އީރާނުން ގަލްފުގެ ހަކަތައިގެ މަރުކަޒުތަކަށް ޙަމަލާދިނުމާއެކު، ޤަތަރުން އީރާނު އެމްބަސީގެ މުވައްޒަފުން ބޭރުކުރަނީ

އެމެރިކާގެ އެހީތެރިކަމާއެކު ޔަހޫދީ ދައުލަތުން ދިން ޙަމަލާއެއްގެ ބަދަލުހިފުމުގެ ގޮތުން، އީރާނުން ގަލްފުގެ ޤައުމުތަކުގެ ތެލާއި ގޭސް އުފައްދާ މަރުކަޒުތަކަށް ވަރުގަދަ ޙަމަލާތަކެއް ދީފިއެވެ. މިއާއެކު ޤަތަރުން ވަނީ އެ ޤައުމުގައި ތިބި އީރާނުގެ ޑިޕްލޮމެޓުން 24 ގަޑިއިރު ތެރޭގައި ފޭބުމަށް އަންގާފައެވެ.

ޤަތަރުގެ ޚާރިޖީ ވުޒާރާއިން ހާމަކޮށްފައިވާ ގޮތުގައި، އީރާނުގެ މި ޙަމަލާތަކުގައި ދުނިޔޭގެ އެންމެ ބޮޑު ގޭސް އުފައްދާ މަރުކަޒު ކަމަށްވާ 'ރާސު ލިއްފާން' އަށް ވަނީ ބޮޑެތި ގެއްލުންތަކެއް ލިބިފައެވެ. އެތަނުގައި ރޯވި އަލިފާންގަނޑު މިހާރު ކޮންޓްރޯލް ކުރެވިފައިވާއިރު، އެއްވެސް މީހެއްގެ ފުރާނައަށް ގެއްލުމެއް ލިބިފައެއް ނުވެއެވެ. މީގެ އިތުރުންވެސް ޤަތަރުގެ އެހެން މަރުކަޒުތަކަށް ޙަމަލާދޭން އީރާނުން މަސައްކަތްކޮށްފައިވާކަން ފާހަގަކޮށް، އެ ވުޒާރާއިން ވަނީ އެކަން ހަރުކަށި އިބާރާތުން ކުށްވެރިކޮށްފައެވެ. ޤަތަރުގެ އިތުރުން ސަޢުދީ ޢަރަބިއްޔާ އާއި ޔޫއޭއީގެ ހަކަތައިގެ ބިނާރުތަކަށްވެސް ޙަމަލާދީފައިވާކަން އެ ޤައުމުތަކުން ވަނީ ކަށަވަރުކޮށްދީފައެވެ.

މިކަމާ ގުޅިގެން އީރާނުން ބުނެފައިވަނީ، މިއީ އެމެރިކާގެ މަދަދާއެކު އިސްރާއީލުން އީރާނުގެ 'ދެކުނު ޕާސް' ގޭސް ދަނޑަށް ދިން ޙަމަލާގެ ޙައްޤު ބަދަލު ކަމަށެވެ. އަދި އީރާނުގެ އިންފްރާސްޓްރަކްޗަރަށް އިތުރަށް ޙަމަލާދޭނަމަ، މުޅި މެދުއިރުމަތީގެ ހަކަތައިގެ ސިނާއަތް އެއްކޮށް ފުނޑުފުނޑުކޮށްލާނެ ކަމުގެ ހަރުކަށި އިންޒާރުވެސް އެ ޤައުމުން ވަނީ ދީފައެވެ.

އީރާނުގެ މި ޢަމަލުތަކާއެކު މެދުއިރުމަތީގެ މަސްރަޙު އިންތިހާއަށް ނުރައްކާތެރި ފައްތަރަކަށް ވެއްޓިފައިވާކަމަށް ޤަތަރުން ސިފަކޮށްފައިވާއިރު، އެ ޤައުމުން ވަނީ ވަގުތުން ފިޔަވަޅުތަކެއް އަޅަން ފަށާފައެވެ. އެގޮތުން، ޤަތަރުގައި ހުންނަ އީރާނު އެމްބަސީގެ މުވައްޒަފުންނަށް ޤައުމު ދޫކޮށް ދިޔުމަށް މުހުލަތެއް ދީފައިވީ ނަމަވެސް، ރަސްމީކޮށް ސިޔާސީ ގުޅުން އަދި ކަނޑާލާފައެއް ނުވެއެވެ.

މިދިޔަ ފެބްރުއަރީ މަހުގެ 28 ވަނަ ދުވަހު ފެށުނު މި ނުރައްކާތެރި ހަނގުރާމައާ ގުޅިގެން ދުނިޔޭގެ އިޤުތިޞާދަށް ދަނީ ބޮޑެތި ލޮޅުންތަކެއް އަރަމުންނެވެ. މިހާރުވެސް ދުނިޔޭގެ ބާޒާރުގައި ސާފުނުކުރާ ތެޔޮ ފީފާއެއްގެ އަގު 108 ޑޮލަރަށްވުރެ މައްޗަށް އަރާފައިވާއިރު، އެމެރިކާގައި ޑީސަލްގެ އަގު ވަނީ 5 ޑޮލަރަށްވުރެ މައްޗަށް ގޮސްފައެވެ. މާހިރުން ލަފާކުރާ ގޮތުގައި ގަލްފުގެ ހަކަތައިގެ މަރުކަޒުތަކަށް އަމާޒުކޮށް މިފަދަ ޙަމަލާތައް ދޭން ފަށައިފިނަމަ، ސަޕްލައިއަށް ބުރޫއަރައި ތެލާއި ގޭހުގެ އަގުތައް އިންތިހާއަށް އުފުލިގެންދާނެއެވެ.