މެދުއިރުމަތީގެ މަސްރަހު ނުހަނު ބޮޑަށް ގޯސްވެ، އެމެރިކާ އާއި އިސްރާއީލުން އީރާނާ ދެކޮޅަށް ހިންގަމުންދާ ކުރިމަތިލުންތަކުގެ ތެރޭގައި، ހުރްމޫޒް ކަނޑުއޮޅި ސަރަހައްދުގައި އިންޑިއާގެ ދިދަ ޖަހާފައިވާ 37 އުޅަނދެއް ތާށިވެ، އެ ގައުމުގެ ވިޔަފާރީގެ ނިޒާމަށް ބޮޑު ނުރައްކަލަކާ ކުރިމަތިވެއްޖެއެވެ.
ޕާޝިއަން ގަލްފާއި ގަލްފް އޮފް އޯމާން ސަރަހައްދުގައި ތާށިވެފައިވާ މި އުޅަނދުތަކުގައި އިންޑިއާގެ 1،109 ފަޅުވެރިން ތިބިކަމަށް ރިޕޯޓުތައް ބުނެއެވެ. މީގެ ތެރޭގައި މުދާ ބަރުކޮށްގެން ދަތުރަށް ފަށަން ތައްޔާރުވެފައިވާ އުޅަނދުތަކާއި، މުދާ ބަރުކުރުމުގެ އިންތިޒާރުގައި މަޑުކޮށްގެން ތިބި އުޅަނދުތައް ހިމެނެއެވެ. މި ހާލަތު މެދުވެރިވީ މާޗް މަހުގެ 2 ވަނަ ދުވަހު އީރާނުގެ އިސްލާމިކް ރިވަލިއުޝަނަރީ ގާޑް ކޯޕްސް (އައިއާރްޖީސީ) އިން ހުރްމޫޒް ކަނޑުއޮޅި ބަންދުކޮށް، އެ ސަރަހައްދުން ދަތުރުކުރާ އުޅަނދުތަކަށް ހަމަލާދޭނެކަމުގެ އިންޒާރު ދިނުމާ ގުޅިގެންނެވެ. މި އިންޒާރާއެކު އެ ސަރަހައްދުން ދަތުރުކުރާ އުޅަނދުފަހަރުގެ އަދަދު ވަނީ ވަރަށް ބޮޑަށް ދަށަށް ގޮސްފައެވެ.
މިކަމާ ގުޅިގެން އިންޑިއާގެ ޝިޕިންގް އެސޯސިއޭޝަނުން ވަނީ ފަޅުވެރިންނާއި އުޅަނދުތަކުގެ ސަލާމަތްތެރިކަން ކަށަވަރުކުރުމަށް ސަރުކާރުގެ އެހީތެރިކަމަށް އެދިފައެވެ. އަދި ހުރްމޫޒް ކަނޑުއޮޅިން ރައްކާތެރިކަމާއެކު ދަތުރުކުރެވޭނެ މަގު ފަހިކޮށްދިނުމަށް އެ ޖަމިއްޔާއިން ވަނީ ގޮވާލާފައެވެ. ކަމާބެހޭ ފަރާތްތަކުން މިހާރު ދަނީ މިކަން ވަރަށް ގާތުން ބަލަމުންނެވެ. އެ ސަރަހައްދުގައި ތިބި 1000 އަށްވުރެ ގިނަ ފަޅުވެރިންގެ ސަލާމަތް ކަށަވަރުކުރުމަކީ މިވަގުތު ސަރުކާރުން އެންމެ އިސްކަންދޭ ކަންތައް ކަމުގައި ވިޔަސް، މި ހާލަތުން އަރައިގަތުމަށް އަޅާނެ ވަކި ހާއްސަ ފިޔަވަޅުތަކެއް އިންޑިއާ ސަރުކާރުން އަދި ރަސްމީކޮށް ހާމަކޮށްފައެއް ނުވެއެވެ.
އިގްތިސާދީ މާހިރުން ދެކޭގޮތުގައި މިއީ އިންޑިއާގެ އިގްތިސާދަށް ކުރިމަތިވެފައިވާ ވަރަށް ނާޒުކު ހާލަތެކެވެ. ސަބަބަކީ އިންޑިއާއަށް އެތެރެކުރާ ސާފުނުކުރާ ތެލުގެ 46 އިންސައްތައަކީ ހުރްމޫޒް ކަނޑުއޮޅި ހުރަސްކޮށް އަންނަ ތެޔޮ ކަމަށް ވެފައި، ކާބޯތަކެއްޗާއި، ކެމިކަލް އަދި ރަނުގެ ވިޔަފާރިވެސް މި މަގުގެ މައްޗަށް ބަރޯސާވެފައި ވުމެވެ. މަސްރަހު އިތުރަށް ގޯސްވެއްޖެނަމަ، މުދާ އުފުލުމުގެ އަގު ބޮޑުވެ، އިންފްލޭޝަން މައްޗަށް ގޮސް، އިންޑިއާގެ އިގްތިސާދަށް ބޮޑެތި ލޮޅުންތަކެއް އަރާނެކަމުގެ ބިރު ވަނީ ހީވެފައެވެ.
ކޮމެންޓު ފޮނުވާ