ކަނޑުމަގުން ރާއްޖެއަށް އެތެރެކުރި 29 މިލިއަން ރުފިޔާގެ މަސްތުވާތަކެތީގެ މައްސަލައިގައި ހައްޔަރުކުރި މީހެއްގެ ބަންދުގެ މުއްދަތު ކޯޓުން އަނެއްކާވެސް އިތުރުކޮށްފިއެވެ.
މިދިޔަ ފެބްރުއަރީ މަހުގެ ތެރޭގައި ރާއްޖެއިން ބޭރުން މާލޭގެ ވިޔަފާރިވެރިންގެ ބަނދަރަށް ގެނައި މުދާ ޝިޕްމެންޓެއް ބަލައި ފާސްކުރުމުގެ ތެރޭގައި ކަސްޓަމްސްއިން އަތުލައިގަތް މި ތަކެއްޗަކީ ހަޝިޝް އޮއިލް ކަމަށް ބެލެވޭ ތަކެއްޗެވެ. މި ތަކެތީގެ ބަރުދަނުގައި 36.4 ކިލޯގްރާމް ހުރިއިރު، މީގެ މަގުމަތީ އަގު 29 މިލިއަން ރުފިޔާއަށްވުރެ މައްޗަށް އަރާނެކަމަށް ކަމާބެހޭ ފަރާތްތަކުން ލަފާކުރެއެވެ. ކަސްޓަމްސްއިން އާންމުކޮށްފައިވާ ފޮޓޯތަކުން ފެންނަ ގޮތުގައި މި ތަކެތި ރާއްޖެއަށް އެތެރެކުރަން މަސައްކަތްކޮށްފައިވަނީ ރަބަރު ޕެކެޓުތަކެއްގައި ބަންދުކޮށްގެންނެވެ.
އާންމު މުދާތަކެއްގެ ތެރޭގައި ފޮރުވައިގެން ރާއްޖެއަށް މަސްތުވާތަކެތި އެތެރެކޮށް ޓްރެފިކް ކުރިކަމުގެ ތުހުމަތުގައި ފުލުހުންވަނީ ދެ މީހަކު ހައްޔަރުކޮށްފައެވެ. އެއީ މ. މުލައް، މަދާރުގެ، އުމުރުން 26 އަހަރުގެ ހަސަން މަފާޒު އާއި ހ. ފިލްމީސައިޓް، އުމުރުން 35 އަހަރުގެ ވިޝާމް މުހައްމަދެވެ. މީގެ ތެރެއިން މިއަދު ބަންދުގެ މުއްދަތު އިތުރުކޮށްފައިވަނީ ވިޝާމް މުހައްމަދުގެއެވެ.
ކޮމެންޓު ފޮނުވާ