މެދުއިރުމަތީގެ ވައިގެ ސަރަހައްދު ބަންދުކުރުމާ ގުޅިގެން މެދުކަނޑާލާފައި އޮތް އިއްތިހާދު އެއާވޭސްގެ ދަތުރުތައް، ސަލާމަތީ ކަންކަން ކަށަވަރުކުރުމަށްފަހު އަލުން ފަށައިފިއެވެ.
ކަމާބެހޭ އިދާރާތަކުގެ ލަފާގެ މަތިން މިއަދުން ފެށިގެން މި މަހުގެ 19 ވަނަ ދުވަހުގެ ނިޔަލަށް މަދު ފްލައިޓުތަކެއް އޮޕަރޭޓުކުރަން ނިންމާފައިވާއިރު، މި ދަތުރުތަކުގައި އެންމެ ބޮޑު އިސްކަމެއް ދެނީ ފްލައިޓުތައް ކެންސަލްވުމުގެ ސަބަބުން ދަތުރުނުކުރެވި ތިބި ފަސިންޖަރުންނަށެވެ. އަދި މިކަމާ ގުޅޭ މައުލޫމާތު އެއާލައިނުން އަންނަނީ ކަސްޓަމަރުންނަށް ސީދާ ގުޅައިގެން ފޯރުކޮށްދެމުންނެވެ.
މީގެ އިތުރުން ފެބްރުއަރީ 28 ގެ ކުރިން ޓިކެޓު ނަގައި، މި މަހުގެ 21 އާ ހަމައަށް ދަތުރުކުރަން ހަމަޖެހިފައިވާ ފަރާތްތަކަށް އިތުރު ފީއަކާ ނުލައި 15 މެއި 2026 ގެ ކުރިން ދަތުރުކުރެވޭ ގޮތަށް ޓިކެޓުގެ ތާރީހު ބަދަލުކުރުމުގެ ފުރުސަތު މިހާރު ވަނީ ހުޅުވާލާފައެވެ.
ދަތުރު ކެންސަލްކޮށް ފައިސާ އަނބުރާ ހޯދަން (ރީފަންޑަށް އެދެން) ބޭނުންވާ ފަރާތްތަކަށް ޓްރެވަލް އެޖެންޓުންނާއި އޮންލައިން ފޯމު މެދުވެރިކޮށް އެ ފުރުސަތު ފަހިކޮށްދީފައިވެއެވެ. ނަމަވެސް، ކޯލް ސެންޓަރުތަކަށް އޮތް ބާރުބޮޑުކަން ކުޑަކުރުމުގެ ގޮތުން، ރީފަންޑަށް އެދުމަށް ވީހާވެސް ބޮޑަށް އޮންލައިން ފޯމު ބޭނުންކުރުމަށް އިއްތިހާދު އެއާލައިނުން ވަނީ ކަސްޓަމަރުންގެ ކިބައިން އިލްތިމާސްކޮށްފައެވެ.
ކޮމެންޓު ފޮނުވާ