އުރީދޫ މޯލްޑިވްސްގެ 2026 ވަނަ އަހަރުގެ އަހަރީ އާންމު ޖަލްސާ ރޭ ބާއްވައި، ނިމިދިޔަ 2025 ވަނަ އަހަރުގެ ފައިދާއިން ހިއްސާއަކަށް 3.54 ރުފިޔާ ބެހުމަށް ހިއްސާދާރުންގެ އަޣުލަބިއްޔަތުން ފާސްކޮށްފިއެވެ.
ހުޅުމާލޭގައި ހުންނަ އުރީދޫގެ މައި އޮފީހުގައި ރޭ ބޭއްވި މި ޖަލްސާގައި ހިއްސާދާރުން ބައިވެރިވެފައިވަނީ ހާޒިރުވެގެންނާއި، މޯލްޑިވްސް ސެކިއުރިޓީޒް ޑެޕޮޒިޓަރީގެ "ފަހިވޯޓް" މެދުވެރިކޮށް އޮންލައިންކޮށެވެ. މި ޖަލްސާގައި ޖުމުލަ 353 ހިއްސާދާރުން (ހާޒިރުވި 144 މީހުންނާއި ޕްރޮކްސީގެ ގޮތުގައި ބައިވެރިވި 209 މީހުން) ބައިވެރިވެފައިވާއިރު، މިއީ ކުންފުނީގެ ޖުމުލަ ހިއްސާގެ 98 އިންސައްތައެވެ.
މި ޖަލްސާގައި ވަނީ ކުންފުނީގެ 2025 ވަނަ އަހަރުގެ އޮޑިޓްކޮށްފައިވާ މާލީ ބަޔާންތަކާއި އޮޑިޓަރުގެ ރިޕޯޓާއި، ޑިރެކްޓަރުންގެ ރިޕޯޓް ފާސްކޮށްފައެވެ. އަދި މިއަހަރުގެ އޮޑިޓަރުންގެ ގޮތުގައި ކޭޕީއެމްޖީ ހަމަޖައްސައި އެ ފަރާތުގެ އުޖޫރަވެސް ވަނީ ފާސްކޮށްފައެވެ. މީގެ އިތުރުން، އެންމެ ބޮޑު ހިއްސާދާރު ކަމަށްވާ ވަތަނިއްޔާ އިންޓަނޭޝަނަލްގެ ފަރާތުން ބޯޑު ޑިރެކްޓަރެއްގެ ގޮތުގައި ފާތިމާ ސުލްޠާން އަލް-ކުވާރީ އަލުން އިންތިޚާބުކުރިއިރު، އާންމު ހިއްސާދާރުންގެ ފަރާތުން ބޯޑަށް ހޮވާފައިވަނީ ޢަބްދުﷲ ޢަލީއެވެ.
އުރީދޫގެ މާލީ ހިސާބުތައް ދައްކާގޮތުން ނިމިދިޔަ 2025 ވަނަ އަހަރު އެ ކުންފުންޏަށް އާމްދަނީގެ ގޮތުގައި 2.1 ބިލިއަން ރުފިޔާ ލިބިފައިވެއެވެ. އަދި ޓެކުހަށް ކެނޑުމަށްފަހު ސާފު ފައިދާގެ ގޮތުގައި 727 މިލިއަން ރުފިޔާ ވަނީ ލިބިފައެވެ.
ކޮމެންޓު ފޮނުވާ