އެމެރިކާގެ ހަނގުރާމަމަތީ ދެ މަތިންދާބޯޓެއް ސްރީލަންކާގެ މަޓަލާ އެއާޕޯޓަށް ޖެއްސުމަށް އެދުމުން، އެކަމުގެ ހުއްދަ ދިނުމަށް ލަންކާ ސަރުކާރުން ދެކޮޅުހަދައިފިއެވެ.
މިކަން ހާމަކުރެއްވީ ލަންކާގެ ރައީސް އަނޫރާ ކުމާރަ ދިސާނަޔަކަ މިއަދު އެ ޤައުމުގެ ޤާނޫނުހަދާ މަޖިލީހުގައި ވާހަކަފުޅު ދައްކަވަމުންނެވެ. ޖިބޫޓީގައި އޮތް އެމެރިކާގެ މި ބޯޓުތައް ލަންކާއަށް ޖެއްސުމުގެ ހުއްދައަށް އެދިފައިވަނީ މި މަހުގެ 4 އަދި 8 ވަނަ ދުވަހުއެވެ. ނަމަވެސް، ޤައުމުގެ ޚާރިޖީ ސިޔާސަތަށް ރިއާޔަތްކޮށް ލަންކާއިން ވަނީ މި ދެ ފަހަރުވެސް ހުއްދަ ދޫކުރުމަށް އިންކާރުކޮށްފައެވެ.
ލަންކާގެ ދިފާއީ ބާރުތަކުން މައުލޫމާތުދޭ ގޮތުގައި، ޖައްސަން އުޅުނު ދެ ބޯޓަކީ ބޯޓުފަހަރަށް ހަމަލާދޭ އަށް މިސައިލް ހަރުކޮށްފައިވާ ދެ ބޯޓެވެ. ހަތިޔާރު އެޅި މިފަދަ އަސްކަރީ ބޯޓުތަކަށް އެ ޤައުމުގެ އެއާޕޯޓުތައް ބޭނުންކުރުމުގެ ފުރުސަތު ނުދިނުމަކީ ޤައުމީ ސަލާމަތާ ގުޅިފައިވާ މުހިންމު ނިންމުމެކެވެ. ރައީސް ދިސާނަޔަކަ ވިދާޅުވީ، ބޭރުގެ ފިއްތުންތައް ހުރި ނަމަވެސް، މެދުއިރުމަތީގެ މައްސަލަތަކުގައި ލަންކާ ދެމިއޮންނާނީ ވަކި ފަރާތަކަށް ނުޖެހޭ މިނިވަން ޤައުމެއްގެ ގޮތުގައެވެ.
ލަންކާ ސަރުކާރުގެ މި ނިންމުން އިއުލާންކޮށްފައި މިވަނީ، އެމެރިކާގެ ހާއްސަ މަންދޫބަކާއެކު ވިޔަފާރީގެ މުހިންމު މަޝްވަރާތަކެއް ކުރިއަށްގެންދިޔަތާ އެއް ދުވަސް ފަހުންނެވެ. މިކަމުން ދޭހަކޮށްދެނީ، އިޤުތިޞާދީ ގުޅުންތައް ބޭއްވި ނަމަވެސް، ބޭރުގެ އަސްކަރީ ބޭނުންތަކަށް ލަންކާގެ ބިން ބޭނުންކުރުމުގެ ފުރުސަތު ނުދޭނެކަމެވެ.
ކޮމެންޓު ފޮނުވާ