ވެލާނާ އިންޓަރނޭޝަނަލް އެއާޕޯޓު (ވީއައިއޭ) މެދުވެރިކޮށް ރާއްޖެއަށް ގިނަ އަދަދެއްގެ މަސްތުވާތަކެތި އެތެރެކުރަން އުޅުނު އިންޑިއާގެ ދެ މީހަކު ހައްޔަރުކޮށް، އެ މީހުންގެ ބަންދަށް ކޯޓުން ހަ ދުވަހުގެ މުއްދަތެއް ޖަހައިފިއެވެ.
މި މައްސަލައިގައި ފުލުހުންގެ ބެލުމުގެ ދަށަށް ގެންގޮސްފައިވަނީ އިންޑިއާއަށް ނިސްބަތްވާ އުމުރުން 21 އަހަރުގެ ކަތިރިވިލް މަނިމަރަން އާއި 19 އަހަރުގެ ދަނޫޝްކާނދަން ގޯޕާލް އެވެ. އެ ދެ މީހުން ހައްޔަރުކުރީ ރާއްޖެއަށް މަސްތުވާތަކެތި އެތެރެކުރަން އުޅޭކަމަށް ޝައްކުކުރެވިގެން ކަސްޓަމްސްގެ އޮފިސަރުން އެ މީހުންގެ ލަގެޖް ބަލައި ފާސްކުރުމުގެ ތެރޭގައެވެ.
ފުލުހުން ހާމަކުރި ގޮތުގައި، އެ މީހުންގެ ލަގެޖު ފާސްކުރިއިރު އޭގެ ތެރެއިން މަސްތުވާތަކެތި ހުރި ކަމަށް ޝައްކުކުރެވޭ ފުޅިތަކެއް ވަނީ ފެނިފައެވެ. އެ ތަކެތި ތަހުލީލުކުރިއިރު މަސްތުވާތަކެތީގެ ބާވަތެއް ކަމަށްވާ ހަޝިޝް އޮއިލްއަށް ޕޮޒިޓިވް ވެފައިވާއިރު، އަތުލައިގަތް ތަކެތީގެ ވަގުތީ ބަރުދަނުގައި ޖުމްލަ 6.7 ކިލޯ ހުރިކަމަށް ފުލުހުން މައުލޫމާތު ދެއެވެ.
މި މައްސަލައާ ގުޅިގެން އެ ދެ މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން ކޯޓުން ވަނީ ބަންދަށް ހަ ދުވަސް ދީފައެވެ. ފުލުހުން ބުނީ މަސްތުވާތަކެތި އެތެރެކުރަން އުޅުނު މި މައްސަލަ އެ އިދާރާއިން އިތުރަށް ތަހުގީގު ކުރަމުންދާ ކަމަށެވެ.
ކޮމެންޓު ފޮނުވާ