ރިޔާސީ އިންތިހާބާއި ރައްޔިތުންގެ މަޖިލިސް އިންތިހާބު ތަފާތު ދެ ދުވަސްވަރެއްގައި ބޭއްވުމަކީ ގައުމުގެ ހަމަޖެހުން ގެއްލިދާނެ ކަމެއް ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ޕީއެންސީގެ "ދަ ގްރޭޓާ އައްޑޫ" ކެމްޕެއިން އިފުތިތާހުކުރުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން ރައީސް ވިދާޅުވީ، ސަރުކާރުން މަސައްކަތްކުރަނީ އިދިކޮޅު ފަރާތްތަކުން ބުނާ ފަދައިން ދެ އިންތިހާބު އެއްކޮށްލަން ނޫން ކަމަށާއި، އޭގެ ބަދަލުގައި މަސައްކަތްކުރައްވަނީ ދެ އިންތިހާބު އެއް ދުވަހެއްގައި ބޭއްވުމަށް ކަމަށެވެ. އެގޮތަށް އެކަން ކުރުމަށްޓަކައި، ހިނގަމުންދާ މަޖިލީހުގެ ދައުރު ކުރުކުރުމާ މެދު ރައްޔިތުންނަށް ފެންނަ ގޮތެއް ބެލުމަށް ވޯޓަކަށް ދާން ނިންމަވާފައިވާކަން އެމަނިކުފާނު ފާހަގަކުރެއްވިއެވެ.
ދެ އިންތިހާބު އެއް ދުވަހެއްގައި ބޭއްވުމުގެ އެންމެ ބޮޑު އެއް ބޭނުމަކީ ވީހާވެސް ގިނަ ރައްޔިތުންނަށް ވޯޓުލުމުގެ ފުރުސަތު ހޯދައިދިނުން ކަމަށް ރައީސް ވިދާޅުވިއެވެ. ރިޔާސީ އިންތިހާބާ ހިލާފަށް މަޖިލިސް އިންތިހާބުގައި ވޯޓުލާ މީހުންގެ ނިސްބަތް އާންމުކޮށް މަދުކަން ފާހަގަކުރައްވައި، ރައީސް ވިދާޅުވީ ގިނަ ބަޔަކު ނުކުމެ މަންދޫބުން ހޮވުމަކީ ޑިމޮކްރަސީ އިތުރަށް ފައްކާވެގެންދާނެ ކަމެއް ކަމަށެވެ. އަދި ދެ އިންތިހާބު ދެ އިރެއްގައި ބޭއްވުމުން ލިބޭ ގެއްލުން ބޮޑުކަމަށާއި، އޭގެ ސަބަބުން ގައުމުގެ ސިޔާސީ ހަމަޖެހުން ގެއްލިގެންދާކަން އެމަނިކުފާނު ފާހަގަކުރެއްވިއެވެ.
ރައީސް އިތުރަށް ވިދާޅުވީ، އެމަނިކުފާނުގެ އެންމެ ބޮޑު އެއް ސިޔާސަތަކީ ގައުމުގައި ހަމަޖެހުން ގާއިމުކުރުން ކަމަށާއި، ސިޔާސީ ބޭނުމެއްގައި އެއްވެސް މީހަކު ޖަލަށް ނުލާނެކަމުގެ ޔަގީންކަން ދެއްވާ ކަމަށެވެ. ނަމަވެސް ސަރުކާރުގެ ކުރީކޮޅު، އޭރު އޮތް މަޖިލީހުގެ ތެރެއިން ސަރުކާރުގެ މަސައްކަތްތަކަށް ގިނަ ހުރަސްތަކެއް އަޅައި، ރައްޔިތުންގެ ނިންމުން ބޮލާލައިޖަހަން އުޅުނުކަން އެމަނިކުފާނު ހަނދާންކޮށްދެއްވިއެވެ.
ދެ އިންތިހާބު އެއް ދުވަހެއްގައި ބޭއްވުމަށް ގާނޫނުއަސާސީއަށް ގެންނަންޖެހޭ ބަދަލު މަޖިލީހުން ފާސްކޮށްފައިވާއިރު، މިކަމަށް ރައްޔިތުންގެ ރުހުން ހޯދުމަށް ނަގާ އާންމު ވޯޓު ކުރިއަށް އޮތް ލޯކަލް ކައުންސިލް އިންތިހާބާ އެކު ކުރިއަށް ގެންދިއުމަށް ވަނީ ހަމަޖެހިފައެވެ. މި ބަދަލުގެ ސަބަބުން ދައުލަތުގެ ބަޖެޓުން ގާތްގަނޑަކަށް 80 މިލިއަން ރުފިޔާ ސަލާމަތްކުރެވޭނެ ކަމަށްވެސް ސަރުކާރުން ވަނީ ހާމަކޮށްފައެވެ.
ކޮމެންޓު ފޮނުވާ