ރާއްޖޭގެ މާހައުލާ ގުޅޭ، އަދި ރާއްޖޭގެ ބިންތަކުގައި އެންމެ ރަނގަޅަށް ހެދޭ މޭވާ އާއި ތަރުކާރީގެ ބާވަތްތައް ހެއްދުމަށް ޚާއްސަ ސަމާލުކަމެއް ދިނުމަށް ދަނޑުވެރިކަމާއި ދިރޭތަކެއްޗާ ބެހޭ މިނިސްޓަރު ޑރ. މަރްޔަމް މާރިޔާ އިލްތިމާސްކުރައްވައިފިއެވެ.
ކާބޯތަކެތީގެ ޔަގީންކަން ކަށަވަރުކުރުމަށް މިނިސްޓްރީން ކުރަމުންދާ މަސައްކަތްތަކާ ގުޅޭގޮތުން ނޫސްވެރިންނަށް މައުލޫމާތު ދެއްވަމުން މިނިސްޓަރު ވިދާޅުވީ، ރާއްޖޭގެ ރަށްރަށުގެ ދަނޑުބިންތަކާއި ގޯތިތެރޭގައިވެސް ގިނަ ބަޔަކު ފުޅާ ދާއިރާއެއްގައި ދަނޑުވެރިކަން ކުރަމުންދާ ކަމަށެވެ. މިގޮތަށް ކުރެވޭ މަސައްކަތްތަކުގެ ސަބަބުން، އެ އާއިލާތަކަށް ބޭނުންވާ ކާބޯތަކެތީގެ މިންވަރެއް އަމިއްލައަށް ކަށަވަރު ކުރެވިގެންދާކަން ވަޒީރު ފާހަގަކުރެއްވިއެވެ.
މިނިސްޓަރު މާރިޔާ ވިދާޅުވި ގޮތުގައި ފުޑް ސެކިއުރިޓީ ޕޮލިސީގެ ދަށުން އެންމެ ބޮޑަށް ބާރުއަޅުއްވަނީ ރާއްޖޭގެ ފަސްގަނޑުގައި ފަސޭހައިން ހެދޭ "ނޭޓިވް" ނުވަތަ ރާއްޖެއަށް ޚާއްސަ ބާވަތްތައް ހެއްދުމަށެވެ. އެރަށެއްގެ ރައްޔިތުންނަށް ފުދޭ މިންވަރަށް މިފަދަ ތަކެތި ހެއްދުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގެންގުޅުއްވާ މުހިންމު ތަސައްވުރެއްކަންވެސް އެކަމަނާ ފާހަގަކުރެއްވިއެވެ.
ދަނޑުވެރިކަން ފުޅާކޮށް، ދަނޑުވެރިންނަށް ފަހި ފުރުސަތުތަކެއް ހޯދައިދިނުމަށް ސަރުކާރުން ކުރަމުންދާ މަސައްކަތްތަކުގެ ތެރެއިން، މި ރޯދަ މަހަށް ޚާއްސަކޮށްގެން ނޯތު ހާބަރުގައި ވަގުތީ މާރުކޭޓެއް ވަނީ ހުޅުވާފައެވެ. ދަނޑުވެރިންގެ އުފެއްދުންތައް ހެޔޮ އަގުގައި ފަސޭހައިން ވިއްކޭނެ އިންތިޒާމު ހަމަޖެއްސުމަށް ޤާއިމުކުރި މި މާރުކޭޓުގައި، މޯލްޑިވްސް ގުޑް އެގްރިކަލްޗަރަލް ޕްރެކްޓިސެސް (އެމްގެޕް) ސެޓިފައިޑް ތަކެތި ލިބެން ހުންނާނެކަމަށް މިނިސްޓްރީން މައުލޫމާތު ދެއްވައެވެ.
ކޮމެންޓު ފޮނުވާ