އެމެރިކާގައި ބާއްވާ ވޯލްޑް ކަޕްގައި އިރާނުގެ ގައުމީ ފުޓުބޯޅަ ޓީމު ބައިވެރިވުމާމެދު ވަކި ގޮތެއް ނިންމާނީ އެ ޓީމުގެ ކުޅުންތެރިންގެ ސަލާމަތާއި ރައްކާތެރިކަން ކަށަވަރުވުމުން ކަމަށް އެ ގައުމުން ބުނެފިއެވެ.
އިރާނުގެ ސްޕޯޓްސް މިނިސްޓަރު އަހުމަދު ދުންޔާމަލީ ވިދާޅުވީ، މުބާރާތުގައި ވާދަކުރުމުގެ އެންމެ ފަހުގެ ނިންމުން ނިންމާނީ ސަރުކާރާއި އެ ގައުމުގެ ސުޕްރީމް ނޭޝަނަލް ސެކިއުރިޓީ ކައުންސިލްގެ ލަފާގެ މަތިން ކަމަށެވެ. އެމެރިކާ، މެކްސިކޯ އަދި ކެނަޑާ ގުޅިގެން ބާއްވާ މި މުބާރާތުގެ ގްރޫޕް ސްޓޭޖުގައި އިރާނުން ކުޅޭ ހުރިހާ މެޗެއްވެސް އެމެރިކާގެ ފަސްގަނޑުގައި ކުޅެން ހަމަޖެހިފައިވާއިރު، އެމެރިކާ އާއި އިޒްރޭލުން އިސްވެ ފެބްރުއަރީ މަހު ފެށި ހަނގުރާމައާ ގުޅިގެން މަސްރަހު ވަނީ ވަރަށް ބޮޑަށް ގޯސްވެފައެވެ.
ޕާކިސްތާނު މެދުވެރިވެގެން ގެނައި ދެ ހަފުތާގެ ހަމަލާ ބަދަލުކުރުން ހުއްޓާލުމުގެ އެއްބަސްވުމުގެ މުއްދަތު ހަމަވެފައިވީ ނަމަވެސް، އަދި އެއްވެސް ފަރާތަކުން ހަމަލާއެއް ދީފައެއް ނުވެއެވެ. އަދި އެމެރިކާގެ ރައީސް ޑޮނަލްޑް ޓްރަމްޕް އަންނަނީ ސުލްހައިގެ މުއްދަތު އިތުރުކުރުމާ ގުޅޭގޮތުން ވާހަކަދައްކަވަމުންނެވެ. މަސްރަހު ނާޒުކު ފައްތަރެއްގައި އޮތް ނަމަވެސް، މުބާރާތުގައި ބައިވެރިވާން ނިންމައިފި ހާލަތަކަށްޓަކައި އިރާނުގެ ގައުމީ ޓީމުން އަންނަނީ ފަރިތަކުރުންތައް މެދުކެނޑުމެއްނެތި ކުރިއަށް ގެންދަމުންނެވެ.
ސަލާމަތީ ސަބަބުތަކަށްޓަކައި އިރާނުގެ މެޗުތައް އެމެރިކާއިން ބޭރަށް ބަދަލުކޮށްދޭން އެ ގައުމުގެ ފުޓްބޯޅަ ފެޑަރޭޝަނުން އެދުނު ނަމަވެސް ފީފާއިން ވަނީ އެކަމަށް ދެކޮޅު ހަދާފައެވެ. ފީފާގެ ރައީސް ޖިއާނީ އިންފަންޓީނޯ ވިދާޅުވީ އިރާނުން މުބާރާތުގައި ބައިވެރިވާނެކަމުގެ ފުރިހަމަ ޔަގީންކަން އެބައޮތް ކަމަށާއި، ކޮލިފައިވެފައިވާ ޓީމެއްގެ ހައިސިއްޔަތުން ކުޅުންތެރިންވެސް ކުޅެން ބޭނުންވާނެ ކަމަށެވެ. ނަމަވެސް ރައީސް ޓްރަމްޕް މީގެ ކުރިން ވަނީ، ކުޅުންތެރިންގެ ފުރާނައިގެ ސަލާމަތަށްޓަކައި އިރާނުން މުބާރާތުގައި ބައިވެރިވުމަކީ އެންމެ އެކަށީގެންވާ ގޮތް ކަމަށް ގަބޫލުނުކުރައްވާ ކަމަށް ވިދާޅުވެފައެވެ.
މުބާރާތުގައި އިރާނުން ކުޅޭ ފުރަތަމަ މެޗުގައި ޖޫން 15 ގައި ނިއުޒީލެންޑާ ދެކޮޅަށް ނުކުންނައިރު، ޖޫން 21 ގައި ނުކުންނާނީ ބެލްޖިއަމްއާ ދެކޮޅަށެވެ. މި ދެ މެޗުވެސް ކުޅުމަށް ހަމަޖެހިފައިވަނީ އެމެރިކާގެ ލޮސް އެންޖެލިސްގައެވެ.
ކޮމެންޓު ފޮނުވާ