މާލޭ ބަންޑާރަ މިސްކިތް ތަޅާލައި އެތަނުގައި އައު މިސްކިތެއް ބިނާކުރުމަށް ސަރުކާރުން ނިންމުމާ ގުޅިގެން އާންމުން ފާޅުކުރަމުންދާ ކަންބޮޑުވުންތަކަށް ރިއާޔަތްކޮށް، ކަންކަން ކުރިއަށް ގެންދާނީ ރައްޔިތުންގެ އަޑުއެހުމަށްފަހުކަމަށް އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.
ވަޒީރު މިހެން ވިދާޅުވީ، ބަންޑާރަ މިސްކިތް ހުރި ބިމުގައި ޒަމާނީ ބޮޑު މިސްކިތެއް އެޅުމަށް ހަމަޖެހިފައިވާކަން މިއަދު އިއުލާންކުރެއްވުމާ ގުޅިގެންނެވެ. މި އިއުލާނާއެކު ސޯޝަލް މީޑިއާގައި ގިނަ ބަޔަކު ވަނީ އެ މިސްކިތަކީ އާސާރީ ތަނެއްކަމަށް ބުނެ، އެތަން ނައްތާލުމާ ދެކޮޅަށް ޝުއޫރު ފާޅުކޮށްފައެވެ.
އާންމުންގެ މި ކަންބޮޑުވުންތަކަށް ޖަވާބުދެއްވަމުން ޑރ. ޝަހީމް ވިދާޅުވީ، ރާއްޖޭގެ ރަސްމީ އާސާރީ ތަރިކައިގެ ލިސްޓުގައި ބަންޑާރަ މިސްކިތް ހިމެނިފައި ނުވާކަމަށެވެ. އެތަނުގައި ބޮޑު މިސްކިތެއް ބިނާކުރަން ނިންމީ އެ ސަބަބަށްޓަކައި ކަމަށްވީ ނަމަވެސް، ވުޒާރާއިން އަބަދުވެސް މަސައްކަތްކުރާނީ ރައްޔިތުންގެ ޚިޔާލާ އެއްގޮތަށް ކަމަށް އެމަނިކުފާނު ވިދާޅުވިއެވެ. އަދި އައު މިސްކިތް ބިނާކުރުމާމެދު ފުޅާ ދާއިރާއެއްގައި މަޝްވަރާކުރައްވާނެ ކަމުގެ ޔަގީންކަންވެސް ވަޒީރު ވަނީ ދެއްވާފައެވެ.
ބަންޑާރަ މިސްކިތުގެ އިތުރުން މާލޭ ޒިކުރާ މިސްކިތް ހުރި ބިމުގައިވެސް ޒަމާނީ މިސްކިތެއް އެޅުމަށް ސަރުކާރުން ވަނީ ނިންމާފައެވެ. މާލެ ސަރަހައްދުގައި ނަމާދުކުރާނެ ޖާގަ އިތުރުކުރުމުގެ ގޮތުން ކުރިއަށްގެންދާ މި މަޝްރޫޢުގެ ދަށުން، ބަންޑާރަ މިސްކިތް ހުރި ތަނުގައި އައު މިސްކިތް އެޅުމުގެ އަމަލީ މަސައްކަތް ކުރިއަށް އޮތް ރަމަޟާން މަހަށްފަހު ފެށޭނެކަމަށް ވަޒީރު ވިދާޅުވިއެވެ. އަދި މި މަސައްކަތަށް ބޭނުންވާ މާލީ އެހީތެރިކަން ދީލަތި ފަރާތަކުން މިހާރު ހަމަޖައްސައިދީފައިވާކަމަށްވެސް އެމަނިކުފާނު ވަނީ ހާމަކުރައްވާފައެވެ.
ކޮމެންޓު ފޮނުވާ