އީރާނުގެ ޤަޝްމްގައި ހުރި ފެން އުފައްދާ ކާރުޚާނާއަކަށް އެމެރިކާއިން ދިން ހަމަލާއެއްގެ ބަދަލުހިފުމުގެ ގޮތުން، ބަހްރައިންގައި ހުންނަ އެމެރިކާގެ އަސްކަރީ މަރުކަޒަށް އީރާނުން މިސައިލް ހަމަލާތަކެއް ދީފިއެވެ.
އީރާނުގެ ރިވޮލިއުޝަނަރީ ގާޑް ކޯޕްސް (އައިއާރުޖީސީ) އިން ހާމަކޮށްފައިވާ ގޮތުގައި، ބަހްރައިންގެ ޖުއްފާރުގައި ގާއިމުކޮށްފައިވާ އެމެރިކާގެ ބޭސްއަށް މިރޭ ދިން މި ހަމަލާތަކުގައި ބޭނުންކޮށްފައިވަނީ ސޮލިޑް އަދި ލިކުއިޑް ފިއުލް މިސައިލްތަކެކެވެ. މިއީ އެމެރިކާއިން ދާދި ފަހުން އީރާނަށް ދިން ހަމަލާއަށް ސީދާ ރައްދު ދިނުމުގެ ގޮތުން ކުރިއަށްގެންދިޔަ އޮޕަރޭޝަނެއްކަމަށް އެ ފަރާތުން ބުނެފައިވެއެވެ.
މި މައްސަލައާ ގުޅިގެން އީރާނުގެ ފޮރިން މިނިސްޓަރު އައްބާސް އަރާޣްޗީ ވިދާޅުވީ، އެމެރިކާއިން ޤަޝްމްގެ ޑީސެލިނޭޝަން ޕްލާންޓަށް ދިން ހަމަލާގެ ސަބަބުން އެ ސަރަހައްދުގެ 30 އަވަށަކަށް ފެން ފޯރުކޮށްދިނުމުގެ ނިޒާމަށް ބޮޑެތި ގެއްލުންތަކެއް ލިބި، ރައްޔިތުންނަށް ދަތިތަކަކާ ކުރިމަތިވެފައިވާ ކަމަށެވެ.
އީރާނުގެ މި ކުއްލި ހަމަލާއާ ގުޅިގެން ބަހްރައިންގެ އިންޓީރިއާ މިނިސްޓްރީން ވަނީ ސޯޝަލް މީޑިއާ ޕްލެޓްފޯމް 'އެކްސް' ގައި އާންމުންނަށް ސަމާލުވުމަށް އަންގާފައެވެ. އެގޮތުން، ހަމަލާގެ ނުރައްކަލާއެކު މުޅި ގައުމުގައި އެއާ ރެއިޑް ސައިރެންތައް އެކްޓިވޭޓްކޮށްފައިވާކަން ހާމަކޮށް، ރައްކާތެރިކަން ކަށަވަރުކުރުމަށްޓަކައި ވީއެންމެ އަވަހަކަށް ރައްކާތެރި ހިޔާވަހިކަން ހޯދުމަށް އެ މިނިސްޓްރީން ވަނީ އެ ގައުމުގެ ރައްޔިތުންނަށް އިލްތިމާސްކޮށްފައެވެ.
ކޮމެންޓު ފޮނުވާ