ސަރުކާރުގެ ޚަރަދުގައި ބޭރު ޤައުމުތަކުގައި ކިޔަވާ ދަރިވަރުންގެ ތެރެއިން، އެންމެ ގިނަ ދަރިވަރުން ތިބި ޤައުމުތަކުގެ ސްޓައިޕެންޑް ރޭޓުތައް މުރާޖާކުރުމުގެ މަސައްކަތް އަވަސްކުރައްވާނެކަމަށް މަތީ ތަޢުލީމާ ބެހޭ ވަޒީރު ޑރ. ޢަލީ ޙައިދަރު އަޙްމަދު ވިދާޅުވެއްޖެއެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ވަޒީރު ފާހަގަކުރެއްވި ގޮތުގައި، ލޯނު ސްކީމުގެ ދަށުން ކިޔަވާ ދަރިވަރުންނަށް ދެމުން އަންނަ ސްޓައިޕެންޑް ރޭޓަށް ބަދަލެއް ނުގެންނަތާ މިހާރު ހަތް ވަރަކަށް އަހަރު ވެދާނެއެވެ. އެހެންކަމުން، ދުނިޔޭގެ އެކި ޤައުމުތަކުގައި ދިރިއުޅުމުގެ ޚަރަދުތައް ބޮޑުވަމުންދާ މިންވަރަށާއި، އެ ޤައުމުތަކުން ސްޓޫޑެންޓް ވީސާ ދޫކުރުމަށް ކަނޑައަޅާފައިވާ މާލީ މިންގަނޑުތަކަށް ރިޢާޔަތްކޮށް، މި އެލަވަންސްތައް މުރާޖާކުރުމުގެ މަސައްކަތް މިހާރު ވަނީ ފަށާފައެވެ.
ދަރިވަރުންނަށް ފައިސާ ލިބުން ލަސްވުމުގެ ޝަކުވާއަށް ޖަވާބުދެއްވަމުން ވަޒީރު ވިދާޅުވީ، ގިނަ ފަހަރަށް ލަސްވަނީ ޔުނިވަރސިޓީތަކުން އިންވޮއިސް ފޮނުވުން ލަސްވުމުގެ ސަބަބުން ކަމަށެވެ. ނަމަވެސް، މިހާރު އެ ނިޒާމު ހަރުދަނާކުރެވި، ކުރިއާ އަޅާބަލާއިރު ފައިސާ ދޫކުރުމުގެ ކަންކަން ވަރަށް ބޮޑަށް ރަނގަޅުވެފައިވާކަމަށް އެމަނިކުފާނު ވިދާޅުވިއެވެ. އެގޮތުން މިއަހަރުގެ ތެރޭގައި %75 ދަރިވަރުންނަށް، މުއްދަތު ހަމަވުމުގެ ދެ ހަފުތާ ކުރިން ފައިސާ ޖަމާކޮށްދެވިފައިވާކަން ވަޒީރު ފާހަގަކުރެއްވިއެވެ.
މީގެއިތުރުން، ބޭރުގައި ކިޔަވާ ދަރިވަރުންނަށް ދިމާވާ ދަތިތައް ޙައްލުކުރުމަށް ފަސޭހައިން ވުޒާރާއާ ގުޅޭނެ އިންތިޒާމުތައް ވެސް ވަނީ ހަމަޖައްސާފައެވެ. މިގޮތުން 50 އަށްވުރެ ގިނަ ދަރިވަރުން ތިބޭ ޤައުމުތަކަށް ޚާއްޞަ ހޮޓްލައިންތަކެއް ޤާއިމުކޮށްފައިވާއިރު، ރައީސުލްޖުމްހޫރިއްޔާގެ އިރުޝާދުގެ މަތިން، 25 ދަރިވަރުންނަށްވުރެ ގިނައިން އުޅޭ ޤައުމުތަކަށް ވެސް 24 ގަޑިއިރު ޚިދުމަތް ލިބޭނެ ހެލްޕްލައިންތައް ތަޢާރަފުކުރުމުގެ މަސައްކަތް ކުރަމުންދާކަމަށް ވަޒީރު ވިދާޅުވިއެވެ.
ކޮމެންޓު ފޮނުވާ