ބަންޑާރަ މިސްކިތް ހުރި ބިމުގައި ޒަމާނީ ބޮޑު މިސްކިތެއް ބިނާކުރަން ނިންމެވި ނިންމެވުމަށް އާންމުންގެ ފާޑުކިޔުން އަމާޒުވުމާއެކު، އެކަމުގައި އިތުރަށް މަޝްވަރާކުރައްވަން އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ނިންމަވައިފިއެވެ.
އިސްލާމިކް މިނިސްޓްރީގެ މީޑިއާ ގްރޫޕުގައި މީގެ ކުރިން މިނިސްޓަރު ވިދާޅުވެފައިވަނީ، ހެޔޮއެދޭ ފަރާތެއްގެ އެހީގައި ރޯދަމަހުގެ ފަހުން އެތަނުގައި އާ މިސްކިތެއް އެޅުމުގެ މަސައްކަތް ފައްޓަވާނެ ކަމަށެވެ. ނަމަވެސް މި ޚަބަރާއެކު ތާރީޚު ދިރާސާކުރާ ފަރާތްތަކާއި އާންމު ރައްޔިތުން ވަނީ އެކަމާ ދެކޮޅަށް ވަރަށް ބޮޑަށް ކަންބޮޑުވުން ފާޅުކޮށްފައެވެ.
އާންމުންގެ ފާޑުކިޔުންތަކާ ގުޅިގެން "އެކްސް" ގައި ކުރެއްވި ޕޯސްޓެއްގައި ޝަހީމް ވިދާޅުވީ، އެތަނުގައި އާ މިސްކިތެއް އަޅަން ނިންމެވީ އެއީ އާސާރީ ތަރިކައިގެ ލިސްޓުގައި ހިމެނޭ ތަނަކަށް ނުވާތީ ކަމަށެވެ. އެހެންނަމަވެސް، މިނިސްޓްރީން އަބަދުވެސް އަމަލުކުރާނީ ރައްޔިތުންގެ އަޑުއަހައިގެން ކަމަށާއި، އެހެންކަމުން އާ މިސްކިތް ބިނާކުރުމާމެދު ފުޅާ ދާއިރާއެއްގައި އިތުރަށް މަޝްވަރާކުރައްވަން ބޭނުންފުޅުވާ ކަމަށް އެމަނިކުފާނު ވިދާޅުވިއެވެ.
މީގެ ސަތޭކަ ވަރަކަށް އަހަރު ކުރިން މާލޭގެ އުތުރު ފަރާތުގައި ބިނާކުރި މި މިސްކިތަކީ ތާރީޚީ ގޮތުން މުހިންމު ތަނެކެވެ. މީގެ ކުރިން "ބުމްބާ މިސްކިތް" ގެ ނަމުން ނަންދެވިފައިވާ މި ތަނުގެ ނަން "ބަންޑާރަ މިސްކިތް" ގެ ނަމަށް ބަދަލުކުރީ އޭގެ ފަހުންނެވެ.
ކޮމެންޓު ފޮނުވާ