ރަލާއި މަސްތުވާތަކެތިން ލިބޭ ވަގުތީ އުފަލަށްވުރެ އޭގެން ލިބޭ ގެއްލުން މާބޮޑުކަން ފާހަގަކުރައްވައި، އެފަދަ ނުބައި އާދަތަކުން ދުރުވެ ދިރިއުޅުން އިސްލާހުކުރުމަށް އިސްލާމީ ކަންތައްތަކާ ބެހޭ ވުޒާރާގެ ސްޓޭޓް މިނިސްޓަރު ޑރ. މޫސާ އަންވަރު ޙަސަން ގޮވާލައްވައިފިއެވެ.
ރަމަޟާން މަހުގެ ރޭތައް އިޙްޔާކުރުމަށް ބާއްވަމުން އަންނަ ސިލްސިލާ ފޯރަމްތަކުގެ ތެރެއިން "ދެވިހިފުން – މަސްތުވާތަކެތި، ބަނގުރާ އަދި ބޭއަދަބީ މަންޒަރުތައް" މި މައުޟޫއަށް ވާހަކަފުޅުދައްކަވަމުން ޑރ. މޫސާ އަންވަރު ވިދާޅުވީ، އިންސާނާގެ ބުއްދިއާއި ވިސްނުން ފަސާދަކޮށްލާ ކޮންމެ އެއްޗަކީ އިސްލާމްދީނުގައި ހަރާމް އެއްޗެއް ކަމަށެވެ. އަދި ރަލާއި ޖުވާކުޅުމަކީ ޝައިޠާނާގެ އަމަލުތަކުގެ ތެރޭގައި ހިމެނޭ ކަންކަން ކަމަށާއި، އޭގެ ސަބަބުން ﷲ ހަނދުމަކުރުމުން އިންސާނާ ދުރުކޮށް، ބުއްދީގެ ބޭނުން ކެަނޑުވާލާކަމަށް އޭނާ ވިދާޅުވިއެވެ. މިފަދަ ތަކެތި ބޭނުންކުރުމުން ދުނިޔެމަތީގައި ސިއްހަތަށާއި އާއިލީ ގުޅުންތަކަށް ލިބޭ ގެއްލުމުގެ އިތުރުން، އާޚިރަތުގައި ގަދަފަދަ އަޒާބު ލިބިގެންދާނެކަން ހަނދާންކޮށްދެއްވިއެވެ.
މި މޭރުމުން ވާހަކަފުޅު ދައްކަވަމުން ޑރ. މޫސާ އަންވަރު ފާހަގަކުރެއްވި ގޮތުގައި ރަލަކީ ހުރިހާ ނުބައިކަމެއްގެ މައިގަނޑެވެ. އެތަކެތި އުފެއްދުމާއި، ވިއްކުމާއި، އުފުލުމާއި އަދި ބުއިން ފަދަ އެކަމާ ގުޅޭ ދިހަ ކަމެއްގައި ޝާމިލުވާ މީހުންނަށް ކީރިތި ރަސޫލާ ލައުނަތް ލެއްވިކަން އޭނާ ބަޔާންކުރެއްވިއެވެ. އަދި ދުނިޔެމަތީގައި މަސްތުވާތަކެތި ބޭނުންކޮށް ތައުބާ ނުވެ މަރުވާ މީހުންނަށް، ޤިޔާމަތް ދުވަހުން ނަރަކައިގެ އަހުލުވެރިންގެ ހަށިގަނޑުން އޮހޮރޭ ފެން (ތީނަތުލް ޚަބާލު) ބޯންޖެހިދާނެކަމުގެ އިންޒާރު ދެއްވިއެވެ. ޒަމާނަށް އަންނަ ބަދަލުތަކާއެކު މަސްތުވާތަކެތީގެ ނަންތަކާއި ބާވަތްތައް ތަފާތު ވިޔަސް، އިންސާނާގެ ސިކުނޑި ހަމައިން ނައްޓުވާލާ ކޮންމެ އެއްޗަކީ ހަރާމް އެއްޗެއްކަމަށް އިލްމުވެރިން އިއްތިފާގުވެވަޑައިގަންނަވާކަންވެސް ފާހަގަކުރެއްވިއެވެ.
ރާއްޖޭގައި އޮތް މަސްތުވާތަކެތީގެ މައްސަލައަށް ހައްލެއް ހޯދުމަށް ކުރެވިދާނެ ކަންކަމަށް އަލިއަޅުވާލައްވަމުން ސްޓޭޓް މިނިސްޓަރު ވިދާޅުވީ، ކީރިތި ޤުރުއާނާއި ސުންނަތުގެ އަލީގައި މަސްތުވާތަކެއްޗާ ބެހޭ ގާނޫނުތައް އިސްލާހުކުރަން ޖެހިފައިވާ ކަމަށެވެ. އެހެން އިސްލާމީ ޤައުމުތަކުގައި މިކަމަށް ކަނޑައަޅާފައިވާ ހަރުކަށި އަދަބުތަކުން މިސާލު ނަގައި، ރާއްޖޭގެ ގާނޫނީ އޮނިގަނޑު ހަރުދަނާކުރުމުގެ މުހިންމުކަން އޭނާ ފާހަގަކުރެއްވިއެވެ. މީގެ އިތުރުން ރާއްޖެއަށް މަސްތުވާތަކެތި އެތެރެވުން ހުއްޓުވުމަށް ބޯޑަރުތައް ބެލެހެއްޓުން ވަރުގަދަކުރުމާއި، ތައުލީމީ މަންހަޖުގެ ތެރެއިން ކުދިން ހޭލުންތެރިކުރުވުމާއި، އަދި މި ވަބާގައި ޖެހިފައިވާ މީހުންނަށް ދެވޭ ފަރުވާގެ ނިޒާމު އިތުރަށް ހަރުދަނާކުރުމަކީ ކޮންމެހެން ކުރަންޖެހިފައިވާ ކަންކަމަށް ޑރ. މޫސާ އަންވަރު ވިދާޅުވިއެވެ.
ކޮމެންޓު ފޮނުވާ