ރުޅިއައިސްގެން ގެއިން ނުކުތް ނޫރާ ގެއްލިގެން ހޯދަން ފަށައިފި

މާލޭގައި ދިރިއުޅޭ އަންހެނަކު ގެއްލިގެން ހުށަހެޅުނު މައްސަލައަކާ ގުޅިގެން، އޭނާ ހޯދުމުގެ މަސައްކަތް ފުލުހުން ފަށައިފިއެވެ.

މި މައްސަލައިގައި ގެއްލިގެން ހޯދަމުންދަނީ ޅ. ނައިފަރު، ކަށިމާގޭ، ފާޠިމަތު ނޫރާ (32އ) އެވެ. ފުލުހުން މައުލޫމާތު ދީފައިވާ ގޮތުގައި ނޫރާ ގެއްލިގެން އާއިލާއިން ރިޕޯޓުކޮށްފައިވަނީ ރޭ ދަންވަރު 12:19 ހާއިރުއެވެ. އާއިލާއާ ހަވާލާދީ ފުލުހުން ބުނީ ނޫރާގެ ޚަބަރެއް ނުވެގެން ހޯދަން ފަށާފައިވަނީ، ރޭ 20:00 ހާއިރު ގެއިން ބޭރަށް ދިޔަ ގޮތަށް އެނބުރި ނައުމުން ކަމަށެވެ.

ނޫރާ ހޯދުމަށް އާއިލާއިން ސޯޝަލް މީޑިއާގައި ކޮށްފައިވާ ޕޯސްޓެއްގައި ބުނެފައިވާ ގޮތުން އޭނާ ގެއިން ނުކުތީ ރުޅިއައިސްގެންނެވެ. އަދި އޭނާއަކީ ފިޓުޖެހުމުގެ އިތުރުން ސިކުނޑީގެ މައްސަލަތަކެއް ހުންނަ މީހެއް ކަމަށާއި، އެންމެ ފަހުން ފިޓުޖެހުނު ދުވަހު ވެއްޓި ސިކުނޑިއަށް ލިބުނު އަނިޔާއަކާ ގުޅިގެން މީހާ ވަރަށް ބޮޑަށް ރުޅިގަދަވާކަން އާއިލާއިން ފާހަގަކޮށްފައިވެއެވެ. ގެއިން ނުކުތްއިރު އޭނާ ހުރީ ގަދަ ޗޮކުލެޓު ކުލައިގެ ޓޮޕެއް ލައިގެންނެވެ.

ފުލުހުން ބުނީ މައްސަލަ ރިޕޯޓުކުރުމާއެކު ކަމާބެހޭ ބަހާތަކަށް މައުލޫމާތު ހިއްސާކޮށް ހޯދުމުގެ މަސައްކަތް ކުރަމުންދާ ކަމަށާއި، ނަމަވެސް އަދި މިހާތަނަށް އޭނާ ފެނިފައިނުވާ ކަމަށެވެ. ވީމާ، ނޫރާއާ ގުޅޭ އެއްވެސް މައުލޫމާތެއް ލިބިފައިވާ ފަރާތެއް ވާނަމަ ގަލޮޅު ޕޮލިސް ސްޓޭޝަންގެ ނަންބަރު 9631696 އަށް ނުވަތަ ފުލުހުންގެ ހޮޓްލައިން 3322111 އަށް ގުޅުއްވައި އެކަން ހިއްސާކޮށްދެއްވުމަށް ފުލުހުން އެދިލައްވައެވެ.