާޓިފިޝަލް އިންޓެލިޖެންސް (އޭއައި) ގެ ބޭނުންތެރިކަން ބޮޑުކަން އެމަނިކުފާނު ފާހަގަކުރެއްވިއެވެ.
ރައީސް ވިދާޅުވި ގޮތުގައި ޓެކްނޮލޮޖީގެ ރޮނގުން އަންހެން ކުދިން ކުރިއަރައި ދިއުމަކީ ހަމައެކަނި ފަންނީ ގޮތުން ލިބޭ ކުރިއެރުމެއް ނޫނެވެ. އެއީ މުޖުތަމަޢުގައި އޮންނަ މިންތީގެ ތަފާތުތައް ނައްތާލައި، ޑިޖިޓަލް މާޙައުލެއްގައި އެންމެންނަށް ހަމަހަމަ ފުރުޞަތުތަކެއް ފަހިކޮށްދިނުމަށް އެޅޭ ވަރަށް މުހިންމު ފިޔަވަޅެކެވެ. ސަރުކާރުގެ "މޯލްޑިވްސް 2.0″ ސިޔާސަތުގެ ދަށުން އަމާޒު ހިފާފައިވަނީ ކޮމްޕިއުޓަރ ޕްރޮގްރާމިންގ، ރޮބޮޓިކްސް އަދި ޑިޖިޓަލް އިޤްތިޞާދު ފަދަ ދާއިރާތަކުން އަންހެން ކުދިން ބާރުވެރިކުރުވުމަށެވެ. އަދި އެކުދިންނަކީ ހަމައެކަނި ޓެކްނޮލޮޖީގެ ވަސީލަތްތައް ބޭނުންކުރާ ބައެއްގެ ބަދަލުގައި، އައު އީޖާދުތައް އުފައްދާ ބަޔަކަށް ހެދުމަކީ ސަރުކާރުގެ ބޮޑު އަމާޒެކެވެ.
މި ދުވަހާ ގުޅިގެން ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދުވެސް ވަނީ ޚާއްޞަ މެސެޖެއް ދެއްވައި، އައިސީޓީ ދާއިރާއިން ކުރިއަށް ދިއުމަށް އަންހެނުންނަށް ހިތްވަރު ދެއްވާފައެވެ. އެކަމަނާ ވަނީ ޓެކްނޮލޮޖީގެ ދާއިރާއިން އަންހެނުންނަށް ހުރި ހުރަސްތައް ނައްތާލައި، އެންމެން ޝާމިލުވާ ފަދަ ޑިޖިޓަލް ކުރިމަގަކަށް މަގުފަހިކުރުމަށް ހުރިހާ ފަރާތްތަކެއްގެ އެއްބާރުލުމަށް އެދިވަޑައިގެންފައެވެ.
ކޮމެންޓު ފޮނުވާ